دميتري بالاندين: مەن چەمپيون بولعانىمدى باسقا سپورتشىلار كەلىپ، قۇتتىقتاپ جاتقاندا عانا ءبىلدىم

ريو- دە- جانەيرو. قازاقپارات - كەشە برازيليانىڭ ريو- دە- جانەيرو قالاسىندا ءوتىپ جاتقان وليمپيادا ويىندارىندا ەكىنشى التىن مەدالدى ءجۇزۋشى دميتري بالاندين ەل قورجىنىنا سىيلاعان ەدى.
None
None

بۇگىن ريوداعى قازاقستاننىڭ باسپا ءسوز ورتالىعىندا وتكەن باسقوسۋدان كەيىن بالانديندى جەڭىسىمەن قۇتتىقتاپ، شاعىن سۇحبات الدىق.

- جۇلدەڭ قۇتتى بولسىن!

- راحمەت! جالپى قازاق ەلىنە راحمەت!

- وليمپيادا چەمپيونى بولام دەگەن وي بولدى ما؟

- بارىنشا مەدالعا تالاسام دەپ ويلادىم. ءبىراق، ناقتى مەدال الام، چەمپيون بولام دەگەن وي بولعان جوق. فينالدىق جارىستا ەڭ سوڭعى سەگىزىنشى جولاقتا ءجۇزدىم. العاشقىدا بۇل جولاق ماعان ۇنامادى. باسقالار ءبىر - ءبىر بىرىمەن قارايلاس جۇزگەندە قاتارىڭداعى قارسىلاسىڭدى كورمەي جالعىز ءجۇزۋ قيىن سياقتى بولدى. كەيىن پايداسىن كوردىم. جالعىز جۇزگەندە قارسىلاسىم قالاي ءجۇزىپ كەلەدى دەپ الاڭدامايدى ەكەنسىڭ. ويىڭدا تەك قانا جەڭىسكە جەتۋ، بار كۇشىمدى سوعان سالدىم. مارەگە كەلگەندە قاراسام، مەنىڭ تۇسىمدا ءبىرىنشى دەگەن جازۋ جانىپ تۇر. مەن ونى باستاپقىدا شەتكى جولاقتا جۇزگەنىم ءۇشىن «ءبىرىنشى جولاق» دەگەندى كورسەتكەن سان ەكەن دەپ ويلادىم. چەمپيون بولدىم دەگەن وي مۇلدە بولعان جوق. كەيىن باسقالار كەلىپ مەنىڭ قولىمدى الىپ، قۇتتىقتاي باستاعاندا عانا مارەگە ءبىرىنشى كەلگەنىمدى ءتۇسىندىم.

- چەمپيون بولعاندا قانداي اسەردە بولدىڭ؟

- ءالى وزىمە تاڭ قالىپ وتىرمىن. ول سەزىمدى ءوزىم جانە انام سەزىندى. ايتىپ جەتكىزە المايمىن.

- اناڭنىڭ قولداۋىن قانشالىقتى سەزىنە الدىڭ؟

- انام ماعان ۇلكەن كۇش بەردى. ۇلكەن قولداۋ جاسادى. انام ارنايى مەن ءۇشىن كەلدى. مەنەن ۇلكەن ءۇمىت كۇتتى. مەنىڭ جەڭىس تۇعىرىندا تۇرعانىمدى ءوز كوزىمەن كورگىسى كەلدى. مەندە وسىنداي ويلار بولدى. سول ءۇشىن انامدى قۋانتۋعا تىرىستىم. انامنىڭ قۋانعانى ەل ءۇمىتىنىڭ اقتالعانى دەپ ويلادىم. ءبارى ويلاعانىمداي بولدى.

- وسى بيىكتى باعىندىرۋ ءۇشىن قانشا جىل تەر توكتىڭ؟

- ەڭ ءبىرىنشى رەت وليمپيادا جۇلدەسىنە تالاسۋعا بولاتىندىعى تۋرالى وي لوندون وليمپياداسىنا ىرىكتەۋ كەزىندە پايدا بولدى. سودان بەرى، مىنە ءتورت جىل ءوتتى. ۇزاق جىلدارداعى جوسپارمەن جاتتىقتىرۋشىلاردىڭ ىستەگەن جۇمىستارىنىڭ جەمىسى. سوندىقتان، تەك ءوزىمنىڭ ەڭبەگىممەن جەتتىم دەپ ايتا المايمىن. سول ءۇشىن بارلىق باپكەرلەرىمە، ەلىمە راحمەتىمدى ايتامىن.

- اڭگىمەڭىزگە راحمەت!

اۆتور: كۇنسۇلتان وتارباي

سوڭعى جاڭالىقتار