جەزقازعاندا پوليتسەيدىڭ بەتىنە ءزار شاشقان جۇرگىزۋشىگە ۇكىم شىعارىلدى

استانا. قازاقپارات - جەزقازعاندا پوليتسەيدىڭ بەتىنە ءزار شاشقان جۇرگىزۋشىگە ەكى جىلعا بوستاندىعىن شەكتەۋ جازاسى تاعايىندالدى.
None
None

بىلتىرعى جىلدىڭ جەلتوقسان ايىندا پوليتسەيدىڭ ۇستىنە ءزارىن توككەن جەزقازعاندىق ازامات ەكى جىل باس بوستاندىعىنان ايىرىلدى. سونداي- اق، ول 200 ايلىق ەسەپتىك كورسەتكىش كولەمىندە ايىپپۇل تولەۋگە مىندەتتەلدى.

بۇل تۋرالى قاراعاندى وبلىستىق سوتىنىڭ باسپا ءسوز قىزمەتى حابارلادى.

وقيعا 2015 -جىلى جەلتوقساننىڭ باسىندا ورىن الدى. قىلمىستىق ءىستىڭ قۇجاتتارىنا سۇيەنسەك، 21-جاستاعى پوليتسيا سەرجانتى تولەگەن يگىبەكوۆ جول- ءپاترۋلدى پوليتسياسىنىڭ ەكيپاجىمەن بىرگە زاڭعا باعىنباعان، كۇماندى «حيۋنداي» اۆتوكولىگىن نىساناعا العان. قايرات ەلۋبايەۆ جۇرگىزگەن كولىكتى پوليتسيا قىزمەتكەرلەرى تەك كەڭگىر اۋىلىنا جەتكەن كەزدە توقتاتا العان.

زاڭ بۇزۋشىنى پوليتسەيلەر قان قۇرامىندا الكوگولدىڭ بار-جوقتىعىن انىقتاۋ ءۇشىن ناركولوگيالىق ديسپانسەرگە جەتكىزگەن. ساراپتاما قورىتىندىسىمەن كەلىسپەگەن ەلۋبايەۆ نەسەپ اناليزىن تاپسىرۋدى تالاپ ەتكەن. دارەتحانادان اناليزىن الىپ شىققان ەلۋبايەۆ ونىسىن قۇقىق قورعاۋ ورگاندارى قىزمەتكەرلەرىنىڭ ۇستىنە شاشىپ جىبەرگەن. سوسىن پوليتسيا سەرجانتى تولەگەن يگىبەكوۆ ونى شاپالاقپەن تارتىپ جىبەرگەن ەدى.

2016 -جىلدىڭ ءساۋىر ايىندا جەزقازعان قالالىق سوتى تولەگەن يگىبەكوۆتى بەس جىل باس بوستاندىعىنان ايىرۋ جانە قاتاڭ رەجيمدى تۇزەتۋ كولونياسىنا قاماۋ تۋرالى ۇكىم شىعارعان بولاتىن. سوتتىڭ ۇكىمىن سوت القاسى قاراپ شىققاننان كەيىن، ونىڭ جازاسى جەڭىلدەتىلگەن. اقىرىندا ەكس-پوليتسەي سوت زالىندا بوساتىلعان ەدى.

ال قايرات ەلۋبايەۆتىڭ ۇستىنەن ق ر قىلمىستىق كودەكسىنىڭ 4 -تارماعى بويىنشا قىلمىستىق ءىس قوزعالعان.

«سوت 30 جاستاعى قايرات ەلۋبايەۆتى كىنالى دەپ تانىپ، ەكى جىل باس بوستاندىعىنان ايىرۋ جانە 200 ايلىق ەسەپتىك كورسەتكىش كولەمىندە ايىپپۇل تولەۋگە ۇكىم شىعاردى. ەلۋبايەۆ قىلمىستىق كودەكستىڭ ءتورت تارماعىنا سايكەس 6 ەپيزود بويىنشا قىلمىستىق جاۋاپكەرشىلىككە تارتىلدى: «بيلىك وكىلىن بالاعاتتاۋ»، «بيلىك وكىلىنە باعىنباۋ»، «بيلىك وكىلىنە قاتىستى كۇش قولدانۋ»، «بۇزاقىلىق»، - دەپ مالىمدەدى وبلىستىق سوت باسپا ءسوز قىزمەتىنىڭ جەتەكشىسى گۇلبارشىن جىتىكوۆا.

