جازيرانىڭ اكەسى ءا. قۇدايقۇلوۆ: قىزىم توكيودان «التىن» الاتىنىنا سەنىمدىمىن

«جازيرانىڭ جەڭىسى جۇعىستى بولسىن! بارشا ەل قۋانىپ جاتىر، «حالىقتىڭ قىزى» عوي. قازىر ارىس قالاسىنداعى ۇيىمىزگە بارشا تۋعان- تۋىسقاندار، كورشى- قولاڭ، قالا جۇرتشىلىعى كەلىپ قۇتتىقتاپ جاتىر. ءدال قازىرگى مىندەتىمىز قۇتتىقتاۋمەن كەلگەن قوناقتاردى قارسى الۋ بولىپ تۇر. جازيرانىڭ جارىسى اياقتالعاننان كەيىن ۇيگە تەلەفون شالىپ، الدىمەن ءبىزدىڭ كوڭىل- كۇيىمىزدى سۇرادى. ارينە، مەن ءوز كەزەگىمدە قۋانىشىمىزدا شەك جوق ەكەنىن ايتىپ، قىزىمدى قۇتتىقتادىم. بارشامىزدىڭ ارمانىمىز «التىن» مەدال بولدى عوي، دەگەنمەن بۇگىن «كۇمىس» السا، الداعى جاپونياداعى وليمپيادادا «التىن» دا بولادى دەپ ۇمىتتەنەمىز. قىزىمدى اسىعا كۇتىپ وتىرمىز، وتانىنا امان- ەسەن ورالسىن دەگەن تىلەگىمىزدى ايتىپ»، - دەدى ءا. جاپپارقۇل ۇلى «قازاقپارت» اگەنتتىگىنە بەرگەن سۇحباتىندا.
سونىمەن قاتار ءا. قۇدايقۇلوۆ بيىلعى ريو وليمپياداسىندا جەڭىسكە قول جەتكىزە الماعان سپورتشىلاردا مويىماۋعا شاقىرىپ، الداعى جارىستاردان ولار بيىك ورىندارىن كورىنسىن دەگەن تىلەگىن ايتتى.
ءوز كەزەگىندە جازيرانىڭ اناسى كۇلايحان قۇدايقۇلوۆا قىزى اۋىر اتلەتيكامەن اينالىسۋدى ءۇيدىڭ اۋلاسىندا باستاعانىن اتاپ ءوتتى. «تەمىر- تەرسەكتىڭ بارلىعى ءۇيدىڭ اۋلاسىندا جاتاتىن. كۇننىڭ ىستىعىنا تەمىر قىزعانىمەن، قىزىم قولىنان تاستامايتىن. ونىڭ اۋىر اتلەتيكامەن اينالىسۋىنا قارسىلىق بىلدىرگەنىمىزبەن، جازيرا سپورتتى تاستامادى»، - دەپ ەسكە الدى ك. قۇدايقۇلوۆا.
جازيرانىڭ وليمپيادا مەدالى ءۇشىن كۇرەسكەن ءتۇنى بارشا ارىس تۇرعىندارىمەن بىرگە قالانىڭ باس الاڭىندا قۇرىلعان ۇلكەن مونيتوردان قايسار قىزدىڭ ونەرىن العاشقى جاتتىقتىرۋشىسى دۇيسەبەك قۇرمانوۆ تا تاماشالاعان كورىنەدى.
«قۋانىشىمدى سۋرەتتەپ ايتا الماي تۇرمىن. بۇنداي سەزىم 4 جىلدا ءبىر رەت قانا بولادى. جازيرا ءۇشىن ايرىقشا ماقتانىش سەزىمى ۇيالاپ وتىر. ونىڭ اۋىر اتلەتيكادان العاشقى قادامداردى قالاي جاساعانى ءالى دە ەسىمدە. ءوزىنىڭ قاجىرلى ەڭبەگىنىڭ ارقاسىندا جازيرا وليمپيادا مەدالىن الۋ ماقساتى ورىندالاتىنىن دالەلدەدى دەپ بىلەمىن»، - دەدى باپكەر.
بۇدان بۇرىن حابارلانعانداي، جازيرا جاپپارقۇل قازاق قىزدارىنان تۇڭعىش وليمپيادانىڭ كۇمىس جۇلدەگەرى اتاندى. بۇگىن برازيليانىڭ ريو- دە- جانەيرو قالاسىندا اۋىر اتلەتيكادان قوسسايىستىڭ قورىتىندىسى بويىنشا 259 كەلىنى باعىندىردى.
اۆتور: رۋسلان عابباسوۆ