اسكەري ۇشاقتى باعىندىرعان قازاقستان ۇلتتىق گۆاردياسى قۇرامىنداعى جالعىز ارۋ

قازاقتا ايگىلى حيۋاز دوسپانوۆانىڭ جولىن جالعاعان قاتارداعى جاۋىنگەر كەزەكتى وقۋ- جاتتىعۋ جۇمىستارىنا قاتىسقان ساتتە بويجەتكەن باسقارعان ۇشاقپەن ءتىلشىمىز گاۋھار وماربەك تە كوككە كوتەرىلدى.
اردانا اسكەري قىزمەتكە وسىدان تۋرا 3 اي بۇرىن قابىلداندى. ءبىلىمىن تەك قازاقستاندا ەمەس، فينليانديادا جەتىلدىرگەن بويجەتكەننىڭ اۋە كەمەسىن تىزگىندەۋدە 240 ساعاتتىق تاجىريبەسى بار. ال اسكەري ۇشاقتىڭ شتۋرۆالىنا العاش رەت وتكەن ايدا وتىردى. قابىلەتىن شىڭداپ جۇرگەن قاتارداعى جاۋىنگەر بۇگىن ەكيپاج قۇرامىندا اسكەري تاپسىرمالاردى ءساتتى ورىنداپ شىقتى.
رۋستام قوجاحمەتوۆ، ۇشقىش- نۇسقاۋشى:
- اردانا ەكيپاج قۇرامىندا اۋە كومانديرىنىڭ كومەكشىسى قىزمەتىن اتقاراتىن بولادى. ازىرشە جاتتىعۋ جۇمىستارىنىڭ 15 ساعاتىن ءتامامدادىق. قابىلەتى تاماشا. ءالى اۋە كەمەسىندە ورىندالاتىن 35 ساعاتتىق قاۋىرت جۇمىس بار. تەك سودان كەيىن اۆياتسيا سالاسىنداعى اسكەري تاپسىرمالاردى ورىنداۋعا كىرىسەدى.
ۇشقىش قىز بىلىكتىلىگىن پىسىقتاعان سوڭ اۋە كەمەسىمەن ءتۇرلى جۇكتەردى تاسىمالداۋعا اسكەري قىزمەتكەرلەردىڭ كوكتەگى قاۋىپسىز ساپارىنا جاۋاپتى بولادى. 22 جاستاعى بويجەتكەن ءبىر جىلدان سوڭ العاشقى وفيتسەرلىك شەنگە دە قول جەتكىزبەك.
اردانا بوتاي، ۇشقىش:
- مەن شەتەلدە ءبىلىم العان سوڭ كوممەرتسيالىق كومپانيالاردا ەمەس، ۇلتتىق گۆارديا ساپىندا ەڭبەك ەتكىم كەلدى. بۇل مەنىڭ ارمانىم بولاتىن. قازىر ءوز جۇمىسىم قاتتى ۇنايدى. مەن كارەرامدى جالعاستىرىپ، بيىك اسۋلاردى باعىندىرعىم كەلەدى.
22 جاستاعى ارۋدىڭ العا قويعان ماقساتتارى بيىك. بولاشاقتا عارىشكەر بولۋدى قالايتىن اردانا ازىرشە تۇرمىس قۇرماعان. ءبىراق وتباسى قۇندىلىقتارىن جۇمىستاعى جەتىستىكتەرمەن قاتار الىپ جۇرگىسى كەلەدى. قىز بالا بوس ۋاقىتىن قاتارلاس قۇربىلارى سىندى ءسان سالوندارىنا ەمەس، سپورتقا مەيلىنشە كوبىرەك ارنايتىنىن ايتتى.
اردانا بوتاي، ۇشقىش:
- بۇل - كىشكەنە كۇردەلى ماسەلە. الدىمەن ادام ءوزىن جاقسى كورۋى ءتيىس. جان سۇلۋلىعى مەن ءۇشىن باسىمدىراق. ال سىرت- كەلبەتكە دە ۋاقىت تابۋعا تىرىسامىن. ءبىراق جۇمىستان سوڭ جۇزۋگە بارىپ، سپورت زالدارىندا سەرپىلىپ قايتقان ۇنايدى.
اردانا بوتايدىڭ مىنەزى سالماقتى. ادامدارمەن تەز ءتىل تابىسادى. ارىپتەستەرى اراسىندا ءوزىن ەركىن سەزىنەدى. بويجەتكەن قىز بالا بولسام دا، جۇمىستاعى قاتاڭ تالاپتار بارىمىزگە ورتاق دەيدى.
www.24.kz