سوتتالۋشى ەلۋبايەۆ ءوز كىناسىن تولىقتاي مويىندادى. سوت ونىڭ نارەستەسىنىڭ بار ەكەندىگىن ەسكەرىپ، جازاسىن جەڭىلدەتكەن.

«قازاقستاندا، ونىڭ ىشىندە، اسىرەسە، جەزقازعاندا ادىلدىك جوق. ونىڭ جازاسى تىم جەڭىل. ونى شاپالاقپەن ۇرعانىم ءۇشىن ماعان بەس جىل بەردى. ال مىناداي تارماقتار بويىنشا جاۋاپقا تارتىلعان وعان نەبارى ەكى جىل. بۇل تىم جەڭىل جازا»، - دەدى ەكس-پوليتسەي يگىبەكوۆ.

ونىڭ سوزدەرىنە سۇيەنسەك، 2016 -جىلدىڭ ماۋسىمىندا باستالعان سوت پروتسەسى مەملەكەتتىك ايىپتاۋشىلار اۋىسقاندىقتان جانە سوتتالۋشىنىڭ اياق استىنان اۋىرىپ قالعاندىعىنان كەيىنگە قالدىرىلىپ وتىرعان.

«نەگىزى ەكەۋمىزدىڭ ءىسىمىزدى بىرگە قاراستىرۋلارى كەرەك ەدى. الايدا ەكەۋمىزدىڭ ۇستىمىزدەن ەكى بولەك ءىس قوزعالدى. ەگەر ەكى ءىستى بىرىكتىرسە، ونىڭ جازاسى اۋىرلاي تۇسەر ەدى»، - دەپ مالىمدەدى يگىبەكوۆ.

سونىمەن قاتار، ەكس-پوليتسەي بوستاندىققا شىققالى بەرى جۇمىس تاپپاي جۇرگەندىگىن ايتتى. ول ەكى بالانىڭ اكەسى. كىشىسى العاشقى سوت ۇكىمىنە شاعىم تۇسىرۋدەن بىرنەشە كۇن بۇرىن عانا دۇنيەگە كەلگەن.

«جۇمىسسىزبىن، شارتتى تۇردە بەس جىلعا زاڭ الدىندا جاۋاپتىمىن. مەنى كىم جۇمىسقا الار دەيسىز؟ ەشكىم كومەكتەسىپ جاتقان جوق. قىزمەتىمدى قايتارىپ بەرەدى دەپ ۋادە بەرگەن، الايدا ول دا جوق. شىنىمدى ايتسام، ەندى قازاقستاندا ادىلدىك بار دەگەنگە سەنبەيمىن. بىزدە سوت ادىلدىگى دەگەن مۇلدەم جوق»، - دەپ تۇيىندەدى ءسوزىن يگىبەكوۆ.

پوليتسەيگە ۇكىم شىعارىلعاننان كەيىن، ءى ءى م باسشىسى قالمۇحانبەت قاسىموۆ جوعارعى سوتقا قىزمەتكەردىڭ جازاسىن جەڭىلدەتۋ تۋرالى ءوتىنىش حاتىن جولداعان بولاتىن.

ەسكە سالايىق، قالالىق جول- پاترۋلدىك پوليتسياسىنىڭ قىزمەتكەرى ماس جۇرگىزۋشىنى شاپالاقپەن ۇرعانى ءۇشىن سوتتالعان بولاتىن. جۇرگىزۋشى قانىندا تابىلعان الكوگولدى كورسەتكەن كۋالاندىرۋ قورىتىندىلارىمەن كەلىسپەي، ءزارىن سەرجانتقا شاشىپ جىبەرگەن. وسى كەزدە سەرجانت ونى شاپالاقپەن ۇرعان. كەيىن جۇرگىزۋشى قامالىپ، كەپىلاقىمەن بوساتىلعان. وسىدان كەيىن 5 جىلعا سوتتالعان پوليتسەيدىڭ ايەلى مالىمدەمە جاساعان بولاتىن.

سوڭعى جاڭالىقتار