استانادا وليمپيادا جۇلدەگەرلەرى «بايتەرەك» مونۋمەنتى الاڭىندا حالىقپەن جۇزدەستى

«مەن بىلەمىن، كوبىڭىز ءتۇن ۇيقىلارىڭىزدى ءتورت ءبولىپ، ريو- دە- جانەيرودا جۇرگەن بىزدەرگە جانكۇيەرلىك ەتتىڭىزدەر. ءبىز بۇل قولداۋلارىڭىزعا العىس ايتامىز، ارداق تۇتامىز. بارلىقتارىڭىزعا راحمەت!»، دەدى وليمپيادا چەمپيونى دانيار ەلەۋسىنوۆ.
«قولپاشتاپ، دەمەپ جۇرگەن مىنا سىزدەرگە ريزامىز! ريودا ءبىز بۇنىڭ بارلىعىن سەزىنىپ جۇردىك. سىزدەردىڭ قولداۋلارىڭىز بولماسا، ءبىز وليمپ شىڭىن باعىندىرا الماس تا ەدىك. سول ءۇشىن ۇلكەن راحمەت!»، - دەپ جالعادى ريو-2016 وليمپياداسىنىڭ چەمپيونى دميتريي بالاندين.
«قۇرمەتتى دوستار! جانكۇيەرلىك ەتكەندەرىڭىزگە مىڭ دا ءبىر العىس. ءبىز بۇگىن جەڭىستەرىمىزدى بىرگە تويلاپ جاتقانىمىزعا رازىمىن! العا، قازاقستان!»، - دەدى وليمپيادا جەڭىمپازى نيدجات راحيموۆ. الاڭداعى كەزدەسۋدەن سوڭ، وليمپياداشىلار قالا كوشەلەرىمەن شەرۋگە اتتاندى.
ريو- دە- جانەيرو قالاسىندا 2016 -جىلى 5 جانە 21 - تامىز ارالىعىندا وتكەن جازعى وليمپيادا ويىندارىنا قاتىسقان قازاقستان قۇراما كومانداسى جالپى سانى 17 مەدال ۇتىپ الدى. بۇل قازاقستاننىڭ وليمپيادا ويىندارىنا 6- رەت قاتىسۋى. ءتورت جىلدىقتىڭ باستى دوداسىندا ەلىمىزدىڭ نامىسىن 26 سپورت تۇرىنەن 104 سپورتشى قورعاعان. وليمپيادادان قازاقستان ەنشىسىندە 3 التىن، 5 كۇمىس، 9 قولا جۇلدە بار. التىن جۇلدەگە بوكستان دانيار ەلەۋسىنوۆ، اۋىر اتلەتيكادان نيجات راحيموۆ پەن جۇزۋدەن دميتري بالاندين قول جەتكىزدى. كۇمىس مەدالدى قازاق سپورتشىلارى ساپىنان ادىلبەك نيازىمبەتوۆ (بوكس)، ۆاسيلي ليەۆيت (بوكس)، جازيرا جاپپارقۇل (اۋىر اتلەتيكا)، ەلدوس سمەتوۆ (دزيۋدو)، گۇزەل مانيۋروۆالار (كۇرەس) الىپ بەرسە، قولا جۇلدەگە يۆان دىچكو (بوكس)، داريعا شاكىموۆا (بوكس)، وتگونتسەتسەگ گالبادراح (دزيۋدو)، كارينا گوريچيەۆا (اۋىر اتلەتيكا)، ولگا رىپاكوۆا (جەڭىل اتلەتيكا)، الەكساندر زايچيكوۆ (اۋىر اتلەتيكا)، ەلميرا سىزدىقوۆا (كۇرەس)، ەكاتەرينا لاريونوۆا (كۇرەس)، فارحاد حاركي (اۋىر اتلەتيكا) قول جەتكىزە الدى.