الەكساندر زايچيكوۆ: وسى جەڭىسىمە باپكەرلەرىمنەن بولەك ەكى ادام ولشەۋسىز ەڭبەك ءسىڭىردى

 ريو- دە- جانەيرو. قازاقپارات - وسى جەڭىسىمە ءوز انام مەن يليانىڭ اناسى ولشەۋسىز ەڭبەك ءسىڭىردى. بۇل تۋرالى بۇگىن ريودا ءوتىپ جاتقان وليمپيادا ويىندارىندا اۋىر اتلەتيكادان اسا اۋىر سالماقتا ەل نامىسىن قورعاعان الەكساندر زايچيكوۆ جارىستان كەيىن قازاقپارات تىلشىسىنە بەرگەن سۇحباتىندا ايتتى.
None
None

 - جەڭىسىڭ قۇتتى بولسىن.

- راحمەت!

- قازاقستان قورجىنىنا بەسىنشى قولا مەدال سالدىڭ. قۋانىشىڭمەن بولىسە كەتسەڭ...

- قارسىلاستارىمنىڭ بارلىعى كىلەڭ مىقتىلار بولدى. ءبىراق، بارىمدى سالدىم. سوڭعى كۇشىم جەتكەنشە كوتەردىم. بۇيىرعانى قولا مەدال بولدى. قانشاما جىل تەر توگىپ، وليمپيادادان جۇلدەسىز كەتىپ جاتقاندار قانشاما؟! مەن ەلىمە قولا بولسا دا جۇلدە سىيلادىم. سول ءۇشىن وزىمە ءوزىم رازىمىن.

 - ەكىنشى ورىن العان قارسىلاسىڭ سەنەن ءبىر- اق كەلى ارتىق كوتەردى. «اتتەگەن- اي» دەگەن وكىنىشىڭ بولدى ما؟

- ارينە، وكىنىشتى! سيمون مارتيروسياننىڭ باعى جاندى. ول مەنەن ءبىر كەلى ارتىق كوتەرىپ كۇمىس جۇلدەگە قول جەتكىزدى. تورەشىلەر مەنىڭ سەرپە كوتەرۋدە ءبىر مۇمكىندىگىمدى ەسەپكە المادى. ەگەر ونى ەسەپكە العاندا كۇمىستى مەن قانجىعاما بايلايتىن ەدىم. جارىستى سىزدەر كوزدەرىڭىزبەن كوردىڭىزدەر. ال قۇرلىقتىڭ ارعى بەتىندەگى وتانداستارىمىز كوگىلدىر ەكراننان تاماشالاپ وتىردى دەپ ويلايمىن. سوندىقتان ەندى جارىسقا توقتالا بەرمەلىك.

- ال باس جۇلدەنى جەڭىپ العان وزبەكستاندىق رۋسلان نۋريدينوۆ تۋرالى ايتارىڭ بار ما؟

 - رۋسلان نۋريدينوۆ وليمپيادانى تالاسسىز جەڭدى. ونىڭ كۇشتىلىگىن الەم مويىندادى بۇگىن. ءوزىنىڭ ناعىز مىقتى ەكەنىن مويىنداتتى ول. ءبىراق، ول قانشا كەرەمەت بولسا دا، الماتىدا وتكەن الەم چەمپيوناتىندا يليننىڭ الدىندا دارمەنسىز كۇي كەشكەنى ەستەرىڭىزدە بولار. سوندا نۋريدينوۆ «يليانى جەڭۋ مۇمكىن ەمەس» دەپ مويىنداعان بولاتىن. وكىنىشكە قاراي بۇل وليمپياداعا يلين قاتىسا العان جوق. سودان بولار رۋسلان ءوزىن سۋداعى بالىقتاي سەزىنىپ ءجۇردى. ەگەر، يلين بولعاندا وعان وليمپيادانىڭ چەمپيوندىق اتاعى بۇيرماسپا ەدى، كىم ءبىلسىن؟!

- بۇل جەڭىسىڭدى كىمگە ارنايسىڭ؟

- بۇل جەڭىس مەنىڭ عانا جەڭىسىم ەمەس. مەنىڭ جەڭىسىم - ەلدىڭ جەڭىسى. سوندىقتان بارىمىزگە ورتاق جەڭىس دەپ ويلايمىن. ءبىراق، وسى جەڭىسىمە جەتۋگە باپكەرلەرىمنەن بولەك ەكى ادام ولشەۋسىز ۇلەس قوستى. ونىڭ ءبىرى - ءوز انام. ال ەكىنشىسى - يليا يليننىڭ ماماسى. باپكەرلەرىمنەن بولەك وسى ەكى كىسىگە ولشەۋسىز العىس بىلدىرەمىن. انالارىمىز امان بولسىن.

- اڭگىمەڭە ۇلكەن راحمەت!

اۆتور: كۇنسۇلتان وتارباي

سوڭعى جاڭالىقتار