قىتايدا وتكەن حالىقارالىق كينوفەستيۆالىندە «ماڭگىلىك اسپان استىندا» فيلمى جەڭىمپاز اتاندى

كينوفەستيۆال مەن شاراعا قاتىسۋشى مەملەكەتتەردىڭ مادەنيەتى تۋرالى كورمەنى قىتاي حالىق رەسپۋبليكاسىنىڭ مادەنيەت مينيسترلىگى ۇيىمداستىردى.
كينوفەستيۆال باعدارلاماسىندا قازىلار القاسى نازارىنا 78 فيلم ۇسىنىلدى. رەجيسسەر باقىت قايىربەكوۆتىڭ «ماڭگىلىك اسپان استىندا» اتتى عىلىمي- تانىمدىق فيلمى «يننوۆاتسيالىق جوبا» نوميناتسياسى بويىنشا جوعارى ماراپاتقا يە بولىپ، قىتاي حالىق رەسپۋبليكاسىنىڭ مادەنيەت مينيسترلىگىنىڭ جۇلدەسىن الدى.
ەسكە سالىپ كەتسەك، «ماڭگىلىك اسپان استىندا» فيلمىن قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا قازاق عىلىمي- زەرتتەۋ مادەنيەت ينستيتۋتى مەن «مەرگەن» ستۋدياسى تۇسىرگەن. بۇل جوبا نۇرسۇلتان نازاربايەۆتىڭ «عاسىرلار توعىسىندا» كىتابى نەگىزىندە قازاق حاندىعىنىڭ 550 جىلدىق مەرەيتويىنا ارنايى دايارلاندى.
كينوفەستيۆالگە قاتىسۋشىلاردىڭ ورتاق پىكىرى بويىنشا قازاقستاندىق فيلمدەر شەتەلدىك كورەرمەندەردىڭ تاراپىنان سۇرانىسقا يە. وسى فيلمدەر ارقىلى ادامدار قازاقستان حالقىنىڭ باي مادەنيەتى، سالت- داستۇرلەرىمەن تانىسا الادى.
«قازاقستاندىق فيلم كينوفەستيۆالدىڭ لايىقتى جوعارى ماراپاتىنا يە بولدى. فيلم قازاق حالقىنىڭ مادەنيەتى مەن ءومىرىن جاڭا تۇرعىدان اشىپ، كورمەگە كەلۋشىلەردىڭ ۇلكەن قىزىعۋشىلىقتارىن تۋدىردى. ءبىز بۇدان بىلاي ەكى ەل اراسىنداعى ىنتىماقتاستىقتىڭ جەمىستى بولاتىنىنا ۇمىتتەنەمىز» ، - دەيدى شىنجاڭ- ۇيعىر اۆتونوميالىق ولكەسىنىڭ مادەنيەت دەپارتامەنتى ديرەكتورىنىڭ ورىنباسارى كەنەس ساني.
سونىمەن قاتار، قازاق عىلىمي- زەرتتەۋ مادەنيەت ينستيتۋتى حالىقارالىق كورمەگە قاتىستى. كورمەدەگى ينستيتۋتتىڭ ستەندتتەرىنەن كەلۋشىلەر قازاقستاننىڭ باي تۋريستىك، يننوۆاتسيالىق جانە ينۆەستيتسيالىق الەۋەتى، عىلىمداعى جەتىستىكتەرى، مادەنيەتى، جالپى عىلىمي- زەرتتەۋ ينستيتۋتىنىڭ قىزمەتىنەن اقپاراتتىق ماتەريالدارمەن تانىسا الدى.
سونىمەن قاتار، ولارعا كينوفەستيۆالدە ۇسىنىلعان «ماڭگىلىك اسپان استىندا» اتتى فيلمدى تاماشالاۋعا مۇمكىندىك بولدى. كورمەنىڭ جۇمىس ىستەپ تۇرعان ۋاقىتىندا قازاقستاندىق ستەندتى مىڭداعان ادام تاماشالادى.