ەرماحان ىبرايىموۆ: وليمپيادادا قازاقستاندىقتار ادەمى بوكس ۇلگىسىن كورسەتىپ كەلەدى

استانا. قازاقپارات - سيدنەي وليمپياداسىنىڭ چەمپيونى، تانىمال قازاقستاندىق مامان ەرماحان ىبرايىموۆ ريو- دە- جانەيرو وليمپياداسىنداعى قازاقستاندىق بوكسشىلاردىڭ اياق الىسىن مۇقيات باقىلاپ كەلەدى.
None
None

قازاقستان بوكس فەدەراتسياسىنىڭ رەسمي ساۋالىنا بەرگەن سۇحباتىندا تانىمال سپورتشى برازيليا وليمپياداسىنداعى قازاقستاندىق بوكسشىلاردىڭ مۇمكىندىكتەرى تۋرالى ايتىپ بەردى.

«بيىلعى وليمپيادادا بىزدە وتە جاقسى كوماندا جاساقتالدى»، - دەيدى ەرماحان ىبرايىموۆ. - بارلىق جىگىتتەر جاقسى دايىندالىپتى جانە جالپى وسى وليمپيادادا ادەمى بوكس كورسەتىپ كەلەدى. ارينە، بەرىك ابدراحمانوۆقا امەريكالىق بوكسشىدان جەڭىستى جۇلىپ الۋعا ءسال-اق قالعان ەدى. بەرىككە وتە مىقتى قارسىلاس كەزىگىپتى، ول - وتە جىلدام، تەحنيكاسى جوعارى، جەڭىسكە قۇشتار. ابدراحمانوۆ وليمپيادادا تۇعىردان كورىنەتىن سوڭعى مۇمكىندىك تۋعانىن ءبىلدى. مۇمكىن سەنىمدىلىك ازداۋ بولدى ما دەپ تە ويلايمىن. جاقىپوۆقا كەلەتىن بولساق، بوكسشىمىز جاس ەمەس، جەڭىلىس سەبەبى دە سوندا جاتقان شىعار. بۇل سالماقتا نەگىزىنەن جاستار ونەر كورسەتەدى. حاسانبوي دۋسماتوۆ ءبىرجاننىڭ جانىندا جىلدام ءارى سەرگەك كورىندى».

- ابىلايحان ءجۇسىپوۆتىڭ جەڭىلىسىنە قاتىستى پىكىرىڭىز قانداي؟

- ول ءالى جاس بوكسشى، ال وليمپيادادا ونەر كورسەتۋ تىپتەن قيىن. بۇل ويىندار - بوكسشىمىز ءۇشىن ۇلكەن مەكتەپ بولماق. وعان وسى العان قارقىنمەن العا جىلجي بەرۋ كەرەك. جالپى ماككورماكقا قارسى جەكپە- جەكتە ءجۇسىپوۆ جامان جۇدىرىقتاسقان جوق. ەگەر كۇش الەۋەتىن ارتتىرىپ، تىڭعىلىقتى دايىندىقپەن كەلەتىن بولسا، كەلەسى وليمپيادادا مەدالعا تالاسا الادى.

- قالعان بوكسشىلارىمىز قازاقستاندىقتاردى قۋانتىپ، كەلەسى كەزەڭگە ءوتتى.

- ماعان جارتىلاي فينالعا وتكەن ۆاسيليي ليەۆيت ۇنادى. ونىڭ «التىن» الاتىن بارلىق مۇمكىندىكتەرى بار دەپ سانايمىن. ريودا ەكى جەكپە- جەك وتكىزگەن ليەۆيتتىڭ ونەرىنە قاراپ، ونىڭ قانشالىقتى جاقسى فورمادا ەكەنىن بايقاۋ قيىن ەمەس. كەلەسى كەزدەسۋدە كۋبالىق بوكسشىعا قارسى تۇرۋ اۋىر بولاتىنى انىق، ءبىراق ليەۆيت بۇرىنعى كەتكەن ەسەسىن قايتارۋدى تاعاتسىزدانا كۇتىپ وتىرعان دا بولار جانە فينالعا شىعۋ ءۇشىن بارلىعىن ىستەيدى. دانيار ەلەۋسىنوۆ، ادىلبەك نيازىمبەتوۆ، جانىبەك ءالىمحان ۇلى، يۆان دىچكو - مەدال الاتىن جاقسى مۇمكىندىكتەرگە يە بوكسشىلار. بۇل جىگىتتەر التىن مەدال ءۇشىن قولدان كەلەر بارلىق كۇشتەرىن سالادى.

- وليمپيادا فينالىنا بەرگىسىز دىچكو مەن مەدجيدوۆ اراسىنداعى جەكپە- جەككە قاتىستى نە ايتا الاسىز؟

- ەكەۋىنىڭ ءۇش جىل بۇرىنعى كەزدەسۋىن بارلىعى بىلەتىن شىعار. الايدا يۆاننىڭ سول كەزدەن بەرى تاجىريبەسى تولىستى، وزىنە دەگەن سەنىمى ارتتى. ەسە قايتارۋعا اسىعىپ جۇرگەن دىچكو ءوز ءىسىن جاقسى اتقارىپ شىعاتىنىنا سەنىمدىمىن. وسى جەكپە- جەكتە دىچكو جەڭەدى دەپ بولجاپ وتىرمىن.

اۆتور: جاسۇلان جولدىبايەۆ

سوڭعى جاڭالىقتار