جەر الىپ، ءۇي سالعان ءتيىمدى مە، الدە دايىن پاتەر ساتىپ العان ءتيىمدى مە؟

استانا. قازاقپارات - قازاقستانداعى تۇرعىن ءۇي باعاسى قازىرگى كەزدە قالىپتى جاعدايىن ساقتاپ وتىر دەۋگە بولادى.

دەگەنمەن ءۇي ساتىپ الۋدان گورى، جەر الىپ، وعان ءۇي تۇرعىزۋعا كەتەتىن قارجى كولەمى پاتەر ساتىپ الۋمەن سالىستىرعاندا قوماقتىراق بولىپ كەلەدى.

مۇنداي ساراپتامانى Homsters.kz كومپانياسى جاريالاپ وتىر - دەيدى BAQ.kz ءتىلشىسى.

اتالمىش كومپانيانىڭ ساراپشىلارى «ۆەك» قۇرىلىس كورپوراتسياسىنىڭ وكىلدەرىمەن بىرلەسىپ، رەسپۋبليكاداعى كوپپاتەرلى جاڭا ۇيلەردىڭ ءبىر شارشى مەترىنىڭ وزىندىك قۇنىنىڭ قۇرىلىمىن ازىرلەۋ بارىسىندا ءۇي سالۋعا كەتەتىن شىعىننىڭ جارتىسىنان استامى، ناقتىراق 53 پايىزى قۇرىلىس ماتەريالدارىنا جۇمسالاتىنىن انىقتاعان.

ال ءوزىڭىز قۇرىلىس سالۋمەن اينالىسپاساڭىز، ياعني، ءوز ءۇيىڭىزدى ءوزىڭىز تۇرعىزىپ الۋعا مۇمكىندىگىڭىز بولماسا، وندا قۇرىلىسقا دەپ جيناقتاعان قارجىڭىزدىڭ تاعى ءبىر قوماقتى بولىگىن سىزگە ءۇي سالىپ بەرگەن قۇرىلىسشىلارعا بەرۋىڭىزگە تۋرا كەلەدى. بۇل ءسىزدىڭ جيناعان قارجىڭىزدىڭ 17 پايىزىن يەلەنەدى. ياعني قۇرىلىس كومپانياسىنىڭ قىزمەتكەرلەرى ءۇشىن ەڭبەكاقى بولىپ ەسەپتەلەدى. بۇدان كەيىنگى قالتاڭىزدى قاعاتىن - ارينە ول جەر تەلىمىن ساتىپ الۋعا جۇمسالاتىن قارجى.

ءيا، جەر تەلىمىن ساتىپ الماي تۇرىپ، ەشكىم دە قۇرىلىس باستاماسى انىق. سوندىقتان جەر ۋچاسكەسى ءۇشىن بار قارجىڭىزدىڭ 9 پايىزدايىن شىعىنداۋىڭىزعا تۋرا كەلەدى. ءبىر ءىستى قولعا العان سوڭ، ونى قازىرگى ۋاقىتتا تەحنيكانىڭ كۇشىنسىز ءبىتىرۋ وڭاي ەمەس. دەمەك قارجىڭىزدىڭ 6 پايىزى وسى قۇرىلىس تەحنيكاسىنا جۇمسالاتىنىن دا ەستەن شىعارماڭىز. ال وزگە دە شىعىندارى ءۇشىن قوسىمشا قارجى رەتىندە ورتا ەسەپپەن 5 پايىزىن ساقتاعانىڭىز ابزال. سونىمەن قاتار، تۇرعىزعان ءۇيىڭىزدىڭ اۋماعىن كوگالداندىرۋ، اۋلا تۇرعىزۋ، جارىق تارتۋ، كورگەن ادامنىڭ كوزى سۇيسىنەر ءتۇرلى ساۋلەت ەلەمەنتتەرىن جاساتۋ ءۇشىن 2 پايىزدى ەسكەرسەڭىز جەتكىلىكتى.

ەسكەرتە كەتەيىك، بۇل ساراپتاماعا قازاقستاننىڭ ەڭ ءىرى قالالارىنداعى ورتا باعا سەگمەنتىندەگى، ارتىق جوندەۋ جۇمىستارىن قاجەت ەتپەيتىن پاتەرلەرى بار جاڭا ۇيلەر نەگىز بولدى.

جوعارىدا جاساعان ساراپتامامىزدى وقىعان بولساڭىز، ەلىمىزدە قۇرىلىس ماتەريالدارىنىڭ قۇنى ءار وڭىردە ءار ءتۇرلى ەكەنىن ەسكەرە وتىرىپ، ءوزىڭىز تۇرىپ جاتقان اۋماقتىڭ ورتاشا ەسەبىن شىعارا الاسىز. قازىرگى كەزدە ەلىمىزدە قۇرىلىس ماتەريالدارىن وندىرەتىن وندىرۋشىلەر سانى ارتىپ كەلەدى. بۇعان دەيىن 2014-2015 -جىلدارى ۆاليۋتا باعامىنىڭ قۇلدىراۋىنا جانە وتاندىق قۇرىلىس زاتتارىن وندىرۋشىلەردىڭ ازدىعىنا بايلانىستى قۇرىلىسقا دەپ جيناعان سومانىڭ 70 پايىزدان استامى تەك قۇرىلىس ماتەريالدارىنا جۇمسالاتىن ەدى. بۇعان سەبەپ قۇرىلىس زاتتارىن تەك يمپورت رەتىندە عانا تۇتىنىپ كەلدىك.

قىر بالاسى