جەرگە قاتىستى كوتەرىلگەن بارلىق سۇراقتى حالىققا تۇسىندىرەتىن ءبىر قۇجات كەرەك - ايدوس سارىم

استانا. قازاقپارات - جەر كوميسسياسىنىڭ مۇشەسى، ساياساتتانۋشى ايدوس سارىم جەر كوميسسياسىنىڭ قاتارىنان ۇكىمەتتە ەل مۇددەسىن جەتكىزەتىن شاعىن توپتى قالدىرۋدى ۇسىندى.

 «بىزدەر قازىر ءتورت جۇمىس توبىن تاراتايىق، ءبىر عانا كىشىگىرىم ءبىزدىڭ توپتىڭ ءبىرقاتار جەتەكشىلەرى بار، تاعى 2-3 ادامدى قوسىپ، بولاشاققا قاجەتتى، ناقتى وزگەرىستەر «وسىنداي- وسىنداي بولسىن» دەپ كوتەرىلگەن ماسەلەلەردىڭ بارلىعىن قاعازعا تۇسىرەيىك، كەلەسى جيىندا سونى بەكىتەيىك. مەنىڭ ويىمشا، كوتەرىلگەن بارلىق سۇراقتاردى حالىققا تۇسىندىرەتىن قۇجات كەرەك سياقتى. ويتكەنى، ءبىز ءۇش اي بويى قانشاما ايماققا باردىق، كوپتەگەن ماسەلە كوتەرىلدى. سوندىقتان، قۇجاتتى جاسايتىن ناقتى 7-8 ادامدى قالدىرىپ، سولارعا ۇسىنىسىمىزدى ايتساق. قۇجاتتا مىناداي ماسەلەلەر بويىنشا وسى كوميسسيا مۇشەلەرى مامىلەگە كەلدى، بۇل مىناداي زاڭدارعا وزگەرىستەرگە الىپ كەلۋى كەرەك دەگەن سياقتى ماسەلەلەر قامتىلۋى قاجەت»، - دەدى ا. سارىم.

سونىمەن قاتار، ايدوس سارىم كوميسسيا وتىرىسىندا بەكىتىلگەن باستى ماسەلەلەردى ۇكىمەتتە، پارلامەنتتە قورعايتىن شاعىن توپ قۇرۋدى ۇسىندى.

«جانە وسى توپتىڭ ىشىندە، كوميسسيا قۇرامىندا ۇلكەن بەلسەندىلىك كورسەتكەن ازاماتتاردى قالدىرىپ، ەرتەڭگى كۇنى زاڭنىڭ پارلامەنتكە تۇسكەن كەزىندە ۇكىمەتپەن بىرگە قورعاسىن. حالىقتىڭ ءسوزىن تىڭداپ ەدىك، ءبىزدىڭ ءسوزىمىز ءوتىمدى بولسىن دەگەن سياقتى ۇكىمەتكە دە قاجەت ءبىر تەتىك بولسا»، - دەدى ول.

 اۆتور: جاسۇلان جولدىبايەۆ