قازاقستاندا ءدارى جەتكىزۋشىلەرگە قاتاڭ شارا قولدانىلادى

بۇل تۋرالى جۇمىس ساپارىمەن تارازعا كەلگەن «س ك- فارماتسيا» ج ش س ءتوراعاسى نۇرجان الىمبايەۆ حابارلادى.
«شارتتىق مىندەتتەمەنى دۇرىس ورىنداماعان، دارىلىك زاتتار مەن مەديتسينالىق ماقساتتاعى بۇيىمداردى جەتكىزۋدى كەشىكتىرەتىن 16 جەتكىزۋشىگە قاتىستى «س ك- فارماتسيا» ج ش س سوتقا ولاردى جوسىقسىز جەتكىزۋشى دەپ تانۋ تۋرالى تالاپ ارىز بەردى. 2016 -جىلدان باستاپ ءبىرىڭعاي ديستريبيۋتورلار جەتكىزۋشىلەرگە قاتاڭ شارا قولدانادى»، - دەدى ول.
قازىرگى ساتتە سوت ەكى جەتكىزۋشىنى جوسىقسىز دەپ تانىدى.
ەسكە سالساق، قازاقستاندا ءبىرىڭعاي ديستريبيۋتور جۇيەسى 2009 -جىلى قۇرىلعان. ولار تمككك اياسىندا حالىقتى دارىمەن قامتاماسىز ەتەدى، فارماتسيەۆتيكالىق سالادا ورنىقتىلىق پەن باسەكەگە قابىلەتتىلىكتى ارتتىرادى، دارىلىك زاتتاردى مەملەكەتتىك ساتىپ الۋدى شوعىرلاندىرۋ ارقىلى فارماتسيەۆتيكالىق ونەركاسىپتى دامىتادى. «س ك- فارماتسيا» قىزمەتىنىڭ ارقاسىندا ءدارىنى جۇيەلى ساتىپ الۋ ەنگىزىلدى. بۇل بيۋدجەت قاراجاتىن ەلەۋلى ۇنەمدەۋگە الىپ كەلدى. «س ك- فارماتسيا» يەلەنۋ قۇقىعى مەن ءجۇز پايىزدىق قاتىسۋ ۇلەسى ق ر دەنساۋلىق مينيسترلىگىنە بەرىلدى.