مىرزاعالي ايتجانوۆ: شيرەك فينالدا ءبىرجان وتە ناشار بوكستاستى

بۇل تۋرالى بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ جارىستان كەيىن، ريوداعى قازاقپارات تىلشىسىنە بەرگەن سۇحباتىندا ءمالىم ەتتى.
- مىرزاعالي قۇلان ۇلى، بۇگىن ءبىر شاكىرتىڭىز جەڭىلىپ، ءبىر بوكسشىڭىز جارتىلاي فينالعا ءوتتى. وسى جايىندا قىسقاشا توقتالىپ وتسەڭىز...
- بۇگىنگى جەكپە- جەكتە ءبىرجان وتە ناشار بوكستاستى. مەن ولاي بولادى دەپ ويلاعان جوقپىن. سەبەبى، ءبىرجاننىڭ تاجىريبەسى جاعىنان بولسا دا، فيزيكالىق قۋاتتىلىعى جاعىنان بولسا دا، قارسىلاسىن ۇتاتىن مۇمكىندىگى بولىپ ەدى. ءبىراق، بوكستا وسىنداي جاعدايلار كوپ كەزدەسەدى.
- مۇمكىندىگى بولا تۇرا قالاي جەڭىلىپ قالدى؟
- ءبىرجاندى وزدەرىڭىز بىلەسىزدەر، ءۇشىنشى وليمپياداسىنا قاتىسىپ وتىر. بيىل قالاي دا مەدال الام دەگەن ءۇمىتى بولدى. وكىنىشكە قاراي، مەدالدىڭ سىڭعىرى جاقىنداعان ساتتە ءوزىن- ءوزى كۇيدىرىپ الدى. ءوز- ءوزىن باسقارا المادى، ءوز- ءوزىن ۇستاي المادى.
- وعان جارىسقا شىعار الدىندا قانداي تاپسىرما بەردىڭىز؟
- ءبىرجانعا كەشە جاتتىعۋ كەزىندە دە، بۇگىن جارىسقا شىعار الدىندا دا قالاي جۇمىس جاساۋ كەرەك ەكەندىگىن جاقسىلاپ تۇرىپ ايتتىم. وكىنىشكە قاراي، بويى كىپ- كىشكەنتاي بوكسشىعا اياقتان تۇرىپ بەرە المادى. قازاقشا ايتقاندا، اۋزى اڭقيىپ، ءوزىن- ءوزى جوعالتىپ الدى. بۇل ورنى تولماس وكىنىشتى جاعداي. سونشا جىل دايىندالدى. ءبىر ەمەس، ءۇش وليمپياداعا قاتىسىپ وتىرىپ، شيرەك فينالدا جەڭىلىپ قالۋ ماڭگى وكىنىش بولىپ قالادى- اۋ.
- بۇل جەڭىلىستىڭ ەندى ورنىن تولتىرۋ مۇمكىن بە؟
- ءبىرجان ءۇشىن مۇمكىن ەمەس. بۇل «بۇيىرماعان» دەگەن ءسوز. كەيبىر باقىت قانشا قۋساڭ دا جەتكىزبەيدى. ءۇش وليمپياداعا قاتىسىپ وتىرىپ ءبىر مەدالعا قول جەتكىزە الماۋ سپورتشىعا وتە اۋىر جاعداي. جالپى، وليمپيادا مەدالى كەز- كەلگەن سپورتشىعا بۇيىرا بەرمەيدى. مەن بۇنى تەك ءبىرجان ۇتىلعاننان كەيىن ايتىپ وتىرعانىم جوق. بۇل سپورت تاريحىندا، بوكس تاريحىندا بار نارسە.
- ءبىرجاننىڭ جەڭىلىسى سىزگە دە اۋىر تيگەن بولار؟
- مەن ءوز مىندەتىمدى ورىندادىم. قۇراماداعى 10 بوكسشىنى بىرىنەن ءبىرىن ارتىق، نە كەم كورگەن جەرىم بولعان جوق. بارلىعىن بىردەي ءبىر ۋاقىتتا، ءبىر جەردە جاتتىقتىردىم. ەشكىمنىڭ ماعان وكپەسى جوق دەپ ويلايمىن. ءبىراق، «ءبىرجان جەڭىلدى» دەپ باسىمىزدى سالبىراتپايمىز. باسقا دا جىگىتتەرىمىز بار. ەندى سول جىگىتتەرىمىزگە اللا كۇش- قۋات بەرسىن. ولاردى الداعى جەكپە- جەكتەرگە تىڭعىلىقتى دايىندايمىز.
- ال ۆاسيلي ليەۆيت تۋرالى كىشكەنە توقتالا كەتسەڭىز...
- ۆاسيليدىڭ جۇدىرىقتاسۋ مانەرى كوڭىلىمنەن شىقتى. ول العاشقى سەكۋندتاردان باستاپ، تىزگىندى ءوز قولىنا الدى. رينگتىڭ قوجايىنى سياقتى بوكستاستى. ەشتەڭەدەن قايمىقپاي، قورعانباي قارسىلاسىن قۋىپ ءجۇرىپ سابادى دەسەم دە بولادى. ول قازىر مەدالعا ءىلىنىپ تۇر. ءبىراق، قولدا مەدال بار دەپ قاناعاتتانۋعا قاقىمىز جوق. ەندى، ارى قاراي مەدالدىڭ ساپاسىن جاقسارتۋعا جۇمىس جاسايمىز.
- اڭگىمەڭىزگە كوپ راحمەت!
اۆتور: كۇنسۇلتان وتارباي