الماتىداعى حالىقارالىق كونفەرەنسيادا قىتايدىڭ سىچۋان پروۆينتسياسى تانىستىرىلدى

كونفەرەنسياعا كەلۋشىلەر الدىمەن ارنايى ۇيىمداستىرىلعان فوتوكورمەدەن سىچۋان پروۆينتسياسىنىڭ كورىكتى جەرلەرى بەينەلەنگەن فوتوسۋرەتتەردى تاماشالادى. كەيىن اتالمىش پروۆينتسياعا قاتىستى بەينە فيلم كورسەتىلدى.
ارتىنشا پاندا بولىپ كيىنگەن انيماتور- ارتىستەر قىتايدىڭ ۇلتتىق ءبيىن جانە قازاقتىڭ «قارا جورعا» ءبيىن بيلەپ، جينالعان جۇرتشىلىقتىڭ قوشەمەتىنە بولەندى.
ءوز سوزىندە سىچۋان پروۆينتسياسى تۋريزمدى دامىتۋ كوميتەتى ديرەكتورىنىڭ ورىنباسارى ۆان سزيچۋن سىچۋان پروۆينتسياسىنىڭ قىتايدا ەڭ ماڭىزدى تۋريستىك مەكەندەردىڭ ءبىرى ەكەندىگىن اتاپ كورسەتتى.
«قازاقستان مەن قىتاي سوناۋ كونە زامانداردان بەرى كورشىلەس ورنالاسقان ەلدەر. قازىر ەكى ەلدىڭ اراسىنداعى شەكارا ۇزىندىعى 1700 شاقىرىمدى قۇرايدى. قازاقستان - ۇلى جىبەك جولىنىڭ اجىراماس بولىگى. قازاقستان - بىرەگەي تۋريستىك رەسۋرستارعا يە مەملەكەت. بۇگىنگى شارا قازاقستان مەن سىچۋان پروۆينتسياسى اراسىنداعى تۋريستىك بايلانىستى نايعاتا تۇسەدى دەگەن ۇمىتتەمىن. سىچۋان - قىتايدىڭ جۇماقتاي جەرى. قىتايداعى تۋريستەر ەڭ كوپ كەلەتىن مەكەن. مۇندا تاريحي- مادەني ەسكەرتكىشتەر، اسەم تابيعاتپەن قاتار، قىتايدىڭ سيمۆولىنا اينالعان بامبۋكتىك ايۋ - پاندا ءومىر سۇرەدى. جەرگىلىكتى تاعامدار دا ءوزىنىڭ دامدىلىگىمەن تۋريستەردى تاڭعالدىراتىن بولادى. مەن قازاقستان مەن قىتاي اراسىنداعى دوستىق قارىم- قاتىناستىڭ ودان ءارى دامي تۇسەتىندىگىنە سەنەمىن»، - دەدى ۆ. سزيچۋن.
سىچۋان پروۆينتسياسىنىڭ تۋريزمدى دامىتۋ كوميتەتى ۇيىمداستىرىپ وتىرعان بۇگىنگى شاراعا قىتاي كوممۋنيستىك پارتياسىنىڭ وكىلدەرى، الماتى قالاسى تۋريزم جانە سىرتقى بايلانىسى باسقارماسىنىڭ وكىلدەرى، قىتايلىق جانە قازاقستاندىق تۋريستىك كومپانيالاردىڭ باسشىلارى قاتىستى.
شارانى ۇيىمداستىرۋداعى باستى ماقسات - قازاقستاندىقتاردى نەگىزىنەن سىچۋان، سونداي- اق حۋبىي جانە حىنان پروۆينتسيالارىمەن دە تانىستىرۋ.
اۆتور: ايبوتا جاپپاربەرگەن