جەتى رەت تۇرمىس قۇرعان كەلىنشەكتىڭ جان سىرى

«ەشكىم جەتىسكەننەن جەتى بايعا تيمەيدى» دەپ باستادى وتىزعا دا تولماعان شولپان ەسىمدى كەلىنشەك.
«العاش رەت ون توعىز جاسىمدا تۇرمىسقا شىقتىم. ءوز ەركىممەن ەمەس، ارينە. ول كەزدە تىم جاس بولدىم. وڭتۇستىكتىڭ جازىلماعان «زاڭى» ، ويدان شىعارىلعان «سالتى» بويىنشا مەنى كورشى اۋىلدىڭ جىگىتتەرى «ۇرلاپ» كەتكەن بولاتىن. ۇلكەندەردىڭ نۇسقاۋىمەن سوندا قالۋىما تۋرا كەلدى. الايدا قالاماعان، سۇيمەگەن ادامىممەن تۇرا المادىم» ، - دەگەن شولپان ءبىر جىلدان سوڭ اجىراسىپ كەتكەنىن ايتادى.
جولداسىنان اجىراسىپ اۋىلدا جۇرە الماعان ول اعايىننىڭ سوزىنەن قاشىپ استاناعا كەتەدى.
«استانادا كۇن كورىس قامىمان ءدامحانالاردىڭ بىرىندە جۇمىس ىستەپ ءجۇرىپ، سول جەردە «سلۋجەبنىي روماندى» باستان وتكەردىم. ادمينيستراتور جىگىت مەنى ۇناتىپ، قىر سوڭىمنان قالمايتىن. بىرنەشە اي بىرگە تۇرىپ كورگەن سوڭ، ۇيلەنۋگە شەشىم قابىلدادىق» ، - دەيدى كەلىنشەك.
الايدا، ەكىنشى نەكەدە ەنەسى كەلىنىن قابىلداي قويماپتى. وعان بىردەن ءبىر سەبەپ - كەلىنىنىڭ بۇرىن تابالدىرىق اتتاعانى.
ەنە مەن كەلىن جاراسپاعان سوڭ، ورتاداعى ۇل ومىردەن باز كەشىپ، ۇيدەن كەتىپ تىنىپتى.
وسىلايشا باقىتتى بولامىن دەگەن شولپان ءبىر- اق كۇندە كۇيەۋسىز قالعانىمەن قويماي، جۇمىستان دا ايىرىلا جازدادى. مۇنىڭ جاعدايىنان حاباردار ءدامحانانىڭ يەسى بۇعان ەكىنشى ايەل بولۋعا ۇسىنىس جاسايدى. استانادا بارار جەر باسار تاۋى قالماعان كەلىنشەك ءبىر كۇننىڭ ىشىندە ءۇشىنشى كۇيەۋگە شىعىپ كەتەدى.
باعىنان سورى قالىڭ ايەل ەندى دۇرىس ءومىر سۇرەم بە دەگەندە ءۇشىنشىسى ناشاقور بولىپ شىعادى. كۇيەۋىنىڭ مۇنىسىنان حابارسىز بولعان ايەلدىڭ تاڭى تاياقسىز اتپايتىن بولادى. تۇنىمەن «شەگىپ» كەلگەن كۇيەۋى تاڭ اتا ەسىكتى قاعادى دا، ەكى قوڭىراۋدان اشىلماسا، «ۇيدە كىم بار ەدى» دەپ ساباي جونەلەدى.
ءبىر كۇنى سونداي «سوعىستىڭ» ۇستىنەن تۇسكەن اناسى كيىمدەرىن جيناپ قىزىن اۋىلىنا الىپ كەتەدى.
اۋىلدا ءبىر جىلعا جاقىن جۇمىسسىز جاتقان «كۇيەۋدەن قايتقان» قايىن ءسىڭىلىسىن جەڭگەسى «باقىت تىلەگەن» بولىپ تاعى بىرەۋمەن تانىستىرادى. جەڭگەسىنىڭ ايتۋىنشا ونىڭ تراكتورى بار، كورشى ءۇش اۋىلدىڭ بار ادامى وسىنىڭ تراكتورىنا قاراپ تۇر، تابىسى كەرەمەت كورىنەدى. «قالادا ءشوپ شەگىپ، ەسىرتكى قولداناتىنداردى كورگەنىم دە جەتەر» دەپ ويلاعان ايەل وسى جولى شىنىمەن «بارعان جەرىمە تاستاي باتىپ، سۋداي سىڭەمىن» دەگەن سەنىممەن ءشوپ شاباتىن جىگىتكە تۇرمىسقا شىعادى.
«ءتورتىنشى كۇيەۋگە شىققان سوڭ عانا ءتۇسىندىم. ەشكىمگە كەرەك ەمەس ەكەنمىن. جەڭگەم دە قىرىق وتىرىگىن ايتىپ، مەنەن قۇتىلۋدىڭ امالىن جاساعان ەكەن عوي» دەگەن شولپان بۇل كۇيەۋىنىڭ «اتاقتى» تراكتورى ءبىر كۇن جۇرسە، ءبىر اي جۇرمەيتىن بۇزىلعىش، ال ءوزى ءبىر كۇن ساۋ بولسا، ەكى كۇن ماس بولىپ جۇرەتىن ماسكۇنەم بولىپ شىققانىن ايتادى.
