اقتوبە وبلىسىندا ناۋقاس ازاماتقا قۇداسى بۇيرەگىن سىيعا تارتتى

اقتوبە وبلىسىندا ناۋقاس ازاماتقا قۇداسى بۇيرەگىن «سىيعا تارتتى».
بۇل تۋرالى aktobetimes.kz-كە سىلتەمە جاساپ NUR. KZ حابارلايدى.
قاراعاندىدان وتا جاساتۋعا كەلگەن رۋستام مۋحارلياموۆكە ەشبىر جاقىنىنىڭ بۇيرەگى سايكەس كەلمەگەن. تەك قۇداسى قايىربەك تۇلەۋبايەۆتىڭ بۇيرەگى جارامدى بولىپ شىققان. مۇنى ەستىگەن قۇدا ءبىر بۇيرەگىن بەرۋگە بىردەن كەلىسىمىن بەرگەن.
«ەڭ باستىسى ەشتەڭەدەن قورىقپاۋ كەرەك. وتادان كەيىن ءحالىم جاقسى. جاقىن ادامىڭا كومەكتەسۋ مۇمكىندىگى بار بولسا، قول ۇشىن بەرۋ كەرەك. بىزدە وسىنداي تاماشا دارىگەرلەر بارىنا رازىمىن»، - دەيدى تۇلەۋبايەۆ.
ەكىنشى قۇداسى تولىقتاي ايىققانشا 15 كۇن ەمحانادا جاتادى. ونىڭ دا جاعدايى جاقسى.
«شەشەك اۋرۋىنا شالدىققاندا بۇيرەككە كەرى اسەرى ءتيىپ كەتتى. مەن ءبىر جارىم جىل بويى گەمودياليزبەن جاتتىم. اپتاسىنا ءۇش رەت ءتورت ساعاتتان. ودان كەيىن تاۋلىك بويى جۇمىس ىستەي الماي قالاسىڭ. قاراعاندىدا كومپانيانى باسقارامىن. اپتاسىنا 3-4 تاۋلىكتى سىرقاتىما بولا بوس وتكىزەتىنمىن. گەمودياليزدەن كەيىن سۇيەكتەرىم سىرقىراپ، ءوزىمدى ناشار سەزىنەتىنمىن. ەم الۋ ءۇشىن رەسەي مەن گەرمانياعا دا باردىم. گەرمانيادا ەمگە 20 مىڭ ەۆرو جۇمسادىم. الايدا ەش ناتيجە بولمادى. ماسكەۋدە بۇيرەگىمدى الماستىرۋ وتاسىن جاساتپاق ەدىم، اقتوبەدە دە جاقسى جاسالاتىن بولىپ شىقتى»، - دەيدى مۋحارلياموۆ.
رۋستام ەكى جىل بويى دونور ىزدەگەن.
«مەنىڭ تۋىسقاندارىم اراسىندا ەشكىمنىڭ بۇيرەگى سايكەس كەلمەيتىن بولىپ شىقتى. قان توبى بويىنشا 13 سايكەستىك تابىلۋى ءتيىس. قۇداممەن ارالاسىپ جۇرگەلى 20 جىل بولدى. ول وتاعا ءوزى كەلىسىم بەردى. قۇدام مەنەن 5 جاسقا ۇلكەن. قازىر ءوزىمدى جاقسى سەزىنەمىن»، - دەيدى رۋستام.