جالعىز باستى انالارعا جاردەماقى بەرىلەدى دەگەن اقپارات شىندىققا جاناسپايدى
بۇل تۋرالى «ازاماتتار ءۇشىن ۇكىمەت» مەملەكەتتىك كورپوراتسياسىنىڭ باسپا ءسوز قىزمەتىنەن حابارلادى.
«ازاماتتار ءۇشىن ۇكىمەت» مەملەكەتتىك كورپوراتسياسى مەسسەندجەرلەر ارقىلى تاراتىلعان قازاقستاندا جالعىز باستى انالار ءۇشىن جاردەماقى ەنگىزىلەدى، ونى الۋ ءۇشىن قۇجاتتاردى 10-25 -تامىز ارالىعىندا حالىققا قىزمەت كورسەتۋ ورتالىعىنا تاپسىرۋعا بولادى دەگەن اقپاراتتىق شىندىققا جاناسپايتىندىعىن حابارلايدى. مۇنداي حابارلاردى جىبەرۋ جالعان اقپارات تاراتۋ بولىپ تابىلاتىندىعىنا جانە قازاقستان رەسپۋبليكاسىنىڭ زاڭناماسىندا كورسەتىلگەن جاۋاپكەرشىلىككە تارتىلۋعا اكەلەتىندىگىنە نازار اۋدارتامىز»، - دەلىنگەن تاراتىلعان اقپاراتتا.
مەملەكەتتىك كورپوراتسيا قازاقستان رەسپۋبليكاسىنىڭ زاڭدارى مەن نورماتيۆتىك اكتىلەرىنە سايكەس مەملەكەتتىك قىزمەت كورسەتەدى. ماسەلەن، 2005 -جىلدىڭ 28 -ماۋسىمىنداعى «بالالى وتباسىلارعا بەرىلەتىن مەملەكەتتىك جاردەماقىلار تۋرالى» زاڭعا سايكەس بالاسى بار وتباسىلارعا مىناداي تولەمدەر بەرىلەدى:
بالا تۋۋىنا بايلانىستى تاعايىندالاتىن جانە تولەنەتىن ءبىرجولعى مەملەكەتتىك جاردەماقى؛ بالا ءبىر جاسقا تولىق تولعانعا دەيىن ونىڭ كۇتىمىنە بايلانىستى تاعايىندالاتىن جانە تولەنەتىن اي سايىنعى مەملەكەتتىك جاردەماقى؛ ون سەگىز جاسقا دەيىنگى بالالارعا تاعايىندالاتىن جانە تولەنەتىن اي سايىنعى مەملەكەتتىك جاردەماقى؛ مۇگەدەك بالانى (مۇگەدەك بالالاردى) تاربيەلەپ وتىرعان اناعا نەمەسە اكەگە، بالا اسىراپ الۋشىعا، قورعانشىعا (قامقورشىعا) تاعايىندالاتىن جانە تولەنەتىن اي سايىنعى مەملەكەتتىك جاردەماقى.
جاردەماقىلار مىناداي مولشەردە بەلگىلەنەدى:
بالا تۋعاندا بەرىلەتىن جاردەماقى: ءبىرىنشى بالاعا 5,76 (12217 تەڭگە) ايلىق ەسەپتىك كورسەتكىش؛ ەكىنشى بالاعا 6,81 (14445) ايلىق ەسەپتىك كورسەتكىش؛ ءۇشىنشى بالاعا 7,85 (16650) ايلىق ەسەپتىك كورسەتكىش؛ ءتورتىنشى جانە ودان كەيىنگى بالالارعا 8,90 (18877) ايلىق ەسەپتىك كورسەتكىش؛ بالالارعا ارنالعان جاردەماقى ءاربىر بالاعا 1,05-ايلىق ەسەپتىك كورسەتكىش؛ مۇگەدەك بالانى تاربيەلەۋشىگە بەرىلەتىن جاردەماقى جالاقىنىڭ 1,05 ەڭ تومەن مولشەرى.
اۆتور: مارلان جيەمباي
