وليمپيادا جۇلدەگەرى فارحاد حاركي: قازاق ەلىنە العىسىم شەكسىز

سالتاناتتى شاراعا قاتىسقان مەيمانداردىڭ ءبىرى، ريو وليمپياداسىندا ەرلەر اراسىندا اۋىر اتلەتيكادان قولا ەنشىلەگەن فارحاد حاركي قازاقپارات ءتىلشىسىنىڭ سۇراقتارىنا جاۋاپ بەردى.
- حاركي مىرزا، الدىمەن ءسىزدى جەتىستىگىڭىزبەن قۇتتىقتايمىن، بۇل مەدال ءسىزدىڭ سپورتتىق مانسابىڭىزعا قانشالىق اسەر ەتتى؟
- مەن بۇل وليمپيادا ءۇشىن كوپ دايىندىقتار جاسادىم. كۇنىنە ەكى ۋاقىت جاتتىعۋدان تىس تۇنگى ساعات 22 لەردە تاعى دا تىنباي تەر توكتىك. وسىنداي ۋاقىتپەن ساناسپاي تىنىمسىز ەڭبەك ەتۋدىڭ ارقاسىندا وسى جەتىستىككە جەتتىم دەپ ويلايمىن. بۇل وليمپيادا مەدالى مەن ءۇشىن عانا ەمەس، قازاقستان اۋىر اتلەتيكا ۇلتتىق قۇراماسى ءۇشىن، ءتىپتى ەلىمىزدىڭ ۇلتتىق وليمپيادا كوميتەتى ءۇشىن دە ەرەكشە ماڭىزعا يە دەپ ەسەپتەيمىن. بۇل ءبىزدىڭ قۇراما مۇشەلەرىنىڭ وسى جىلدارداعى وراسان ەڭبەگىنىڭ، جەڭىسكە دەگەن قۇلشىنىسىمىزدىڭ ارقاسى، سونداي- اق ءوزىمنىڭ سپورتتىق مانسابىمداعى جەتىستىكتەرىمنىڭ ءبىرى دەپ ويلايمىن.
- ءسىز ريو وليمپياداسىنا قاتىسۋ ءۇشىن قانشا ۋاقىت دايىندالدىڭىز، جاتتىعۋلار قيىن دا بولعان شىعار.
- ريو وليمپياداسى ءۇشىن 4 جىل ۋاقىتىمدى سارپ ەتتىم. مەن ءۇشىن بۇل كەزەڭ ۇزاق ءارى ماشاقاتقا تولى بولدى. ءار كۇنگى جاتتىعۋدان تىس، بەلگىلەنگەن ءتارتىپ بويىنشا تاماقتانۋ، دەنساۋلىقتىڭ كەپىلدىگىن ساقتاۋ جانە وليمپيادا جولداماسى ءۇشىن جارىسقا قاتىسۋ سياقتى باپكەردىڭ دايىنداعان كۇنتىزبەسى بولدى. بۇدان باسقا، قاتاڭ رەجىمدەگى جاتتىعۋ كەزەڭدەرىندە، بوس ۋاقىتتارىمدا تەك دەمالۋعا عانا مۇرشام كەلەتىن ەدى.
- قازاقستاننىڭ اۋىر اتلەتيكا سالاسىنداعى دامۋىنا دەگەن كوزقاراسىڭىز قالاي؟
- قازاقستاننىڭ اۋىر اتلەتيكا سالاسىنىڭ دامۋى وتە قارقىندى. قازىرگى تاڭدا، بۇل سپورت تۇرىنە قىزىعۋشىلاردىڭ سانى كۇن سايىن ارتۋدا، كوپتەگەن سپورتشىلار شىڭدالىپ كەلەدى. قاراپ وتىرساق، قازاقستان اۋىر اتلەتتەرى وسى سپورت تۇرىندەگى حالىقارالىق تۋرنيرلەردە توپ جارۋدا.
- ريو وليمپياداسى قارساڭىندا ەلىمىزدىڭ لوندون وليمپياداسىنىڭ چەمپيوندارى دوپينگ داۋىنا بايلانىستى جارىستان شەتتەتىلگەنى بەلگىلى، ءسىز بۇعان قالاي قارايسىز؟
- مەنىڭ بۇل ماسەلە توڭىرەگىندە ەشقانداي پىكىر بىلدىرۋگە قۇقىم جوق. الايدا، قازاقستان اۋىر اتلەتيكا فەدەراتسياسى مەن مادەنيەت جانە سپورت مينيسترلىگى سىندى قۇزىرلى ورگاندار بۇل وقيعاعا بايلانىستى دۇرىس شەشىم تاباتىنىنا كۇمانىم جوق. مەنىڭ ويىمشا، وليمپيادا رۋحى دوپينگ قولدانۋعا جول بەرمەيدى، ءادىل باسەكەمەن ويىنداردا بار كۇش- جىگەردى جۇمساپ، جوعارى جەتىستىككە جەتۋ - باستى ماقسات بولۋى كەرەك.
- توكيو وليمپياداسىنا قاتىسۋ جوسپارىڭىزدا بار ما؟
- قازىر بۇل تۋرالى ايتۋ ءالى ەرتە، ەڭ ءبىرىنشى كەزەكتە جوسپار بويىنشا ءبىر- ەكى اي تىنىعامىز. سودان كەيىن بىرتىندەپ جاتتىعۋلاردى باستايتىن بولامىز.
- سىزگە جانكۇيەر بولعان قازاقستاندىقتارعا ايتارىڭىز؟
- مەن وسى مۇمكىندىكتى پايدالانىپ باپكەرىم الەكسەي نيگە جانە ماعان قولداۋ كورسەتكەن بارشا قازاقستاندىقتارعا شەكسىز العىس بىلدىرگىم كەلەدى.
- اڭگىمەڭىزگە راقمەت!
سۇحباتتاسقان ەرزات تابىس ۇلى