وليمپيادا ويىندارىندا بۇرىن- سوڭدى ءبىر كۇندە قوس التىن العان ەمەسپىز - ە. قاناعاتوۆ
بۇل تۋرالى ريوداعى قازاقپارات ءتىلشىسى حابارلادى.
ءباسپاسوز ءماسليحاتىنا ق ر مادەنيەت جانە سپورت ءمينيسترىنىڭ ورىنباسارى ساكەن مۇسايبەكوۆ، ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ قاتىسىپ، وليمپيادا ويىندارىنداعى قازاقستاندىق سپورتشىلاردىڭ جەتىستىگىنە توقتالدى.
باسپا ءسوز ماسليحاتى بارىسىندا ق ر مادەنيەت جانە سپورت ءمينيسترىنىڭ ورىنباسارى ساكەن مۇسايبەكوۆ جەڭىمپاز سپورتشىلارىمىز دميتري بالاندين مەن نيدجات راحيموۆقا ەلباسى نۇرسۇلتان نازاربايەۆتىڭ جىبەرگەن قۇتتىقتاۋ حاتىن وقىپ بەردى.
ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ سپورتشىلاردىڭ جەتىستىگەنە ارنايى توقتالىپ ءوتتى.
"كەشە تاريحي كۇن بولدى. وسىعان دەيىنگى وليمپيادا ويىندارىندا ءبىر كۇندە قوس التىن العان ەمەسپىز. مىنە، تاريح وسىلاي باستالادى. بارشا قازاقستاندىقتاردى وسىناۋ تاريحي جەتىستىكپەن قۇتتىقتايمىن. ءبىزدىڭ سپورتشىلار تاماشا ونەر كورسەتىپ جاتىر. اۋىر اتلەتتەرىمىز بۇرىندا جاقسى كورسەتكىشتەرگە قول جەتكىزىپ ءجۇر. مىنە، كەشەدە ءبىر التىن، ءبىر كۇمىستى ءبىر كۇندە ەل قورجىنىنا سالدى. ال، ديميتري بالاندين كۇتپەگەن ولجاعا كەنەلتتى. بۇل قازاقستاندىقتار ءۇشىن ەڭ ۇلكەن قۋانىش. وليمپيادانىڭ سەنساتسياسى بولدى"، دەپ اتاپ ءوتتى قاناعاتوۆ.
سونداي-اق، بۇل تاۋەلسىز قازاقستاننىڭ تاريحىندا سۋعا جۇزۋدەن العان العاشقى جۇلدە ەكەنىن دە جاسىرمادى.
"بۇل تاۋەلسىز قازاقستاننىڭ تاريحىندا سۋعا جۇزۋدەن العان العاشقى جۇلدە. بۇل سۋ سپورتى قازاق ەلىندە دامىپ كەلە جاتقاندىعىنىڭ ايقىن كورىنىسى. ەندى جەڭىستەر وسىلاي باستالا بەرەدى. بۇل بالانديننىڭ جەتىستىگىنىڭ باستاۋى دەپ بىلەيىك. ول ءالى جاس. الدا تالاي ءىرى جارىستار كۇتىپ تۇر ونى. وسىدان بىلاي تەك، كۇرەس، بوكس سياقتى سپورت تۇرلەرىنە عانا نازار اۋدارماي جەڭىل سپپورت تۇرلەرىن دە جاقسى دامىتۋعا كۇش سالامىز»، - دەيدى ە. قاناعاتوۆ.
اۆتور: كۇنسۇلتان وتارباي
