دارىگەرلەر شاتاسىپ بوساناتىن ايەلىن توسىپ وتىرعان جىگىتتىڭ گەموررويىن الىپ تاستاعان

دارىگەرلەر ابدەن وتا جاساپ بولعاننان كەيىن بارىپ، ناۋقاستى شاتاستىرىپ العاندارىن بىلگەن.
بۇل تۋرالى China News باسىلىمى جازدى.
بۇل جايت لياۋنيڭ ولكەسىنە قاراستى شەنيان قالاسىنداعى اۋرۋحانالاردىڭ بىرىندە بولعان. 29 جاستاعى جىگىت اۋرۋحانا دالىزىندە 40 مينۋتتاي وتىرىپ، وتا ارقىلى بوسانىپ جاتقان ايەلىن كۇتكەن. دارىگەردەن حابار توسىپ وتىرعان جىگىتتى اقحالاتتىلاردىڭ ءبىرى كورشى ەسىككە شاقىرادى. دارىگەر ەشتەڭە تۇسىندىرمەستەن جىگىتكە تەز ارادا شەشىنۋدى بۇيىرعان.
«جىگىتتىڭ «نە ءۇشىن» دەگەن سۇراعىنا حيرۋرگ «ايتقاندى ىستە» دەپ قىسقا جاۋاپ بەرگەن. جىگىت دارىگەرمەن ءسوز تالاستىرمايىن دەپ، شەشىنىپ وزىنە كورسەتكەن كەرەۋەتكە جاتا كەتكەن. ول بوسانىپ جاتقان ايەلىنە وزىنەن كومەك كەرەك دەپ ويلاعان. «جابىرلەنۋشى» وتا جاسالىنىپ جاتقان كەزدە كورشى بولمەدە دۇنيەگە كەلگەن بالاسىنىڭ داۋسىن ەستىگەن.
جىگىت ابدەن وتا جاسالىپ بىتكەننەن كەيىن بارىپ، دارىگەردەن بولعان جايتتى ءتۇسىندىرۋدى تالاپ ەتكەن.
اۋرۋحانا اكىمشىلىگى جىگىتتى باسقا ناۋقاسپەن شاتاستىرىپ العاندارىن مويىنداعان. كەتكەن قاتەلىك ءۇشىن وعان 750 دوللار كولەمىندە وتەماقى تولەۋگە ۋادە بەرگەن. دارىگەرلەر شاتاسقانىمەن جىگىتتە كوتەۋدىڭ (گەموررويدىڭ) بولعانىن ايتادى.
اۋرۋحانا زاڭگەرى كەتكەن قاتەلىكتە جىگىتتىڭ دە ايىبى بارىن ايتقان. سەبەبىن كامەلەت جاسىنا تولعان ازامات ءوز قادامى مەن ءىس- ارەكەتىنە جاۋاپ بەرۋى كەرەك ەكەندىگىمەن تۇسىندىرگەن.
ويلاماعان جەردەن وتا جاساتقان جىگىت بالاسى مەن ايەلىنىڭ اماندىعىنا ريزا. تەك وزىنە كۇتىم كەرەك بولعاندىقتان ولارعا ءوزى ويلاعانداي قامقورلىق كورسەتە الماي جاتقانىنا كوڭىلى تۇسەدى ەكەن.
Stan.kz