اپاتقا ۇشىراعان لەكسۋس كولىگىنىڭ يەسى: كولىگىمدى اۆتوجۋۋ جۇمىسكەرى ۇرلاپ كەتكەن

الماتى. قازاقپارات- الماتىدا اپاتقا ۇشىراپ، قيراعان Lexus ماركالى اۆتوكولىگىنىڭ يەسى انەل بايمەنوۆا ۇستىمىزدەگى جىلى 13 -شىلدەدە بولعان وقيعانىڭ ءمان- جايىن ايتىپ بەردى.
None
None

انەلدىڭ ايتۋىنشا، ونىڭ اۆتوكولىگىن اۆتوجۋۋ مەكەمەسىندە بەيرەسمي تۇردە جۇمىس ىستەپ جۇرگەن 17 جاستاعى جىگىت ايداپ اكەتكەن. انەل اۆتوكولىگىن وسى اۆتوجۋۋ مەكەمەسىنە ۋاقىتشا قالدىرىپ كەتكەن ەكەن.

ال جاس جىگىت، ايداپ اكەتكەن اۆتوكولىكپەن قالانى ارالاماق بولعان.

ءبىراق، رولگە يە بولا الماي، ۇلكەن جىلدامدىقپەن كەلىپ، اعاشقا سوعىلعان.

«ول وسى مەكەمەدە جاز مەزگىلىندە كولىك جۋىپ اقشا تاۋىپ جۇرگەن. مۇندا ونىڭ نەمەرە اپكەسى اسپازشى بولىپ جۇمىس ىستەيدى. اپات بولعاننان كەيىن، جىگىتتىڭ تۋعان- تۋىستارى ماعان حابارلاسىپ، «ول ءالى جاس، ءومىرىن اياق- استى ەتپە»، - دەپ، پوليتسياعا ارىز بەرمەۋىمدى، ونى كەشىرۋىمدى ءوتىندى. مۇنىڭ بارلىعى مەنىڭ جاعامدى ۇستاتتى. بۇعان دەيىن بۇل كولىك جۋاتىن مەكەمەدە وسىعان ۇقساس ەكى وقيعا بولعان. ءبىراق، بۇل تۋرالى اشىق ايتىلماعان. ەگەر مەن مۇنداي سوراقىلىقتى بىلگەنىمدە بۇل اۆتوكولىك جۋاتىن جەرگە ەشقاشاندا بارماس ەدىم.

 بۇل مەكەمە ەكى رەت سوتتا جەڭىپ شىققان. مەن ولارعا سوتقا بەرەتىندىگىمدى ايتىپ ەدىم، ولار ماعان: «بەكەرگە اۋرە بولاسىز. سىزگە دەيىنگى ارىزدانعانداردىڭ كولىكتەرى ءسىزدىڭ كولىگىڭىزدەن الدەقايدا قىمبات بولعان»، - دەپ ماقتاندى.

 جىگىتتىڭ تۋىستارى ء«بىر تيىن اقشامىز» جوق دەپ، ەشتەڭە تولگىلەرى كەلمەيدى. اكەسى تەك قانا كەشىرىم سۇرادى. مەن اۋداندىق ىشكى ىستەر باسقارماسىنا جۇگىندىم. بۇل ءىستى قاراپ جاتقان جىگىت ماعان: «ءسىز قىز بالاسىز عوي. ونى قالاي 8 جىلعا سوتتاتتىرىپ جىبەرەسىز!؟ كەيىن، قالاي ءومىر سۇرەسىز؟»، - دەپ ماعان قىسىم جاسادى. بۇل جەردە جابىرلەنۋشى مەن عوي. 1,5 جارىم اي ءوتتى. ولار ماعان بىردە-ءبىر اقپارات بەرگەن جوق. مەن ءتىپتى سوتقا دا جۇگىنە المايمىن. ايتاتىندارى: «كۇتە تۇرىڭىز، كۇتە تۇرىڭىز، تەرگەپ جاتىرمىز». قاشان اقپارات بەرەتىندەرى بەلگىسىز»، - دەدى انەل بايمەنوۆا.

ءوز كەزەگىندە «التىن ادام» كەشەنىنىڭ اكىمشىلىگى اۆتوكولىكتى ايداپ كەتكەن جىگىتتىڭ ماشينا جۋۋشى بولىپ ىستەيتىندىگىن جوققا شىعاردى.

«بارلىعى باسقاشا بولعان. 13 -شىلدەدە وسى بويجەتكەن نەمەسە ونىڭ جىگىتى ماشينانى كىلتىمەن بىرگە قالدىرىپ كەتكەن. ءبىز ولارعا اۆتوكولىكتى جۋىپ، اۆتوتۇراققا قوياتىنىمىزدى، ال وندا كۇزەتتىڭ جوق ەكەندىگىن ايتتىق. ولار: «جارايدى»، - دەپ كەتىپ قالدى.

ءبىز كىلتتى سەيفكە تىعىپ قويدىق. ءبىراق، بىزدە كوزگە كورىنەتىن جەرگە «اۆتوكولىكتىڭ كىلتىن قالدىرۋعا بولمايدى»، - دەپ جازىلىپ قويىلعان.

ال تاڭعى ساعات 4.00 شاماسىندا الگى جىگىت ءبىزدىڭ مەكەمەگە ۇرلانىپ كىرىپ، سەيفتى بۇزىپ اشىپ، كىلتتى الىپ، ماشينانى ۇرلاپ اكەتكەن.

ال بۇل بويجەتكەن، كەيىن بىزگە كەلىپ داۋ شىعاردى. ءبىز ول جىگىتتىڭ بىزدە ىستەمەيتىنىن ايتتىق.

بويجەتكەن بىزگە نارازىلىعى جوق ەكەندىگىن ايتتى. الگى جىگىتتىڭ تۋىسى كەلىپ، كەلتىرىلگەن شىعىندى تولەيتىندىگىن ايتىپ، ءتىلحات جازىپ كەتتى.

ال قازىر، نەگە ەكەنى بەلگىسىز، بويجەتكەن وسى ماسەلەنى تاعى دا كوتەرىپ، ءبىز تۋرالى جازىپ جاتىر. ءبىز ءتىپتى زاڭگەردەن اقىل-كەڭەس سۇرادىق. ول ءبىزدىڭ بۇعان قاتىسىمىز جوق، كىنالى ەمەس ەكەنىمىزدى ايتتى»، - دەپ اقتالدى «التىن ادام» كەشەنىنىڭ اكىمشىلىگى.

اۆتور: ايبوتا جاپپاربەرگەن

  

سوڭعى جاڭالىقتار