ەلى سەنگەن بوكسشى ادىلبەك نيازىمبەتوۆ - كەسكىن

استانا. قازاقپارات - 2012-جىلعى لوندون وليمپيداسىنىڭ كۇمىس جۇلدەگەرى ادىلبەك نيازىمبەتوۆ بۇگىن بەلارۋس بوكسشىسى ميحايل دولگولەۆەتسپەن شارشى الاڭعا شىعادى. قازاقستاندىق بىلعارى قولعاپ شەبەرىنىڭ العاشقى جەكپە-جەگىن «حابار» تەلەارناسى تىكەلەي ەفيردە كورسەتەدى.
None
None

27 جاستاعى سپورتشىنىڭ جاھاندىق جارىسقا دايىندىعى قالاي؟ لوندون وليمپياداسىنىڭ كۇمىس جۇلدەگەرى ماڭعىستاۋلىق بوكس ساڭلاعى جارىستان بوس ۋاقىتىندا ءدال وسى شارشى الاڭدا جاتتىعادى. ادىلبەكتەي چەمپيوننىڭ دايىندىعىن ءوز كوزىمەن كورۋگە كەلگەن جەتكىنشەكتەردىڭ بارلىعى دەرلىك از ۋاقىتقا بىلعارى قولعاپ كيىپ، بوكس ۇيىرمەسىنە جازىلعان. قازىر مۇندا 500 گە جۋىق جاس بۋىن جاتتىعۋدا. ولاردى تاجىريبەلى باپكەرلەر باپتاپ جاتىر. جاسۇلان جايبەرگەن -  ادىلبەكتىڭ ءىزىن قۋعان جەتكىنشەكتەردىڭ ءبىرى. ونىڭ بوكسپەن شۇعىلدانىپ جۇرگەنىنە بيىل ەكىنشى جىل. ارمانى اسقاق جاسۇلان ەر جەتكەن سوڭ الەمدىك دەڭگەيدەگى سايىستاردا ەلىمىزدىڭ كوك تۋىن جەلبىرەتۋدى ومىرلىك ماقساتى سانايدى. جاسۇلان جايبەرگەن، بوكس مەكتەبىنىڭ وقۋشىسى:

- قازىر ادىلبەك اعا جارىسقا قاتىسىپ جاتىر. ءبىز ودان التىن مەدال كۇتەمىز. مەن وسكەندە ادىلبەك اعا سەكىلدى چەمپيون بولامىن.

ادىلبەكتىڭ شارشى الاڭعا شىعاتىن كۇنى جاقىنداعان سايىن اكەسىنىڭ جۇرەك تولقىنىسى كۇشەيە تۇسكەن. الابۇرتقان كوڭىلىن باسۋ ءۇشىن پەرزەنتى جاتتىعاتىن بوكس مەكتەبىنە ءجيى كەلەدى. ءسابيت نيازىمبەتوۆ، ءا. نيازىمبەتوۆتىڭ اكەسى:

- ۇيدە وتىرۋ وتە قيىن. قازىر تاقىمىمىزدى قىسىپ، ۋايىمداپ ءجۇرمىز. ۇيقى جوق. ادىلبەك تە وسىنداي كەزدەن باستاپ ەدى. وسى بالالار دا ادىلبەك سياقتى ەلىمىزدىڭ تۋىن كوتەرىپ، كوك بايراعىن جەلبىرەتەدى دەگەن سەنىمدەمىن.

كاسىپقوي بوكشىلار جارىس الدىندا قارسىلاستارىنىڭ وتكەن سايىستارىن تاسپادان قاراپ، وسال تۇستارىن انىقتايدى. باپكەرلەردىڭ ايتۋىنشا، ادىلبەك كەزەكتى جارىسقا تاس- ءتۇيىن ازىرلىكپەن اتتانعان.

ءادىل باسىعارايەۆ، بوكستان ق ر ەڭبەگى سىڭگەن جاتتىقتىرۋشى:

- ءوزىنىڭ قارسىلاستارىنىڭ ءارقايسىسىنىڭ تەحنيكالارىن ءبىلىپ، سولارعا تاكتيكالىق باعىت قويىپ دايىندالدى. التىن جۇلدەنى الام دەپ ماقسات قويىپ كەتتى. ريو وليمپياداسىنان جەڭىسپەن كەلەدى دەگەن ويدامىز.

جانكۇيەرلەر ەلىمىزدىڭ اتىن الەمگە تانىتقان بوكسشىنىڭ بۇل جولى دا جۇلدەلى ورىننان كورىنەتىنىنە ءۇمىت ارتىپ وتىر.



www.24.kz

سوڭعى جاڭالىقتار