دانيار ەلەۋسىنوۆ: بۇل - قازاق ەلىنىڭ جەڭىسى

ريو- دە- جانەيرو. قازاقپارات - بۇگىن ريو- دە- جانەيرو قالاسىندا ءوتىپ جاتقان جازعى وليمپيادا ويىندارىندا بوكستان 69 كەلى سالماقتا چەمپيون اتانعان دانيار ەلەۋسىنوۆ جەكپە- جەكتەن كەيىنگى اسەرىمەن ءبولىستى، دەپ حابارلايدى ريوداعى قازاقپارات ءتىلشىسى.
None
None

«بۇل جەڭىس - قازاق ەلىنىڭ جەڭىسى. مەن جەڭىسىمدى ەلىمە ارنايمىن»، - دەپ اتاپ ءوتتى وليمپيادا چەمپيونى دانيار ەلەۋسىنوۆ.

سونىمەن بىرگە، ريو وليمپياداسىندا وزىنە قولداۋ كورسەتكەن بارلىق جانكۇيەرلەرىنە شەكسىز رازى ەكەنىن ايتىپ، العىس ءبىلدىردى.

«ماعان قولداۋ كورسەتكەن بارلىق جانكۇيەرلەرىمە دەگەن العىسىم شەكسىز. بارلىعىقتارىڭىزعا راحمەت! مەنى قولدادىڭىزدار، وسى جەتىستىككە جەتۋگە تالپىندىرىپ، جىگەرىمدى جانىدىڭىزدار. سول ءۇشىن بارلىق جانكۇيەرلەرىمە راحمەت ايتامىن. سىزدەر مەنەن ۇلكەن ءۇمىت كۇتتىڭىزدەر، مەن ونى اقتادىم»، - دەدى دانيار ەلەۋسىنوۆ.

سونىمەن بىرگە، وسىعان دەيىنگى وليمپيادا ويىندارىنداعى 69 كەلى سالماقتا باقتيار ارتايەۆ، باقىت سارسەكبايەۆ، سەرىك ساپيەۆ سالعان سارا جولدى بۇزباي، چەمپيوندىق اتاققا قول جەتكىزگەنى ءۇشىن قۋانىشتى ەكەنىن دە جاسىرمادى.

 «بۇل 69 كەلى سالماق، قازاقتىڭ سالماعى اتانىپ كەتتى. وعان سەبەپ، مەنىڭ الدىمدا قازاقتىڭ ءۇش باتىرى باقتيار ارتايەۆ، باقىت سارسەكبايەۆ، سەرىك ساپيەۆ قازاق ەلىنە التىن مەدال سىيلادى. سەرىك ساپيەۆ ۇلكەن سپورتتان كەتكەن سوڭ، مەن وسى سالماققا اۋىستىم. بۇل سالماق دارەجەسىنىڭ جاۋاپكەرشىلىگى كۇشتى ەكەنىن سەزىنىپ، جانە الدىمداعى اعالاردىڭ جولىن جالعاپ، چەمپيون بولۋعا بار كۇش- جىگەرىمدى سالدىم. مىنە، ارمانىم ورىندالدى. اعالارىما ۇيالماي قارايتىن بولدىم»، - دەدى كۇلىپ دانيار ەلەۋسىنوۆ.

اۆتور: كۇنسۇلتان وتارباي

سوڭعى جاڭالىقتار