پاۆلوداردا مالايسارى باتىرعا ەسكەرتكىش قويىلدى

وبلىس اكىمىنىڭ باسپا ءسوز قىزمەتى تاراتقان اقپاراتقا سۇيەنسەك، باتىردىڭ ءزاۋلىم ەسكەرتكىشى قازاقستان تاۋەلسىزدىگىنىڭ 25 جىلدىعىنا ارنالعان «ۇلى دالا ەلى» فەستيۆالىنىڭ شەڭبەرىندە اشىلدى.
ەسكەرتكىشتىڭ اشىلۋ سالتاناتىنا پاۆلودار وبلىسىنىڭ اكىمى بولات باقاۋوۆ، «مالايسارى تارحان» قوعامدىق قورىنىڭ پرەزيدەنتى تيتو سىزدىقوۆ، تۇڭعىش قازاق عارىشكەرى توقتار اۋباكىروۆ جانە باسقا دا قۇرمەتتى قوناقتار قاتىسقان. ەسكەرتكىشتىڭ اۆتورى - بەلگىلى ءمۇسىنشى بولات قۇسايىنوۆ. ەسكەرتكىش بىرنەشە ساۋلەت ەلەمەنتىنەن قۇرالعان ءبىرتۇتاس كومپوزيتسيادان تۇرادى. كومپوزيتسيانىڭ ءبىرىنشى بولىگىن - باسپالداق، ەكىنشى بولىگىن - بيىكتىگى 4,4 مەتر ءۇش باسپالداقتى تۇعىر، ءۇشىنشى بولىگىن - بيىكتىگى 5 مەتر مىستان جاسالعان تۇلپاردىڭ ۇستىندەگى باتىردىڭ تۇلعاسى قۇرايدى. ەسكەرتكىشتىڭ قۇرىلىسىنا تەگىستەلگەن تابيعي گرانيت پايدالانىلعان. گرانيت تاستارى قۇرت كەن ورنىنان الىندى.
مالايسارى باتىر - ورتا ءجۇزدىڭ ارعىن تايپاسى باسەنتيىن رۋىنىڭ سىرىم اتاسىنان تارايدى. ول پاۆلودار وبلىسىنىڭ اۋماعىندا دۇنيەگە كەلىپ، قازاق- جوڭعار شايقاستارىنداعى ەرەكشە ەرلىگىمەن حالىق جادىندا قالعان. قازىرگى تاڭدا ماي اۋدانىنداعى اۋىل باتىردىڭ ەسىمىمەن اتالسا، قىزىلجار اۋىلىنداعى مەشىت تە «مالايسارى باتىر مەشىتى» دەپ اتالادى.