الەكسەي ني: جازيراعا ىشتەي قاتتى رەنجىدىم

كەشە، ول تىلشىلەرگە بەرگەن سۇحباتىندا ءبىر التىن، ءبىر كۇمىس الاتىنىن ايتقان ەدى. سول كەزدە تاڭ قالىپ، تاڭداي قاققان بولاتىنبىز. ايتقانى ايداي كەلدى. التىندى دا الدى، كۇمىستى دە الدى. ءبىراق، ۋادەسىن ورىنداپ، ايتقانىنا جەتسە دە، جازيراعا ىشتەي وكپەلى ەكەنىن ايتىپ بەردى.
- مەن نيجاتقا باس يەم. نەگە؟ ول جەڭىسكە جەتەتىن سالماقتى كوتەرۋگە دايىن ەكەنىن ايتتى. ماعان كەرەگى وسى ەدى. نيجات 214 كەلىنى جاتتىعۋ بارىسىندا كوتەرىپ كورگەن ەمەس. ول - بۇگىن ناعىز جاۋىنگەر بولدى. تۋما تالانت ءارى اسا قايراتتى دا جىگەرلى ەكەنىن كورسەتتى، دالەلدەدى دە. ءبارىن ءتۇسىندى، اقىل تارازىسىنا سالدى، تاۋەكەلگە باردى.
- وسى ەرلىگى ءۇشىن قاتتى رازى بولعان بولدىڭىز عوي.. .
- ارينە، بۇدان ارتىق قانداي ەرلىك كەرەك ەدى؟ وسى قاسيەتى ءۇشىن وعان شەكسىز رازىمىن. قىتايلىقتار التىن ءبىزدىڭ قولدا، ەندى وعان تالاسۋعا ەشكىمنىڭ شاماسى كەلمەيدى دەپ ارقاسىن كەڭگە سالىپ تۇرعاندا، نيجات نار تاۋەكەلگە بارىپ، ونىڭ اۋىزىنداعىسىن جىرىپ كەتتى. مۇنداي جاعدايدى ەشكىم كۇتكەن جوق. ال، جازيراعا ىشتەي قاتتى رەنجىپ قالدىم.
- نەگە؟
- جالپى، مەن ارىق ايتىپ ، سەمىز شىعاتىن اداممىن. بۇگىنگى جوسپارلاعانىم ەكى التىن بولاتىن. جازيرادان نەگىزى التىن كۇتكەنمىن. التىن الاتىن قىز ەدى. نيجات تا، ول دا سەرپە كوتەرۋدەن وتە مىقتى. راسىن ايتسام، كىم سەرپە كوتەرۋدەن مىقتى، سول جەڭىمپاز بولاتىن ەدى. جازيرا جۇلقا كوتەرۋدە 117 كەلىنى العاندا اڭگىمە باسقاشا بولار ەدى. ول جاتتىعۋدا جۇلقا كوتەرۋدەن 120 كەلى، سەرپە كوتەرۋدەن 150- 153 كەلىنى ەركىن الىپ جۇرگەن قىز بولاتىن. التىن الارىنا سەندىم.
- كۇمىستە جامان ەمەس قوي. بۇل رەنجيتىن دۇنيە مە؟ قازاق ەلى سوعان دا شۇكىرلىك ەتىپ، قۋانىپ جاتىر.. .
- بۇل سپورتتىڭ ءتىلىن مەندەي ەشكىم بىلە دە، تۇسىنە دە قويماس. ونىڭ العاشقى جاتتىعۋدا كۇمىس العانى بۋىنىنا ءتۇسىپ كەتتى. زىلتەمىردى سۇيگەندە- اق ءتۇسىندىم. سۇيمەۋى كەرەك ەدى. مەنىڭ ىشتەي رەنجىگەنىم وسى. جازيرا قىتايدى الا المايمىن، وسى جەتەدى دەپ ويلاپ قالدى. قانشا قايراسام دا ول ءوزىنىڭ قالپىنا كەلە المادى. سەرپە كوتەرۋدە ويناپ الىپ جۇرگەن سالماعىنان ءمۇلت كەتتى. كوڭىلىمدە ءبىر عانا جۇبانىش بار. ول قازاق قىزىنىڭ تۇڭعىش رەت وليمپيادا ويىندارىنىڭ جۇلدەسىنە يە بولعاندىعى. مەن بۇل وقيعانى ىشتەي ارمانداپ جۇرگەنمىن. سول عانا مەنى جۇباتتى. ايتپەگەندە جازيرانى كەشىرمەس ەدىم.
اۆتور: كۇنسۇلتان وتارباي