رەسەي، گەرمانيا جانە فرانسيا باسشىلارى دونباستاعى جاعدايدى تالقىلايدى

ۋكراينا شىعىسىندا سوڭعى كەزدە ۇكىمەت اسكەرى مەن رەسەيشىل سەپاراتيستەر اراسىنداعى قاقتىعىستىڭ قايتادان تۇتاۋ قاۋپى مەن قىرىمداعى احۋالدىڭ شيەلەنىسە باستاۋى 2015 -جىلى اقپاندا مينسكىدە جاسالعان ءالسىز كەلىسىمدى كۇيرەتۋى مۇمكىن دەگەن الاڭداۋشىلىقتى كۇشەيتكەن.
كرەملدىڭ مالىمدەۋىنشە، رەسەي پرەزيدەنتى ۆلاديمير پۋتين 23 - تامىزدا گەرمانيا كانسلەرى انگەلا مەركەلمەن جانە فرانسيا پرەزيدەنتى فرانسۋا وللاندپەن تەلەفونمەن سويلەسىپ، ۋكراينا شىعىسىنداعى احۋالدى تالقىلاعان. ءۇش ەل باسشىسى قىتايدا 4-5 - قىركۇيەكتە G-20 سامميتى اياسىندا كەزدەسۋگە كەلىسكەن.
گەرمانيا ۇكىمەتىنىڭ باسپا ءسوز حاتشىسى ءۇش ەل باسشىسى ۋكراينا شىعىسىنداعى ءبىتىمنىڭ بۇزىلۋىن تالقىلاعانىن، مەركەل مەن وللاندتىڭ پۋتيندى جاعدايدى قالىپقا ءتۇسىرۋدىڭ قولدان كەلەتىن امالىن جاساۋعا شاقىرعانىن ايتتى.
پۋتين وسى ايدىڭ باسىندا كييەۆتى قىرىمدا «ىرىتكى سالۋ ارەكەتتەرىن» جاساماق بولدى دەپ ايىپتاعان. ۋكراينا پرەزيدەنتى پەتر پوروشەنكو مۇنى جوققا شىعارىپ، بۇل ايىپ رەسەيدىڭ ۋكرايناعا «كەڭ كولەمدى» باسقىنشىلىق جاساۋىنا» ىلىك بولۋى مۇمكىن ەكەنىن مالىمدەگەن.
«ازاتتىق» جاڭالىقتارى