قازاقستاندىق مۋزىكانتتار بەرلين حالقىن تامساندىردى

مەرەكەلىك كونسەرتكە مىڭنان استام قوناق جينالدى، ولاردىڭ اراسىندا فەدەرالدىق بيلىك وكىلدەرى مەن بۋندەستاگ دەپۋتاتتارى، بەرليننىڭ جەرگىلىكتى بيلىك جەتەكشىلەرى، گ ف ر قوعام جانە ساياسات قايراتكەرلەرى، ديپلوماتيالىق كورپۋس وكىلدەرى، گەرمانيانىڭ ساراپشى، زيالى قاۋىمى بار.
گەرمانياداعى ق ر ەلشىسى بولات ءنۇسىپوۆ ءوزىنىڭ كىرىسپە ءسوزىن قازاقستان تاۋەلسىزدىگىنىڭ 25 جىلدىعىنا ارنادى، وندا ەلىمىزدىڭ تاۋەلسىزدىك جىلدارى قول جەتكىزگەن قوعامدىق دامۋ، الەۋمەتتىك- ەكونوميكالىق جەتىستىكتەرىن اتاپ ءوتتى جانە قازاقستان- گەرمانيا ىنتىماقتاستىعىنىڭ نەگىزگى كەزەڭدەرىنە توقتالدى.
كلاسسيكالىق مۋزىكا بىلگىرلەرى وركەستر جوعارى دەڭگەيدە ورىنداعان ا. حاچاتۋريان، ف. شۋبەرت، ا. قازاقبايەۆ، ا. رايىمقۇلوۆا، ر. ءابدىساعين سەكىلدى كومپوزيتورلاردىڭ تۋىندىلارىن وڭ باعالادى جانە كەزەكتى رەت قازاقستانداعى كلاسسيكالىق مۋزىكا مەكتەبى وكىلدەرىنىڭ شەبەرلىگىنە ءتانتى بولدى.
جىل سايىن بەرليندە وتەتىن «Young Euro Classiс» ۇزدىك سيمفونيالىق جاستار وركەسترىنىڭ فەستيۆالى بيىل 17 - تامىز-3 - قىركۇيەك ارالىعىندا وتۋدە، وعان دۇنيە جۇزىنەن مىڭ جارىمعا جۋىق مۋزىكانت قاتىسىپ وتىر.
كوپتەگەن مۋزىكا سىنشىلارى الەمگە تانىمال ونەر قايراتكەرى ايمان مۇساقوجايەۆا باسقارعان قازاق ۇلتتىق ونەر ۋنيۆەرسيتەتىنىڭ فەستيۆالدە ونەر كورسەتۋىن سونى جاڭالىققا بالاپ وتىر.