كارىم ءماسىموۆ ۇلىتاۋداعى تاريحي جەرلەردى ارالادى

استانا. قازاقپارات - ق ر پرەمەر- ءمينيسترى كارىم ءماسىموۆ قاراعاندى وبلىسىنداعى ءبىرقاتار تاريحي جەرلەردى ارالادى.

ۇكىمەت باسشىسى ينستاگرامداعى پاراقشاسىندا الاشا حان مەن جوشى حان كەسەنەسىنىڭ، التىنشوقى، ءامىر تەمىر تاسىنىڭ، سونىمەن قاتار ۇلىتاۋدىڭ سۋرەتتەرىن جاريالاعان.

ەسكە سالا كەتەيىك، كەشە مادەنيەت جانە سپورت ءمينيسترى ارىستانبەك مۇحامەدي ۇلى پرەمەر- مينيسترگە تاريحي- مادەني مۇرالاردى ساقتاۋ جانە سونىڭ نەگىزىندە ۇلىتاۋدىڭ تۋريستىك الەۋەتىن دامىتۋ جونىندەگى جۇمىستار تۋرالى بايانداعان بولاتىن. وسىعان بايلانىستى ۇكىمەت باسشىسى اتالعان سالا بويىنشا بارلىق كوتەرىلگەن ماسەلەلەردى جيناقتاپ، ول بويىنشا ۇكىمەتتە ارنايى كەڭەس وتكىزۋگە دايىنداۋدى تاپسىردى.

 ايتا كەتەرلىگى،  ۇلىتاۋ - مىڭداعان جىلدار بويى اتا- بابالارىمىزدىڭ ارمانىن اسقاقتاتقان كيەلى ورىن. ونداعى ءاربىر تاۋ مەن تاستىڭ ءوزى قازاق حالقىنىڭ تاريح- تامىرىنان تەرەڭ سىر شەرتەتىن، ەلدىگىمىزدىڭ ايتۋلى كەزەڭدەرىنىڭ كۋاگەرى سانالادى. ونداعى حان ورداسىندا قازاقتىڭ بىرنەشە حانى تاقتا وتىرعان. تولە بي، قازىبەك بي، ايتەكە بي باستاعان يگى جاقسىلار ابىلايدى وسى وردادا اق كيىزگە كوتەرىپ، حان سايلاعان. ال 1993 -جىلى تاۋەلسىز قازاقستان رەسپۋبليكاسىنىڭ پرەزيدەنتى ن. ءا. نازاربايەۆقا وسى حان ورداسىندا قۇرمەت كورسەتىلگەن. جالپى  ۇلىتاۋ ءوڭىرى تاريحي ەسكەرتكىشتەرگە تولى.

اۆتور: قانات مامەتقازى ۇلى