دميتري بالانديننىڭ وقىتۋشىسى ونىڭ ساباق ۇلگەرىمى جايىندا اڭگىمە ءوربىتتى

دميتري - ءال-فارابي اتىنداعى قازاق ۇلتتىق ۋنيۆەرسيتەتىنىڭ 3- كۋرس ستۋدەنتى. اندرەي حوحلوۆ ونى مەكتەپ وقۋشىسى كەزىنەن بىلەتىن بولىپ شىقتى.
«ديمامەن 3- سىنىپتا وقىپ جۇرگەن كەزدەن باستاپ اينالىسا باستادىم. ول ادال نيەتتى، ءوز ىسىنە جاۋاپكەرشىلىكپەن قارايتىن شاكىرت ەكەندىگىن كورسەتتى. ەشقاشان قيىندىقتان قاشقان ەمەس. تاپسىرمالاردىڭ بارلىعىن بۇلجىتپاي ورىندايتىن. بىلمەگەن جەرىن قىسىلماي سۇرايتىن. كەيىن ول سپورتتاعى دارىندى بالالارعا ارنالعان مەكتەپ- ينتەرناتتا ءبىلىم الدى. وندا باسقا جاتتىقتىرۋشىلاردىڭ قول استىندا جاتتىقتى. مەكتەپتەن كەيىن ءال-فارابي اتىنداعى قازاق ۇلتتىق ۋنيۆەرسيتەتىنە ءتۇستى. بارلىق جاتتىعۋلار دەنە شىنىقتىرۋ ينستيتۋتىنىڭ بازاسىندا ءجۇردى. ستۋدەنتتەر سوندا بارىپ، جاتتىعاتىن. ارينە، جارىستارعا بايلانىستى ديمانىڭ ساباققا كەلە الماي قالىپ جۇرگەن كەزدەرى بولدى. ءبىراق، تاپسىرمالاردى مىندەتتى تۇردە الىپ ءجۇردى. وقىتۋشىلارعا جاۋاپتاردى جىبەرىپ تۇراتىن. قاراپايىم بولاتىن، اتاعىن بۇلداعان ەمەس. بەرىلگەن تاپسىرمالاردى لايىقتى ورىنداپ ءجۇردى. جاقسى وقيدى. ديما الدىنا ماقسات قويا بىلەتىن جانە سول ماقساتتارىنا جەتە بىلەتىن ءور مىنەزدى جىگىت. «جۇلدىز» اۋرۋىمەن اۋىرمايدى»، - دەدى ا. حوحلوۆ.
ونىڭ ايتۋىنشا، ۇلتتىق ۋنيۆەرسيتەتتە ءجۇزۋ بويىنشا ءدارىس بەرىپ كەلە جاتقانىنا 8 جىل بولعان. جۇزۋدەن ۋنيۆەرسيتەت ۋنيۆەرسيادا ويىندارىندا ۇدايى ءبىرىنشى ورىن الىپ كەلەدى.
ال، الداعى 1 -قىركۇيەكتە ءال- فارابي اتىنداعى قاز ۇ ۋ- دا جاڭا باسسەيىن پايدالانۋعا بەرىلەدى.
ونىڭ ايتۋىنشا، د. بالاندين ريو وليمپياداسىندا ۇزدىك ونەر كورسەتتى.
«ءدال قازىرگى تاڭدا قازاقستاننىڭ ءجۇزۋ سپورتىندا دميتريگە ۇقساپ ەشكىم ونەر كورسەتە الماس ەدى»، - دەدى ول.
سونداي-اق، وقىتۋشىسى «بالانديننىڭ جولى بولدى. اتاقتى قارسىلاستارى بولمادى»، - دەگەن سوزدەرگە جاۋاپ بەردى.
«ديما وليمپيادا چەمپيونى. بۇل جەردە بارلىعىنا بىردەي مۇمكىندىك بەرىلدى. ول باسقالارعا قاراعاندا فينالدا مىقتى، شيراق ونەر كورسەتتى»، - دەدى ا. حوحلوۆ.
ول ديمانىڭ توكيو وليمپياداسىنا قاتىسىپ، توپ جاراتىندىعىنا سەنەدى.
«مەنىڭشە، ول ءبىر ەمەس، بىرنەشە التىن الادى. جاتتىقتىرۋشىلار قۇرامى جانە ديمانىڭ ءوزى جارىستان ءتيىستى قورىتىندى شىعاردى دەپ ويلايمىن. كەلەسى وليمپيادا دا ول ەرەسەك، اقىلدى جانە دارىندى بولا تۇسەدى. وسىنىڭ ارقاسىندا ول ءبىر ەمەس بىرنەشە التىنعا قول جەتكىزەدى دەپ ويلايمىن»، - دەدى ا. حوحلوۆ.
اۆتور: اسلان وسپانوۆ