استانا اكىمدىگى سۇرانىسقا يە ماماندىقتاردى اتادى
استانادا قالالىق جۇمىسپەن قامتۋ ورتالىعىنىڭ ءۇش وكىلدىگى اشىلدى. وندا جۇمىس ىزدەۋشىلەر وزەكتى بوس ورىندارمەن تانىسىپ، سۇحباتتاسۋعا جولداما الا الادى.
استانا قالاسى اكىمدىگىنىڭ جۇمىسپەن قامتۋ ورتالىعىنىڭ باسپا ءسوز قىزمەتىنىڭ جەتەكشىسى ديدار سادىقوۆ مالىمدەگەندەي، ەڭبەك نارىعىندا قۇرىلىس سالاسىنىڭ ماماندىقتارى سۇرانىسقا يە. الايدا، ءتىزىم ءجۇزۋ باپكەرى جانە كينولوگ سياقتى سيرەك كەزدەسەتىن بوس جۇمىس ورىندارى بار، دەپ جازادى Pm.kz.
«استانادا جۇمىسپەن قامتۋ ورتالىعىنىڭ بىردەن ءۇش وكىلدىگى اشىلدى، وندا جۇمىس ىزدەۋشىلەر مالىمەتتەر بازاسىنداعى وزەكتى بوس ورىندارمەن تانىسىپ، سۇحباتتاسۋعا جولداما الا الادى. سونىمەن قاتار، جاستار پراكتيكاسىن، دايارلاۋ جانە قايتا دايارلاۋ كۋرستارىن ءوتۋ جاعدايلارى مەن قاجەتتى قۇجاتتار جيىنتىعى تۋرالى مامانداردىڭ كەڭەسىن الۋعا بولادى»، - دەدى د. سادىقوۆ.
باسپا ءسوز قىزمەتىنىڭ باسشىسى باسا ايتىپ وتكەندەي، جۇمىسپەن قامتۋ ورتالىعى وكىلدىكتەرىنىڭ قوسىمشا ورىندارىن اشۋ جۇمىسسىزداردىڭ باسىم بولىگىن مەملەكەتتىك قولداۋ شارالارىمەن قامتۋ قاجەتتىگىنە نەگىزدەلگەن.
«قازىرگى تاڭدا ەلوردالىق جۇمىسپەن قامتۋ ورتالىعىنىڭ بازاسىندا 3 مىڭنان استام بوس ورىن بار. ءبىراق، ءبىز بۇگىن تۇرعىندارعا ەڭ وزەكتى جانە ەڭ سۇرانىسقا يە بوس ورىنداردى ۇسىنامىز: قۇرىلىس ماماندارى، ەلەكترشىلەر، دانەكەرلەۋشىلەر، ۇلكەن جۇك كولىكتەرىنىڭ جۇرگىزۋشىلەرى، كران ماشينيستەرى. قالا ءوسىپ كەلەدى، ەكسپو نىساندارى سالىنىپ جاتىر. وسىعان دەيىن اتالعان وكىلدىكتەرگە جۇگىنگەن 834 ادامنىڭ جىل باسىنان بەرى 355 ادام جۇمىسقا ورنالاستىرىلدى، 72 ادام جاستار پراكتيكاسىنا، 44 ادام مامانداردى دايارلاۋ جانە قايتا دايارلاۋ كۋرستارىنا جىبەرىلدى»، - دەپ باسا ايتتى د. سادىقوۆ.
