ن. راحيموۆتى ازەربايجان قۇراماسىنا قايتا شاقىرعانىمەن، ول قازاقستاندى تاڭدادى - مەملەكەتتىك جاتتىقتىرۋشىسى - فوتو

استانا. قازاقپارات - قازاقستان قورجىنىنا «التىن» مەدال سالعان اۋىر اتلەتىمىز نيجات راحيموۆ ازەربايجان قۇراماسىنا ورالۋ تۋرالى شاقىرتۋدان باس تارتتى.

«ءيا، ازەربايجان قۇراماسىنا قايتا ورالۋ تۋرالى ۇسىنىس بولدى، الايدا، ول وليمپيادا چەمپيونى اتانۋ ءۇشىن ماقساتتى تۇردە بىزگە كەلدى. بىزدەگى اۋىر اتلەتيكا مەكتەبى ازەربايجانعا قاراعاندا مىقتىراق. ارينە، ول قازاقستاندا قالادى، ەندى ەلىمىزدىڭ نامىسىن قورعاپ جۇرەدى. ول ءالى دە جاس سپورتشى بولعاندىقتان، بولاشاقتا الەم چەمپيوناتتارىندا، ازيا ويىندارىندا جانە توكيو وليمپياداسىندا ونەرىن كورسەتە الادى»، - دەدى قازاقپارات اگەنتتىگىنە بەرگەن سۇحباتىندا قازاقستاننىڭ اۋىر اتلەتيكادان مەملەكەتتىك جاتتىقتىرۋشىسى مەنديحان تاپسير.

ەستەرىڭىزگە سالا كەتەيىك، بۇگىن تاڭەرتەڭ ريو- دە- جانەيرودا ءوتىپ جاتقان ХХХІ وليمپيادا ويىندارىنىڭ بەسىنشى كۇنى قازاقستانعا «التىن» مەدالدى 77 كەلىدە ەرلەر اراسىندا ونەر كورسەتكەن اۋىر اتلەتىمىز نيجات راحيموۆ اپەردى.

«ءبىز وعان 100 پايىز سەنگەن بولاتىنبىز. وسى رەتتە نيجات ەلدىڭ ءۇمىتىن اقتاي الدى»، - دەدى مەملەكەتتىك جاتتىقتىرۋشىسى.

ونىڭ سوزىنە قاراعاندا، سپورتشىعا قولداۋ كورسەتۋ ءۇشىن جاقىندارىنىڭ اراسىنان ريوعا اكەسى بارعان ەكەن.

نيدجات راحيموۆ 1993 -جىلى 13 -تامىزدا باكۋدە دۇنيەگە كەلگەن. 2010 -جىلدان باستاپ ول ءتۇرلى ۇلكەن جارىستاردا جۇلدەلى ورىنداردان كورىندى. 2014 -جىلى ول قازاقستان ازاماتتىعىن الدى، 2015 -جىلدىڭ قاراشاسىندا ق ر قۇراماسىندا الەم چەمپيونى اتانسا، مىنە ەندى 2016 -جىلى وليمپيادادا توپ جاردى.

اۆتور: رۋسلان عابباسوۆ