ناعىز حالىقتىق شەشىمدى جاساعان ەلباسىنا ريزاشىلىعىمىزدى ءبىلدىرۋىمىز كەرەك - بەكبولات تىلەۋحان

 استانا. قازاقپارات - جەر كوميسسياسىن قۇرۋ تۋرالى ناعىز حالىقتىق شەشىمدى شىعارعان ەلباسى نۇرسۇلتان نازاربايەۆقا ريزاشىلىعىمىزدى ءبىلدىرۋىمىز كەرەك.

 بۇل تۋرالى بۇگىن جەر رەفورماسى جونىندەگى كوميسسيانىڭ وتىرىسىندا ق ر پارلامەنتى ءماجىلىسىنىڭ دەپۋتاتى بەكبولات تىلەۋحان ءمالىم ەتتى.

«قاندايدا ءبىر ماسەلەنى اقىل- پاراساتپەن شەشۋ كەرەك دەپ ەسكەرتە وتىرىپ، جەر رەفورماسى بويىنشا كوميسسيا قۇرۋ تۋرالى ناعىز حالىقتىق شەشىمدى شىعارعان ەلباسى نۇرسۇلتان نازاربايەۆقا ريزاشىلىعىمىزدى ءبىلدىرۋىمىز كەرەك دەپ ويلايمىن. بۇل ەلىمىزدىڭ دەموكراتيالانۋى جولىنداعى سونى ءۇردىس بولدى، كوميسسيا بىرنەشە اي بويى جۇرگىزگەن جۇمىسى اۋقىمدى ءارى ناتيجەلى بولعانىنا بارلىقتارىڭىز كۋاسىزدەر. سىندارلى سۇحبات ورىن الدى. ءاربىر كوميسسيا مۇشەسى شىن مانىندە ناقتى ناتيجەگە قول جەتكىزۋ جولىندا جۇمىس ىستەدى. سونىمەن قاتار كوميسسيا اياسىندا قۇرىلعان مىنا 4 جۇمىس توبىنىڭ اتسالىسۋىمەن كولەمدى جۇمىستار اتقارىلدى. كۇن تارتىبىنە جەر مەن حالىقتىڭ تاعدىرى شىعارىلعاندىقتان، حالىق تىس قالعان جوق، ءوز ويلارىن ءبىلدىردى. بارلىق پىكىرلەر قارالىپ، سارالاندى»، - دەدى دەپۋتات.

سونداي- اق ونىڭ پكىرى بويىنشا، جەردى جالعا بەرۋگە قاتىستى موراتوريدى 5 جىلعا سوزۋدى قولداۋ قاجەت.

«مەنىڭ پايىمداۋىمشا، جەرگە قاتىستى ءتۇيىندى ماسەلەلەردى ءبىر ساتتە، تۇبەگەيلى شەشە سالۋ مۇمكىن ەمەس. ەل مۇددەسىندەگى ماسەلە دە جۇيەلى تۇردە قارالۋىن تالاپ ەتەدى. ويتكەنى ءۇش ايدا ءبىز حالىقتىڭ پىكىرىنە قانىقتىق، بۇقارا تالابى، حالىقتىڭ اۋانى بەلگىلى بولدى. ەلدىڭ كوكەيىندەگى تۇيتكىلدى ماسەلەلەردى شەشۋدىڭ ەڭ ءبىر ۇتىمدى ءادىسىن جاڭا اسقار يسابەك ۇلى (مىرزاحمەتوۆ، كوميسسيا ءتوراعاسى - رەد. ) ايتىپ وتكەن سياقتىسىز، شىنىندا دا 49 جىلعا بەرۋ ورنىندا قالسا، شەكتى مولشەرى، جايىلىم، شابىندىق ماسەلەلەرى ايتىلدى. سونىڭ ىشىندە ايرىقشا ەلدىڭ كوكەيىندە نەگىزگى جەردىڭ شەتەلدىكتەرگە جالعا بەرىلۋىنە قاتىستى، جەردىڭ ساتىلۋىنا بايلانىستى بىردەن شەشىلە سالاتىن نارسە ەمەس، وعان موراتوري جاريالاپ، وعان توقتاۋى قاجەت دەگەن ماسەلەنى ءبىز دە ۇسىنعان بولاتىنبىز. الداعى ۋاقىتتا جەرگە قاتىستى ماسەلەلەردى بايىپپەن، اسىقپاي، شەشىمىن تاپپاعان بارلىق ماسەلەلەردى شەشۋ بويىنشا كەشەندى جۇمىس جاساۋىمىز كەرەك. سونىمەن بىرگە ەندى مىنا «كۇلتوبەنىڭ باسىندا كۇندە جيىن» جاساي بەرۋدىڭ قانشالىقتى قاجەتى بار دەپ ويلايمىن. توقسان اۋىز ءسوزدىڭ توبىقتاي ءتۇيىنىن جاسايتىن ۋاقىت كەلگەن سياقتى»، - دەدى جەر رەفورماسى بويىنشا كوميسسيانىڭ مۇشەسى.

 اۆتور: جاسۇلان جولدىبايەۆ