ريو وليمپياداسىنىڭ ۇمىتىلماس ساتتەرى

1. العاش رەت وڭتۇستىك امەريكادا
وليمپيادا ويىندارى العاش رەت وڭتۇستىك امەريكادا ءوتتى. چيكاگو، مادريد، توكيو سياقتى قالالاردى ارتقا قالدىرىپ، ريو- دە- جانەيرو 2009 - جىلى وليمپيادا استاناسى بولىپ جاريالاندى.
2. «ماراكانا» رەكوردتىق ستاديونىندا
وليمپيادانىڭ اشىلۋ سالتاناتى اتاقتى «ماراكانا» فۋتبول ستاديونىندا ءوتتى. وعان قازىر 78 مىڭداي كورەرمەن سىيادى، ال 1950 - جىلعى الەم چەمپيوناتىنىڭ فينالىندا 173 مىڭ كورەرمەن تاماشالاعان بولاتىن. مۇندا 2014 -جىلعى الەم چەمپيوناتىنىڭ فينالى دا ءوتتى.
3. جاڭا قۇراما
ءبىرىنشى رەت وليمپيادا ويىندارىنا بوسقىندار قۇراماسى قاتىستى، ونىڭ قۇرامىنا سيريا، وڭتۇستىك سۋدان، كونگو جانە ەفيوپيادان ون سپورتشى كىردى.
4. وليمپيادا قاۋىپسىزدىگى
وليمپيادانى وتكىزۋ ءۇشىن 85 مىڭداي سارباز بەن پوليتسيا جۇمىلدىرىلدى، بۇل 2012 -جىلعى لوندون وليمپياداسىنداعىدان ەكى ەسەگە كوپ.
5. 2000 - جىلعى تۋعاندار
وليمپيادا ويىندارىنا العاش رەت 2000 -جىلدارى دۇنيەگە كەلگەندەر قاتىستى. ەرەجەگە سايكەس وليمپياداعا 2003 -جىلعى 1- قاڭتارعا دەيىن تۋعاندار قاتىسا الاتىن. ەڭ جاس چەمپيون، 15 جاسار قىتايلىق جەن تسزيان 10 مەترلىك مۇنارادان سۋعا سەكىرۋدەن جەڭىمپاز اتاندى.
6. قازاقستاندىق فەلپس
21 جاسار الماتىلىق دميتري بالاندين ايدى اسپانعا شىعارىپ، براسس ادىسىمەن 200 مەترگە جۇزۋدەن قازاقستان تاريحىندا تۇڭعىش رەت وليمپيادا چەمپيونى اتاندى. ونى جەڭىسىنەن كەيىن قازاقستاندىق فەلپس دەپ اتاي باستادى. ال اتاقتى امەريكالىق مايكل فەلپس وسى وليمپيادادا 23- رەت وليمپيادا جەڭىمپازى اتاندى.
7. قازاق بوكسشىلارى جەڭىسىنىڭ جالعاسى
ەلىمىز تاۋەلسىزدىك العاننان بەرى بوكستان قازاقستان قۇراماسى ءار وليمپيادان التىن جۇلدە اكەلۋمەن كەلەدى. اتاپ ايتقاندا، 1996 - جىلى ۆاسيلي جيروۆ، 2000 - جىلى ەرماحان يبرايىموۆ پەن بەكزات ساتتارحانوۆ، 2004 -جىلى باقتيار ارتايەۆ، 2008 -جىلى باقىت سارسەكبايەۆ، 2012 -جىلى سەرىك ساپيەۆ چەمپيون اتانسا، بۇل جولى دانيار ەلەۋسىنوۆ التىننان القا تاقتى. بۇل جانە قازاقستاندىق بوكسشىلاردىڭ 69 ك گ سالماقتا قاتارىنان ءتورت وليمپياداداعى جەڭىسى ەدى.
8. ۆ. ليەۆيتتىڭ كۇمىسى التىنمەن تەڭ
91 ك گ سالماقتا فينالدا ۆاسيلي ليەۆيت پەن رەسەيلىك ەۆگەني تيشەنكونىڭ كەزدەسۋىنە قاتىستى تورەشىلەر شەشىمى داۋعا اينالدى. جەڭىس رەسەيلىككە بەرىلگەنمەن، كىمنىڭ انىق باسىم بولعانىن بۇكىل الەم كوردى. ماماندار پىكىرى ءوز الدىنا، اقىرى ا ي ب ا وسى باسەكەگە قازىلىق ەتكەندەردى الاستاپ تىندى. الايدا جەكپە- جەك ناتيجەسى قايتا قاراۋعا جاتپايتىن ەدى. سونىڭ وزىندە ۆ. ليەۆيتتىڭ كۇمىسى التىنمەن تەڭ دەۋگە بولادى.
9. مۇحامەد اليشە بوكستاستى
قازاقستاندىق بوكسشى قايرات ەراليەۆ 56 ك گ سالماقتا 2013 -جىلعى الەم چەمپيونى دجاۆيد چەلەبيەۆپەن كەزدەسۋىندە امەريكالىق اتاقتى بوكسشى مۇحامەد اليشە سوققىدان جالتارا ءبىلۋدىڭ تاماشا ۇلگىسىن كورسەتتى.
