قازاق بالۋانى ريو وليمپياداسىندا اۆستراليانىڭ نامىسىن قورعادى

استانا. قازاقپارات- وزبەكستاندا تۋعان ەتنيكالىق قازاق تالعات ءىلياسوۆ وليمپياداعا اۆستراليا اتىنان قاتىستى. بالۋانعا ريوعا باراتىن قارجىنى مەملەكەت ەمەس، جانكۇيەرلەر جيناپ بەرگەن. قازاقستاندى ءالى كورمەگەن سپورتشى وسى ەلدەگى تۋىستارىنا كەلىپ قايتپاق.
None
None

 بۇل تۋرالى «ازاتتىق» سايتى حابارلايدى.

ريو وليمپياداسىندا ەركىن كۇرەستەن 74 كيلوگرام سالماق بويىنشا بەلدەسكەن تالعات ءىلياسوۆ جۇلدەلى ورىنعا جەتە المادى. العاشقى كەزدەسۋىندە جاپونيالىق سوسۋكە تاكاتانيمەن كۇرەسىپ جاتقاندا شىنتاعىن جاراقاتتاپ، جارىستى اياقتاۋعا ءماجبۇر بولدى.

35 جاستاعى تالعات ءىلياسوۆ وزبەكستاندا، عازالكەنت قالاسىندا تۋعان. اتا- اناسى - ەتنيكالىق قازاقتار. اكەسى قالدار قازىر تاشكەنتتە تۇرادى. ال اناسى 2005 -جىلى قايتىس بولعان. ەكى قارىنداسى دا تۇرمىسقا شىققان، قازاقستاندا تۇرادى.

تالعات ءىلياسوۆ 1995 -جىلدان باستاپ ەركىن كۇرەستەن وزبەكستان جاسوسپىرىمدەر قۇراماسى ساپىندا كۇرەسكەن. 1997 -جىلى جاسوسپىرىمدەر اراسىندا وتكەن الەم چەمپيوناتىندا قولا مەدال الادى. 1999 -جىلى اۆستراليادا وتكەن جاستار اراسىنداعى الەم چەمپيوناتىندا 4-ورىن يەلەنەدى. ءبىراق وسى جارىستان كەيىن ول وزبەكستان ەرەسەكتەر قۇراماسىنا ەنە الماي قالعان.

- اۆستراليادا وتكەن جاستار اراسىنداعى الەم چەمپيوناتىندا جەرگىلىكتى بالۋاندى تازا جەڭدىم. كەيىن اۆستراليا جاستار قۇراماسىنىڭ باپكەرى وسى ەلدىڭ قۇراماسىنا شاقىردى. ەكى ايعا جاتتىعۋعا كەلدىم. ۆيزا، جول شىعىنىن وزدەرى تولەدى. ال 2000 -جىلى مەلبۋرن قالاسىنا كوشتىم. وزبەكستاندا ماعان مۇمكىندىك بولمايتىنىن سەزدىم. سەبەبى مەنىڭ سالماعىمدا وزبەكستان قۇراماسىنا وسەتيادان بالۋان كەلگەن ەدى، - دەيدى ول.

سپورتشىنىڭ ايتۋىنشا، اۆستراليادا ءومىر ءسۇرۋ ساپاسى جوعارى، ءبىراق قازاقستان نە وزبەكستاندا سپورتشى رەتىندە پايدا تابۋعا مۇمكىندىك مول.

- قازاقستان مەن وزبەكستاندا سپورتشىعا جاعداي جاسالعان. شىعىنىن مەملەكەت كوتەرەدى، اي سايىن اقشا الىپ تۇرادى. ال اۆستراليادا سپورت اۋەسقوي دەڭگەيدە. ءوزىڭ ءۇشىن اينالىساسىڭ. ءبىز الدىمەن كۇنى بويى جۇمىس جاسايمىز، جاتتىعۋ زالىنا جۇمىستان كەيىن بارامىز. جاتتىعۋ زالدارى اقىلى، ءبىراق اسا قىمبات ەمەس. بالالاردى جاتتىقتىرامىن. سوندىقتان ماعان جاتتىعۋ تەگىن. وليمپيادادا مەدال العان اۆستراليا سپورتشىلارىنا مەملەكەت سىياقى بەرمەيدى. ولار ەلگە بارعان سوڭ جارناماعا ءتۇسىپ كوممەرتسيالىق جولمەن اقشا تابادى، - دەيدى بالۋان.

تالعات ءىلياسوۆ 2004 - جىلى اۆستراليا قۇراماسىنىڭ مۇشەسى رەتىندە افينا وليمپياداسىنا جولداما الادى. ءبىراق وليمپيادا باستالۋعا بىرنەشە اي قالعاندا بەلىن جاراقاتتاپ الىپ، جارىسقا بارا الماي قالادى.

- اۆسترالياعا بارىپ، قولىمدى ەمدەتەمىن. ۇيلەنۋىم كەرەك، ۋاقىت كەلدى. ازىرگە قالىڭدىعىم جوق. كورەرمىز، اۆستراليادا قالا بەرەتىن شىعارمىن. وندا كوبىنە قۇرىلىستا جۇمىس جاسايمىن. بالالاردى دا جاتتىقتىرامىن. بۇل ەلدە كۇرەس اسا قاتتى دامىماعان. سونىڭ دامۋىنا ۇلەس قوسقىم كەلەدى. ريو وليمپياداسىنا مەنىمەن بىرگە تاعى ءبىر بالۋان قاتىسىپ، جەڭىلىپ قالدى. ول اۆسترالياعا البانيادان كەلگەن. - دەيدى تالعات.

تالعات ءىلياسوۆ قازاقستاندا بولماعانىن ايتادى. ول بيىل وزبەكستان مەن قازاقستانعا بارىپ، تۋىسقاندارىمەن جولىعىپ قايتۋدى دا جوسپارلاپ وتىر.


Қазақ балуаны Рио Олимпиадасында Австралияның намысын қорғады (фото)

سوڭعى جاڭالىقتار