قاراكەرەي قابانبايدىڭ قولتىرماشى الاكول جاعاسىنداعى قارابۇلاق اۋىلىندا ساقتالىپ كەلەدى
ولاردى شەجىرەمەن ءجون سۇراسقاندا قوجاقۇل ەلى دەپ اتايدى. قوجاقۇل - «حان باتىر»، «دارابوز» اتانعان ايگىلى قاراكەرەي قابانباي باتىردىڭ اكەسى، دەپ جازادى «ەگەمەن قازاقستان» گازەتى بۇگىنگى سانىندا.
مىنە، وسى قابانبايدان تاراعان ۇرپاقتىڭ قولىندا قاس باتىردىڭ تۇتىنعان زاتتارى ءالى كۇنگە دەيىن قاستەرلى دۇنيە رەتىندە ساقتالىپ كەلەدى. ماسەلەن، قارابۇلاق اۋىلىنىڭ تۇرعىنى، مال دارىگەرى بولىپ ەڭبەك ەتەتىن جۇماي جىنسانوۆتىڭ شاڭىراعىندا باتىر بابانىڭ قولتىرماشى ساقتالعان ەكەن. جۇمايدى اۋىلداستارى «ورماش» دەپ تانيدى. ورماشتىڭ اكەسى مۇحامەتقاليدىڭ، اناسى ماناردىڭ دا رۋى - قوجاقۇل. ونىڭ ىشىندە قابانبايدىڭ كىشكەنتاي سىرىمبەت دەگەن بۇتاعىنان تارايدى.
جۋىردا باتىر بابانىڭ قولتىرماشىن كورۋدىڭ ءساتى ءتۇستى. ءۇي يەسى اق باتەستەن تىگىلگەن قالتاعا تاسپيقپەن بىرگە سالىنعان جادىگەردى كەبەجە ساندىقتان الىپ شىقتى. ماپەلەگەن جادىگەردەن اتادان بالاعا مۇراعا قالىپ كەلە جاتقان قاستەرلى دۇنيە ەكەنىن بايقايسىز. ءبىز دە قاس باتىردىڭ ۇلى دەنەسىن قورعاعان قولتىرماشتى ايالاي ۇستاپ، اينالدىرا قارادىق. توڭكەرگەندە ورتاسى ءسال شۇڭعىلداۋ، سىرتىنان دوڭەستەۋ بولىپ كەلەتىن دوڭگەلەك تاباق ىسپەتتى ەكەن. بولاتتان قۇيىلعان قولتىرماشتىڭ ءبىر جاق شەتى ايدىڭ قيىعى سياقتى كەرتىلىپ جاسالعان. شاماسى، شەبەر ات ۇستىندەگى ۇزاق جورىقتا قولتىقتى قاجاماۋ جاعىن ەسكەرگەن سەكىلدى. ساۋىتقا بەرىك جىپپەن بەكىتۋ ءۇشىن قولتىرماشتى جاعالاي ون ەكى تەسىك ءتۇسىپتى.
- بۇل قولتىرماش قابانباي اتامىزدىڭ جورىققا كيگەن ساۋىت- سايمانىنىڭ ءبىر بولىگى. قولتىعىنىڭ استىنان كيىلەتىندىكتەن «قولتىرماش» اتالعان. اكەمىزدەن ەستۋىمىزشە، قارسى كەلگەن جاۋدىڭ سىلتەگەن نايزاسىن تايدىرۋ، قابىرعا مەن قولتىقتىڭ استىن جاۋ جاراعىنان قورعاۋ ماقساتىندا جاسالعان. مۇنى اكەم مۇحامەتقالي جىنسا اتاسىنان الىپ قالعان ەكەن. جىنساعا كوكسەگەن، يتجان، شوڭمۇرىن، پۇشىق، مونتىش دەپ جالعاساتىن ارعى بابالارىمىزدان جەتكەن. قابانباي اتامىز قايتىس بولعاندا ساۋىت- سايمانى مەن ۇستاعان دۇنيەسىن جاقىن اعايىندارى ءبولىپ الىپتى. ءبىزدىڭ اتالارىمىزعا وسى قولتىرماش تيگەن. بالا كۇنىمدە ۇلكەندەردىڭ ۇيگە وسى قولتىرماشتى ىزدەپ كەلەتىنى ەسىمدە. ويتكەنى، ەل ىشىندەگى شوشىنعان، قىزىپ اۋىرعان، كوزىنە اق تۇسكەن نەمەسە بالا كوتەرمەگەن كىسىلەر قولتىرماشتى باسىنا جاستاپ ۇيىقتاسا، دەرتىنە شيپا تاۋىپ جاتاتىن. بۇگىندە ۇلكەندەردىڭ قاتارى سيرەدى. كەيىنگى جاستار باتىر بابامىزدىڭ بۇل قاسيەتتى دۇنيەسىن بىلە بەرمەيدى، - دەيدى ورماش مۇحامەتقالي ۇلى.
قولتىرماشتى وسىدان ءبىر- ەكى جىل بۇرىن استاناداعى قابانباي باتىر كەسەنەسىنە سۇراعان ەكەن. الايدا ۇرپاقتارى بابادان قالعان ميراس رەتىندە ءوز اۋلەتتەرىندە ساقتاعاندى ءجون كورىپتى. سوڭعى جىلدارى قاراكەرەي قابانباي باتىردىڭ دۋلىعاسى الماتى وبلىسىنىڭ ءۇشارال اۋدانىنان، دارەت العان شىلاپشىنى قىتايدان تابىلعان بولاتىن. باتىر بابادان قالعان اسىل مۇرا قاتارى وسىلايشا تولىعىپ كەلەدى.
