پولشا كاسپيدەگى قازاقستاندىق پورتتى پايدالانا الادى - نۇرسۇلتان نازاربايەۆ

«قازاقستان ءبىز ايتقان پولشالىق تەڭىز پورتتارى جانە تەرمينالدارىن پايدالانۋعا دايىن. سونداي- اق، پولشانىڭ دا كاسپي تەڭىزىندەگى قازاقستاندىق پورتتاردى پايدالانۋىنا مۇمكىندىگى بار»، - دەپ اتاپ ءوتتى ەلباسى.
«بۇگىن مەن پرەزيدەنت مىرزاعا ىنتىماقتاستىقتىڭ جانە ەكسپورتتىڭ مۇمكىندىگى جايلى ايتتىم. ءبىزدىڭ گدانسكىدەگى پورت قازاقستان مۇنايىن قابىلداۋعا دايىن»، - دەدى ءوز كەزەگىندە اندجەي دۋدا.
مەملەكەت باسشىسى سونداي- اق اۋىل شارۋاشىلىعى سالاسىندا ىقپالداستىقتىڭ مۇمكىندىكتەرىنە توقتالدى. «بىزدە اۋىل شارۋاشىلىعىن دامىتۋدىڭ ۇلكەن الەۋەتى بار. پولشا - اۋىلشارۋاشىلىق ونىمدەرىن ساپالى وڭدەۋمەن شۇعىلداناتىن ەلدەردىڭ ءبىرى. بۇل بىزگە قاجەت. قازاقستاندا 220 ميلليون گەكتار اۋىل شارۋاشىلىعى جەرى بار. ونىڭ 25 ميلليونى ەگىن ەگۋگە پايدالانىلادى. بۇل ونىمدەردىڭ بارلىعىن وڭدەۋ قاجەت»، - دەپ ءتۇسىندىردى پرەزيدەنت.
«قورىتا ايتقاندا»، - دەدى نۇرسۇلتان نازاربايەۆ، «قازاقستاندا جانە پولشادا ءار سالادا ىنتىماقتاستىقتى جولعا قويۋعا الەۋەت جەتەرلىك».
ەلباسىنىڭ ايتۋىنشا، بۇگىن پرەزيدەنت پولشا پرەمەر- ءمينيسترى بەاتە شىدلومەن دە ەكىجاقتى قارىم- قاتىناستىڭ ناقتى ماسەلەلەرىن تالقىلايدى.
«مەنىڭ پولشاعا ساپارىم ءبىزدىڭ ەلدەرىمىز ءۇشىن تابىستى بولاتىندىعىنا سەنەمىن»، - دەپ ءسوزىن قورىتتى نۇرسۇلتان نازاربايەۆ.
پولشا پرەزيدەنتى اندجەي دۋدا قازاقستاندا تۇرىپ جاتقان پولياكتارعا قولداۋ كورسەتكەنى ءۇشىن مەملەكەت باسشىسى نۇرسۇلتان نازاربايەۆقا العىس ءبىلدىردى.
اندجەي دۋدا كولىك ينفراقۇرىلىمىن دامىتۋ باعىتىنداعى قازاقستان بيلىگىنىڭ اتقارىپ جاتقان جۇمىسىن جوعارى باعالاپ، نۇرسۇلتان نازاربايەۆتى وسى سالادا ىنتىماقتاستىققا شاقىردى. ونىڭ ايتۋىنشا، ەكى جاققا دا ءتيىمدى تاۋار ەكسپورتى اينالىمىن ۇلعايتۋ ءۇشىن تەڭىز جانە قۇرعاقتاعى جولداردى پايدالانۋعا مۇمكىندىك مول. پولشا كوشباسشىسى سونداي- اق قازاقستان ەكونوميكاسىنا جەرگىلىكتى بيزنەسمەندەردىڭ قارجى سالۋىنا تىلەك ءبىلدىرىپ وتىرعانىن اتاپ ءوتتى.
بۇدان باسقا، اندجەي دۋدا استانا مەن ۆارشاۆا اراسىندا تىكەلەي اۋە بايلانىسىن اشۋ تۋرالى كەلىسسوز جايلى حاباردار ەتتى.
«قازىردىڭ وزىندە «لوت» اۋە كومپانياسىمەن كەلىسسوز جۇرگىزىلۋدە. استاناداعى ەكسپو-2017 كورمەسىنىڭ اشىلۋىنا دەيىن تۇراقتى تىكەلەي بايلانىس اشىلادى دەپ سەنەمىن»، - دەپ اتاپ ءوتتى ول.
سونداي- اق ول نۇرسۇلتان نازاربايەۆقا جەكەلەي قازاقستانداعى پولياك دياسپوراسىن قولداعانى ءۇشىن العىس ايتتى. ونىڭ ايتۋىنشا، ءبىلىم سالاسىنداعى 2015 -جىلى جاسالعان ۇكىمەتارالىق كەلىسىم جۇزەگە اسىرىلا باستادى.
«بۇل كەلىسىم اعىمداعى جىلدىڭ ساۋىرىندە ءوز كۇشىنە ەندى. سونىمەن بىرگە قازاقستاندا تۋعان پولياك بالالارىنىڭ پولياك ءتىلىن ۇيرەنۋىن دامىتۋعا ءوز ۇلەسىن قوساتىندىعىنا سەنەمىن. سىزگە ولارعا دەگەن قامقورلىعىڭىز ءۇشىن ۇلكەن راحمەت! ءسىزدىڭ وسى ساپارىڭىزعا وتە قۋانىشتىمىن»، - دەپ قورىتتى اندجەي دۋدا.