تۇركى عالىمدارى كوشپەلىلەر مەديتسيناسىنىڭ تاريحىن زەرتتەۋگە كىرىستى

TWESCO سايتىنىڭ حابارلاۋىنشا، كونفەرەنسياعا الەمنىڭ جەتى ەلىنەن 40 عالىم قاتىسىپ، تۇركى- موڭعول حالىقتارىنىڭ ءداستۇرلى مەديتسيناسىنىڭ تاريحى مەن تاعلىمى، ءداستۇر ساباقتاستىعى تۋرالى كەلەلى ماسەلەلەردى تالقىلاپ، ادامنىڭ دەنساۋلىعى مەن سالاماتتى ءومىرى حاقىندا عىلىمي قۇندى پىكىرلەرىن ورتاعا سالىپ جاتىر.
جيىندى اشقان موڭعوليا عىلىم اكادەمياسىنىڭ اكادەميگى، موڭعوليا ءداستۇرلى مەديتسينا مۋزەيىنىڭ باسشىسى دالانتاين سەرەنسودنوم وسى عىلىمي كونفەرەنسيانى ورتاق وتكىزۋگە جاعداي جاساعان حالىقارالىق تۇركى اكادەمياسىنا العىس ءبىلدىردى. القالى عىلىمي باسقوسۋعا قاتىسقان اكادەميا عىلىمي قىزمەتكەرى اقەدىل تويشان ۇلى TWESCO باسشىسى دارحان قىدىرالىنىڭ رەسمي قۇتتىقتاۋىن كوپشىلىككە وقىپ بەردى.
«بۇگىنگى عىلىمي جيىندا عاسىرلار قويناۋىنان بۇگىنگە جالعاسقان حالىق ەمشىلىگىنىڭ تىلسىم سىرى اشىلىپ، عىلىمي نىسانعا اينالا بەرۋىنە تىلەكتەسپىن. جاڭالىقتىڭ جارشىسى بولاتىن عالىمداردىڭ قۇندى پىكىرلەرى ءبىر- بىرىنە توعىسىپ، رۋحاني كەڭىستىك كەڭي بەرسىن»، - دەلىنگەن قۇتتىقتاۋ حاتتا.
ايتا كەتۋ كەرەك، TWESCO ارنايى شاقىرۋىمەن جيىنعا قاتىسىپ وتىرعان ق ح ر س ۋ ا ر ءۇرىمجى قالاسىنان كەلگەن پروفەسسور، نەيروحيرۋرگ جاسارات جالەلدىڭ «تىركەس ءسىڭىردى وتا جاساپ قازاقتىڭ ساپتاما ەتىگىمەن قوزعالىس ۇستىندە ەمدەۋ امالى»، تۇركولوگ نۋريددين ۋسەيەۆتىڭ «ماناس» ەپوسىنداعى حالىق ەمشىلىگى تۋرالى ءبىلىم ماسەلەسى» دەگەن باياندامالار جۇرت نازارىن اۋداردى. فولكلور تانۋشى ا. تويشان ۇلى «قازاق، موڭعول ەلدەرىنىڭ باقسىلىق سالتىنداعى جىلان ءرامىزى» دەگەن بايانداما جاسادى.
كونفەرەنسياعا قاتىسۋشىلاردىڭ باياندامالارى ارنايى جيناق بوپ جارىق كورەدى.