10. «كۇمىسبەكتىڭ» كوز جاسى
قازاقستاندىق بوكسشى، «كۇمىسبەك» اتانىپ كەتكەن ادىلبەك نيازىمبەتوۆ ەكى مارتە قاتارىنان وليمپيادا ويىندارىنىڭ كۇمىس جۇلدەگەرى بولعان سوڭ ماراپاتتاۋ ساتىندە كوز جاسىن جاسىرا المادى.
11. قازاقستان اۋىر اتلەتتەرى دوپينگ داۋىنان كەيىن دە مىقتى
ريو وليمپياداسى الدىندا حالىقارالىق اۋىر اتلەتيكا فەدەراتسياسى قازاقستاندىق ءتورت بىردەي وليمپيادا چەمپيونىن جارىستان شەتتەتكەنى بەلگىلى. سوعان قاراماستان، قازاقستاندىق اۋىر اتلەتتەر وسى وليمپيادا ءبىر التىن، ءبىر كۇمىس، ءۇش قولا مەدالدى جەڭىپ الدى.
12. قازاقستان تۋرالى دەرەكتەر
قازاقستان ريو وليمپياداسىندا جالپى سانى 17 مەدال جەڭىپ الىپ، قاتىسقان ەلدەر اراسىندا 22- ورىندى يەلەندى.
13. رەسەي قۇراماسى ءالى دە مىقتى
وليمپيادا الدىندا دوپينگ داۋىنا بايلانىستى رەسەي قۇراماسى تۇگەلدەي شەتتەتىلۋدىڭ از- اق الدىندا تۇردى. تەك حالىقارالىق وليمپيادا كوميتەتى 26 - شىلدەدە عانا رۇقسات بەردى. ونىڭ ۇستىنە جەڭىل اتلەتيكادان رەسەيلىكتەر تۇگەلگە جۋىق قاتىسا العان جوق. سوعان قاراماستان، رەسەي قۇراماسى 19 التىن، 18 كۇمىس، 19 قولامەن (56) ءتورتىنشى ورىنعا تابان تىرەدى.
14. سينگاپۋرلىق ءجۇزۋ شەبەرى م. فەلپستەن دە وزىپ كەتتى
سينگاپۋرلىق دجوزەف يسااك شۋلينگ 12 - تامىز كۇنى باتتەرفليايمەن 100 مەترگە جۇزۋدەن مايكل فەلپستىڭ ءوزىن باسىپ وزىپ كەتتى. سويتسە، ول 2008 -جىلى م. فەلپسپەن بىرگە سۋرەتكە ءتۇسىپ، سوعان ۇقساعىسى كەلگەن. مىنە، ۇلگىنىڭ ناتيجەسى.
15. ءتورت ءومىردى قۇتقارعان ءولىم
ەسكەك ەسۋدەن گەرمانيا قۇراماسىنىڭ باپكەرى شتەفان حەنتسە ريوداعى جول اپاتىنان قازا تاپقاننان كەيىن ءتورت ادامعا دونور بولعان. اۋرۋحانادا قايتىس بولعاننان كەيىن باپكەردىڭ وتباسى ونىڭ جۇرەگى، باۋىرى جانە ەكى بۇيرەگىن باسقا ناۋقاستارعا سالۋعا رۇقسات بەرگەن.
16. قامقورلىقتىڭ كورىنىسى
5 ك م قاشىقتىقتا جۇگىرۋدەن ىرىكتەۋ سايىسىندا امەريكالىق جەلاياق ەببي داگوستينو قۇلاپ قالىپ، جاراقات العان جاڭازەلانديالىق نيككي حامبليندى تاستاماي، ەكەۋى مارەگە بىرگە كەلگەن. كەيىن ەكەۋى دە فينالعا جىبەرىلگەن.
17. قىتايلىق جۇزگىشتىڭ قۋانىشى
قىتايلىق جۇزگىش، وليمپيادانىڭ قولا جۇلدەگەرى اتانعان فۋ يۋانحۋەي CCTV تەلەارناسىنا سۇحبات بەرىپ تۇرىپ، ءوزىنىڭ كورسەتكىشىن كورگەن كەزدە تاڭعالىسىن جاسىرا الماعان. ءسويتىپ از ۋاقىتتىڭ ىشىندە ايگىلى بولىپ شىعا كەلگەن.
18. وليمپياداداعى ماحاببات
سۋعا سەكىرۋدەن ەكى مارتە وليمپيادا چەمپيونى، وسى دودادا قولا جۇلدە العان قىتايلىق سين كاي ماراپاتتاۋ تۇعىرىندا تۇرعان ءوزىنىڭ سۇيىكتىسى حە تسزىعا سۇيەتىنىن بىلدىرگەن. كۇمىس جۇلدە العان حە تسزى «ءيا» دەپ جاۋاپ قاتقان.
19. ۋسەين بولتتىڭ توعىز التىنى
يامايكالىق ۋسەين بولت وسى دودادا ءۇش التىن مەدالدى جەڭىپ الىپ، توعىز مارتە وليمپيادا چەمپيونى اتاندى. ول ەرلەر اراسىندا 100 جانە 200 مەتردەن، سونداي- اق ەستافەتالىق جارىستا ەشكىمگە دەس بەرگەن جوق.
اۆتور: ەلجان ەرالى