دميتري بالاندين: ارمانىم - وليمپيادا ويىندارىندا مەدالعا تالاساتىن ەستافەتا كومانداسىن جيناۋ - فوتو
بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى جانە ق ر ۇلتتىق وليمپيادا كوميتەتىنىڭ ءتوراعاسى تيمۋر قۇلىبايەۆتىڭ وليمپيادا جۇلدەگەرلەرىمەن كەزدەسۋدەن سوڭ جۋرناليستەرگە بەرگەن سۇحباتىندا وليمپيادا جەڭىمپازى جۋرناليستەرگە وسىلايشا اعىنان جارىلدى.
«ءساۋىر ايىندا مەن وليمپيادادا جەڭە الامىن دەگەن سەنىمدە بولدىم. ويتكەنى، سوڭعى باقىلاۋ جارىستارىندا مەن جاقسى ناتيجەلەر كورسەتىپ ءجۇردىم. بۇنداي سەنىمدىلىك باستاپقى كەزدە بولدى. الايدا، وكىنىشكە قاراي، كەيىننەن وزىمە دەگەن سەنىمىم جوعالا باستادى. ويتكەنى، مارەدەن- مارەگە ارەڭ جەتىپ ءجۇردىم، ەش ناتيجە كورسەتە الماعان ەدىم. ەموتسيالىق كوڭىل كۇي قاتتى اسەر ەتەدى نەگىزى. دەگەنمەن، وليمپيادا ويىندارىنىڭ اقتىق ايقاسىنا شىققاندا قوسىمشا كۇش پايدا بولادى. بۇكىل اعزاڭدى سوعان دايىندايسىڭ. وسىلايشا، قاتارداعى جارىستارعا قاراعاندا ءوزىڭنىڭ بار كۇشىڭدى سالىپ، ناتيجە كورسەتۋگە ۇمتىلاسىڭ»، - دەپ اڭگىمەلەدى دميتري بالاندين جۋرناليستەر ساۋالىنا جاۋاپ بەرە كەلە.
سونىمەن قاتار، ول ءوزىنىڭ اتىن كورسەتكىش تاقتادان كورگەندە چەمپيون ەكەنىنە بىردەن تۇسىنبەگەنىن ەسكە الدى.
«جەڭىستەن كەيىنگى اسەر كەرەمەت، ونى تىلمەن ايتىپ جەتكىزۋ مۇمكىن ەمەس. مەن ءتىپتى، ءبىزدىڭ قازاقستاندىق سۋدا ءجۇزۋ سپورتى تاريحىنداعى «التىن» العان تۇڭعىش سپورتشى ەكەنىمە ءالى دە سەنبەيتىن ءتارىزدىمىن. بۇل ءسوزسىز جانىڭا جايلىلىق سىيلايتىن سەزىم»، - دەدى دميتري بالاندين.
الداعى جوسپارلارىنا توقتالعان ول، قازاقستاندىق جانكۇيەرلەردى ءالى دە قۋانتا تۇسۋگە اسىق ەكەنىن جاسىرمادى. «توكيوداعى 2020 -جىلى وتەتىن وليمپياداعا دا بارعىم كەلەدى. ارينە، بارىپ قانا قويماي، حالقىمدى قۋانتسام دەيمىن»، - دەدى ول.
«مەنىڭ ارمانىم - ازيا چەمپيوناتتارىندا، وليمپيادا ويىندارىندا مەدال ءۇشىن كۇرەسەتىن ەستافەتا كومانداسىن جيناۋ. قازاقستاندا سۋدا ءجۇزۋ سپورتى بارىنشا دامىپ، جاس بالالار سپورتتىڭ وسىناۋ تاماشا تۇرىنە كوپتەپ كەلسە ەكەن. مەنىڭ ويىمشا، وسىلاي بولسا، قازاقستان ءالى دە تالاي التىن الادى، مەدالدان ەش كەندە بولمايمىز»، - دەدى بالاندين.
اۆتور: قانات مامەتقازى ۇلى
