10:03, 16 - تامىز 2016 | GMT +5
ۇلكەن كولەمدە اقشا ۇتقان ادام ۇتىسىن الۋعا ۇلگەرمەي قالعان
استانا.قازاقپارات - وسى جىلدىڭ ناۋرىزىندا ۇلتتىق لوتەرەيادان 6 ميلليون ەۋرو ۇتقان ادام ۇتىسىن الۋعا ۇلگەرە المادى.

بريۋسسەل قالاسىنىڭ تۇرعىنى ءوزىنىڭ ۇتقان اقشاسىن الۋعا ءتيىستى مەرزىم - سەنبى كۇنى دە كەلمەگەن ەكەن.
ۇتىس يەسىنە ىزدەۋ سالعان ۇلتتىق لوتەرەيانىڭ اكىمشىلىگى بەلگيا گازەتتەرىندە ءۇش رەسمي تىلدە - فرانسۋز، گوللاند جانە نەمىس تىلدەرىندە حابارلاندىرۋ جاريالاعان. ءبىراق، الگى ادام قارا كورسەتپەگەن. وسىنشا سوماداعى ۇتىس لوتەرەيا بيلەتى 13 -تامىزعا دەيىن جارامدى بولاتىن. بەلگيادا 2008 -جىلعى جەلتوقساندا دا لوتەرەيا جەڭىمپازى ۇتىسىن الۋعا كەلمەگەن جاعداي تىركەلىپتى. بۇل ەلدە ەڭ ءىرى ۇتىس - 100 ميلليون ەۋرو 2007 -جىلى كەزدەسىپتى.