ادىلبەك نيازىمبەتوۆ: ەل ءۇمىتىن اقتاي الماعانىم وكىنىشتى
وسىلايشا قازاق بوكسشىسى ەكى دۇركىن وليمپيادانىڭ كۇمىس جۇلدەگەرى اتاندى. بۇل وليمپيادا تاريحىنداعى قاتارىنان ەكى رەت فينالعا شىققان ەكىنشى بوكسشىمىز. وسىعان دەيىن بولات ءجۇمادىلوۆ ەكى بىردەي وليمپيادانىڭ فينالىنا شىعىپ، ەكى مارتە كۇمىس جۇلدەگەر اتانعان بولاتىن.
جەكپە- جەك اياقتالعان سوڭ ادىلبەكتەن شاعىن سۇحبات الىپ ۇلگەردىك، دەپ جازادى Sports.kz.
- ادىلبەك، سەن قاتارىنان ەكى رەت وليمپيدا جۇلدەگەرى اتانىپ وتىرسىڭ. مۇنىڭ ءوزى - ۇلكەن جەتىستىك.
- بارلىعى ءبىر اللانىڭ قالاۋىمەن بولدى. جانكۇيەرلەرىم مەن باپكەرلەرىمنىڭ ءۇمىتىن اقتاي الماعانىما كوڭىلىم قۇلازىپ وتىر. ءدال قازىر لوندون وليمپياداسىنداعى جەڭىلىسىمنەن كەيىنگى كۇيدى باسىمنان كەشىرىپ وتىرمىن. ەندى ونداي ءسات قايتالانبايتىنداي بولىپ ەدى. الايدا، امال قانشا؟ ءومىر وسىمەن توقتاپ قالمايدى.
- مىرزاعالي ايتجانوۆ ءوز سۇحباتىندا سەنىڭ فينالدىق باسەكەدە مىقتى بولعانىڭدى اتاپ ءوتتى. كەلىسەسىڭ بە؟
- جەڭىلدىم دەپ تە ايتا المايمىن. باپكەرىمنىڭ ايتقاندارىن ورىنداپ، جەكپە- جەككە بار كۇشىمدى سالدىم.
- العاشقى ەكى راۋندتان سوڭ سەن ۇپاي سانى بويىنشا ارتتا قالىپ كەلە جاتقانىڭدى ءبىلدىڭ بە؟
- جوق، مەن ەكى راۋند بويىنشا ەسەپ 1:1 دەپ ويلادىم. ال ءۇشىنشى راۋند شەشۋشى بولاتىن شىعار دەگەن ەم...
- بۇل سەنىڭ سوڭعى وليمپياداڭ با؟
- ونىڭ كەيىن باپكەرىممەن اقىلداسىپ شەشەتىن بولامىز.
- جەكپە- جەك الدىندا قاتتى قوبالجىدىڭ با؟
- مەن قارسىلاسىمنىڭ مۇمكىندىكتەرىن ءبىلدىم، ونى جەڭە الام دەپ ويلادىم. ەلىمە ماعان قولداۋ كورسەتكەنى ءۇشىن العىس ايتامىن. ءبىزدىڭ سپورتشىلار ەلىمىزدىڭ بايراعىن الەمدىك ارەنادا جەلبىرەتە بەرسىن دەپ تىلەيمىن. وليمپيدادا ءبىزدىڭ قۇرامادان تەك يۆان دىچكو قالدى. وعان جارتىلاي فينالدان فينالعا ءوتۋىن تىلەيمىن.
