ق ر مادەنيەت جانە اقپارات ءمينيسترى مۇحامەدي ۇلى وزىنە جالا جاپقان رەجيسسەرگە قاتىستى ارىزدى قايتارىپ الدى

استانا. قازاقپارات - ق ر مادەنيەت جانە اقپارات ءمينيسترى ارىستانبەك مۇحامەدي ۇلى رەجيسسەر تالعات جانىبەكوۆكە قاتىستى سوتقا بەرگەن ارىزىن قايتارىپ الدى.

ق ر مادەنيەت جانە اقپارات مينيسترىنە قاتىستى استانا قالاسىنىڭ جەمقورلىققا قارسى كۇرەس قىزمەتى تەرگەۋ باسقارماسىمەن بوپسالاۋ بويىنشا قوزعالعان قىلمىستىق ءىس توقتاتىلدى.

بۇل تۋرالى «قازاقپارات» اگەنتتىگىنە ارىستانبەك مۇحامەدي ۇلىنىڭ زاڭگەرى ەسكەندىر الىمبايەۆ حابارلادى. ءمينيستردىڭ قۇقىعىن قورعاعان ايتۋىنشا، اتالمىش قىلمىستىق ءىس تالعات جانىبەكوۆتىڭ مالىمدەمەسىنەن كەيىن قوزعالعان. ونىڭ ناتيجەسى بويىنشا، مادەنيەت مينيسترلىگىنىڭ لاۋازىمدى قىزمەتكەرلەرى تاراپىنان ەشقانداي زاڭبۇزۋشىلىقتار انىقتالماعان.

«تالعات جانىبەكوۆتىڭ مالىمدەمەسى بويىنشا، تەرگەۋ جۇمىستارى جۇرگىزىلدى، ونىڭ ايتقان دەرەكتەرى تەكسەرىلدى. دەگەنمەن مينيستر تاراپىنان، مينيسترلىكتىڭ قىزمەتكەرلەرى تاراپىنان ەشقانداي زاڭبۇزۋشىلىقتار بولماعانى انىقتالدى»، - دەدى ە. الىمبايەۆ.

«الدىن الا تەرگەۋ بارىسىندا، ياعني بەتپە-بەت سويلەسۋ كەزىندە، رەجيسسەر ءوزى ايتقان سوزدەردەن باس تارتتى. ول ونىڭ ءسوزىن دۇرىس تۇسىنبەدى، ناقتى ەشتەڭە مەڭزەمەگەنىن ايتىپ اقتالدى. ا. مۇحامەدي ۇلى ءۇشىن قاراجات الۋ تۋرالى اڭگىمە ەشكىممەن جۇرگىزبەگەن، بوپسالاۋ، «جارنا» تولەۋ جانە بيۋدجەت قاراجاتىن ۇرلاۋ جونىندەگى مالىمدەمەنى تۇسىندىرە المادى، سەبەبى ونداي مالىمدەمەلەردى ول جاساماعان»، - دەدى ءمينيستردىڭ زاڭگەرى.

ونىڭ ايتۋىنشا، مينيستر ا. مۇحامەدي ۇلىنىڭ ار-نامىسىن، بەدەلىن قورعاۋ ءۇشىن ازاماتتىق سوتقا بەرگەن شاعىمى ارىزدانۋشىنىڭ ءوتىنىشى بويىنشا قاراۋسىز قالادى.

«ءبىز ت. جانىبەكوۆ تاراپىنان رەسمي تۇردە كەشىرىم سۇراۋدى كۇتكەن ەدىك. بەتپە-بەت كەزدەسۋدە، ول ءوزىنىڭ بۇرىن ايتقان مالىمدەمەلەرىنەن تولىق باس تارتقاننان كەيىن، ءبىز ونىڭ رەسمي وكىلدەرى ارقىلى ونىڭ بۇل سوزدەرىن ەرىكتى تۇردە كوپشىلىك الدىندا جوققا شىعارۋىن سۇرادىق. الايدا ت. جانىبەكوۆ تاراپىنان وسىعان بايلانىستى قاندايدا ءبىر شارالار جاسالعان جوق»، - دەپ ءتۇيدى ءسوزىن ە. الىمبايەۆ.

ەسكە سالا كەتەيىك، 12-شىلدە كۇنى، رەجيسسەر تالعات جانىبەكوۆ ق ر مادەنيەت جانە اقپارات ءمينيسترى ارىستانبەك مۇحامەدي ۇلىن بۇقارا الدىندا قاراجات بوپسالادى دەپ ايىپتاعان بولاتىن. وسىدان سوڭ، مينيستر ءوزىنىڭ ار-نامىسىن قورعاۋ ماقساتىندا زاڭگەر جالداپ، رەجيسسەردى سوتقا بەرگەن بولاتىن.

اۆتور: جاسۇلان جولدىبايەۆ