«بارىنە قولىمدى ءبىر سىلتەدىم دە استاناعا قايتىپ كەتتىم. جۇمىس ىستەپ، ەشكىمگە ماسىل بولعىم كەلمەدى» ، - دەيدى شولپان.
«استاناعا كەلىپ قوناق ۇيلەردىڭ بىرىنە جۇمىسقا تۇردىم. بولمەلەردى جينايمىن. تابىسىم قارا باسىمدى اسىراۋعا جەتىپ جاتتى» دەگەن شولپانعا قوناق ۇيگە كەلۋشى قالتالى ازاماتتاردىڭ ءبىرى «عاشىق» بولىپ قالىپتى.
«قوناق ۇيدە بولمە جيناعانشا، قالتالى ەركەك قامىمدى جاسار» دەگەن ويمەن كوڭىل قوسىپ، كەلىسىمىمدى بەردىم. ءبىر جىلدان استام بىرگە تۇردىق. قىز بالانى ومىرگە اكەلدىم. ءبارى وسى كەزدەن باستاپ وزگەردى. ءبىرىنشى ايەلىندە بەس قىزى بار كۇيەۋىم مەن قىز تۋعان سوڭ ءبىرجولا كەتىپ تىندى. وعان مەن دە، قىزىم دا كەرەك بولمادىق» ، - دەيدى.
«سەنەسىز بە، مەن ومىرىمدە 30 عا كەلمەي جەتى كۇيەۋگە شىعامىن دەگەن ءۇش ۇيىقتاسام تۇسىمە كىرمەگەن. قىزىممەن جۇمىسقا دا شىعا المايتىن بولدىم. استانادا قالاي كۇن كورەم، پاتەراقى، تاماق ءبارى قىمبات. بۇل ۋاقىتتا بۇرىنعىداي شەشەم دە جوق، قايتىس بولعان. قايدا بارارىمدى بىلمەدىم» دەگەن شولپان ءتىپتى كوشەدە قايىر سۇراۋدى دا ويلاپتى.
الايدا وسى جولى باقىتتى بولارىنا «كەپىلدىك» بەرگەن جەڭگەسى 27 جاستاعى قايىن ءسىڭىلىسىن ءوزىنىڭ توركىن جاعىنداعى كورشىسىمەن تانىستىرادى. ماقۇلعا كەلگەن ەكەۋى شاڭىراق كوتەرەدى. راسىندا مەشىتكە بارىپ، نەكە قيدىرىپ، ءتىپتى نەكەلەرىن زاڭداستىرعان دا وسى التىنشى كۇيەۋى بولادى.
«وزىمە دە، قىزىما دا وڭ كوزقاراستا بولدى. ەندى 38 گە كەلگەنشە ۇيلەنبەي ءجۇرۋىنىڭ دە ءبىر سەبەبى بار شىعار. تاعدىر ماعان وسى كىسىنى جازىپتى» دەپ ويلايتىنمىن. الايدا سونشا جاسقا كەلگەنشە ۇيلەنبەي ءجۇرۋىنىڭ سەبەبى بار ەكەن دا. دەنساۋلىعىندا كىنارات بار مەكەن، ايتەۋىر ومىرىمدەگى «جالعىز» زاڭدى كۇيەۋىم ءوز- وزىنە قول جۇمساپ قايتىس بولدى. جولداسىمنىڭ قىرىق كۇندىك اسى وتكەن سوڭ، مەن قايىن جۇرتقا سىيمادىم. انىعىندا سىيدىرمادى. بوتەنسىڭ، بوتەننىڭ قىزى، كەتىڭدەر دەگەن اڭگىمە ايتىلدى» ، - دەيدى شولپان.
تاعدىردىڭ تاۋقىمەتىن كوپ كورگەن كەلىنشەك اۋىلدا ءجۇرۋدىڭ ارتىق ەكەنىن تۇسىنەدى. وسىلايشا تاعى دا «ۇيرەنگەن» استاناسىنا اتتانادى. بۇل جولى قىزىن ۋاقىتشا بالالار ۇيىنە وتكىزىپ كەتىپ، اياققا تۇرىپ الۋدى ويلايدى.
استاناعا بارار جولدا جولسەرىكپەن اڭگىمەسى جاراسقان كەلىنشەك ءوزىن اۋىلداستارى بۇزىلعان ايەل دەپ سانايتىنىن ايتىپ قىنجىلدى. جولسەرىك تە اجىراسقان ەركەك ەكەن، اڭگىمەلەرى جاراسىپ، تار كۋپەدە قوسىلدى.
وسىلايشا ەلگە ايتپاي، جەتىنشى كۇيەۋگە شىعادى. دەگەنمەن التى كۇيەۋدەن قايتقانىن بەتىنە باساتىن جولسەرىك كۇيەۋ شولپاندى كۇندە ۇرىپ- سوعۋدان شارشامايدى.
«سەنىڭ ادەمىلىگىڭە قىزىعىپ قالدىم. التى بايدان قايتقانىڭدى بىلمەدىم دەپ كۇندە ءبىر اڭگىمەنى ايتىپ ۇرا بەرەدى. اجىراسىپ كەتەيىن دەسەم، قايدا، كىمگە بارام؟ كەيىن قىزىمدى قالاي الام؟ وسىنىڭ ءبارىن ويلاسام، باسىم قاتىپ كەتەدى» دەگەن كەلىنشەك كوپشىلىكتەن كەڭەس سۇراپ، ەندىگى بولاشاعىن قايتەرىن بىلمەي وتىر.
ينديرا قۋات
«قامشى» سىلتەيدى