ۆاسيلي ليەۆيت ريو وليمپياداسىنىڭ جارتىلاي فينالىنا شىقتى
بۇل تۋرالى ريوداعى قازاقپارات ءتىلشىسى حابارلادى.
ليەۆيت شيرەك فينالدا كەننەدي سەن پەرمەن جۇدىرىقتاستى. وتانداسىمىز ءۇش راۋند بويى قارسىلاسىنا ەسە جىبەرگەن جوق. ناتيجەسىندە تورەشىلەردىڭ ءبىر اۋىزدى شەشىمىمەن كەلەسى جارتىلاي فينالعا جولداما الدى. ەسەپ 3:0 (30:27, 30:27, 30:27).
وسىعان دەيىن ۆاسيلي ليەۆيت العاشقى قارسىلاسى قىتايلىق يۋي فەنكايدى ەكىنشى راۋندتا نوكداۋنعا جىبەرگەن بولاتىن. ال ءۇشىنشى راۋندتا قارسىلاسى جەكپە- جەككە شىعۋدان باس تارتقان.
**
سەمسەرلەسۋدەن سىنعا تۇسكەن سپورتشىمىز يليا موكرەتسوۆ قارسىلاسىنا جول بەردى.
ول امەريكالىق سپورتشى دەريل گومەردەن ۇتىلىپ قالدى.
سەمسەرلەسۋدەن 1/16 فينالدا ونەر كورسەتكەن وتانداسىمىز قارسىلاسىنا 11:15 ەسەبىمەن ۇتىلىپ، ريو وليمپياداسىن اياقتادى.
**
ساداق اتۋدان سىنعا تۇسكەن سپورتشىمىز العاشقى اينالىمدا ءسۇرىندى.
لۋيزا سايديەۆا ساداق اتۋ سايىسىنىڭ 1/32 فينالىندا ۋكراينالىق اناستاسيا پاۆلوۆادان جەڭىلىپ قالدى. ەسەپ 0:6 (22:28, 26:29, 24:29) . ەندى ول جۇلدەلى ورىندارعا تالاسا المايدى.
**
ۆەلوسپورتشى اندرەي زەيتس وليمپيادا ويىندارىندا 24-ورىنمەن اياقتادى.
بۇگىن ۆەلوسپورتشىلار اراسىندا وتكەن سايىستا اندرەي زەيتس جارىس جولىنا شىققان بولاتىن. ول 54,5 قاشىقتىقتى 1:18:47 ۋاقىتپەن ءجۇرىپ ءوتىپ، جالپى كوماندالىق ەسەپتە 24-ورىننان اسا المادى.
بۇل دودادا مارە سىزىعىن ءبىرىنشى بولىپ، شۆەيتسارلىق فابيانۋ كانچەللارا (1:12:15) كەسىپ، چەمپيون اتاندى. ال كومبەگە ەكىنشى بولىپ جەتكەن نيدەرلاندىلىق سپورتشى توم ديۋمۋلەن كۇمىس مەدالدى قانجىعاسىنا بايلادى. مارە سىزىعىنا ۇلى بريتانيالىق كريس فرۋم ءۇشىنشى بولىپ جەتىپ، ريو وليمپياداسىنىڭ قولا جۇلدەگەرى اتاندى. ءبىزدىڭ وتانداسىمىز وسىعان دەيىن وتكەن توپتىق سايىستا 8-ورىننان كورىنگەن بولاتىن.
اۆتور: كۇنسۇلتان وتارباي
