ەلسيار قاناعاتوۆ: لوندونداعى جەتىستىكتى قايتالاي الاتىنىمىزدى سپورتشىلارىمىز دالەلدەپ جاتىر

«لوندوننان كەيىن، بۇل جەتىستىك ەندى ەش ۋاقىتتا قايتالانبايدى دەگەن ءسوزدى كوپ ەستىدىك. تالاي ادام سولاي ايتتى. ءتىپتى، سپورتتىڭ ماڭىندا جۇرگەن ادامدار دا سولاي دەگەن ەدى. مىنە، ريوداعى جەتىستىگىمىز ونى تەرىسكە شىعارىپ جاتىر دەپ ويلايمىن. قازىردىڭ وزىندە جالپى مەدالدار سانى جاعىنان قازاقستان رەكوردتىق دەڭگەيگە جەتتى. وسىعان دەيىنگى وليمپيادا ويىندارىندا ەڭ كوپ بولعاندا 13 مەدال العانبىز. قازىر 15 مەدالدى الىپ ۇلگەردىك.»، - دەدى ەلسيار قاناعاتوۆ.
سونداي- اق، دوپينگ داۋىمەن ريو وليمپياداسىنا قاتىسا الماعان سپورتشىلارىمىز بولعاندا، لوندونداعى تاريحي كورسەتكىشكە وزگەرتۋ ەنگىزەر ەدىك دەپ اتاپ ءوتتى ول.
«وزدەرىڭىز بىلەسىزدەر يليا يلين، زۋلفيا چينشانلو، سۆەتلانا پودوبەدوۆا مەن مايا مانەزا دوپينگ داۋىمەن ريو ووليمپياداسىنا قاتىسا المادى. بۇل دەگەن - قازاقستان ريودا ءتورت التىنىن جوعالتتى دەگەن ءسوز. ەگەر تورتەۋى كەلسە، لوندونداعى رەكوردتى بۇزۋشى ەدىك. قازىر دە ناتيجەمىز جامان ەمەس. سپورتشىلارىمىزعا قاتتى رازىمىن. جەڭىستەرىمىز ءالى دە كوبەيەدى دەگەن سەنىمدەمىن»، - دەپ اتاپ ءوتتى سپورت جانە دەنە شىنىقتىرۋ كوميتەتىنىڭ ءتوراعاسى ەلسيار قاناعاتوۆ.
اۆتور: كۇنسۇلتان وتارباي