جازيرا جاپپارقۇل: قازاق وسى كۇندى ارمانداعالى قاشان؟

«قازاق وسى كۇندى ارمانداعالى قاشان؟ قۋانىشىمدا شەك جوق. جۇلدەمدى قازاق ەلىنە ارنايمىن. ءتورت جىل توككەن تەردىڭ جەمىسىن، مىنە، بۇگىن كوردىم. بۇل ۇلكەن جاتتىعۋمەن كەلگەن ەڭبەكتىڭ جەمىسى. قۋانىشتان باسىم اينالىپ تۇر»، - دەپ اتاپ ءوتتى جازيرا.
ول سونداي- اق جارىس بارىسىندا جىبەرگەن قاتەلىكتەرىن دە جاسىرمادى.
«جۇلقا كوتەرۋدە دە، سەرپە كوتەرۋدە دە قاتەلىكتەرگە بوي الدىردىم. قاي جەردەن قانداي قاتەلىك جىبەرىپ العانىمدى جاقسى بىلەمىن. ءبىراق، ءوزىمدى تەك مەدالعا دايىنداپ كەلگەنىمدى ەسىمنەن شىعارعان جوقپىن. ەگەر سەرپە كوتەرۋدەگى ءۇشىنشى مۇمكىندىگىمدى پايدالانا الماعاندا بۇل جۇلدەدەن قاعىلار ەدىم. سوڭعى سالماقتى كوتەرگەندە جارىستى ءساتتى اياقتاعانىمدى ىشتەي سەزىندىم. و باستا وليمپيادادان جۇلدەسىز قالام دەگەن وي بولعان جوق. مەندە ەلگە تەك مەدالمەن ورالۋىم كەرەك دەگەن ماقسات قانا بولدى. مىنە، سول ماقساتقا جەتتىم. نەگىزى التىن الۋىم كەرەك ەدى. قازاقتىڭ «كۇمىس» قىزى اتاندىم، كۇمىس تە جامان ەمەس»، - دەپ اعىنان جارىلدى جازيرا جاپارقۇل.
ەستەرىڭىزگە سالا كەتەيىك، جازيرا قوس سايىستىڭ قورىتىندىسى بويىنشا 259 كەلىنى باعىندىردى. ول سەرپە كوتەرۋدە الدىمەن 140 كەلىگە تاپسىرىس بەردى. الايدا ونى باعىندىرا المادى. ەكىنشى مۇمكىندىگىندە ول وسى سالماققا قايتا ۇسىنىس بەرىپ، ەكىنشىسىندە ەركىن كوتەردى. ال ءۇشىنشى مۇمكىندىگىندە جازيرا جاپارقۇل 144 كەلىنى باعىندىردى. قوس سايىستىڭ قورىتىندىسى بويىنشا جەرلەسىمىز 259 كەلىمەن ريو وليمپياداسىنىڭ كۇمىس جۇلدەگەرى جانە قازاق قىزدارىنان تۇڭعىش وليمپيادا جۇلدەگەرى اتاندى.
بۇل سالماقتا باس جۇلدە قوس سايىستىڭ قورىتىندىسى بويىنشا قىتاي قىزى سيان يانمەيگە بۇيىردى. ءۇشىنشى ورىندى مىسىرلىق سارا احمەت جەڭىپ الدى. سونىمەن بۇگىن وليمپيادانىڭ بەسىنشى كۇنى قورجىنىمىزعا ەكىنشى كۇمىس مەدال بۇيىردى.
اۆتور: كۇنسۇلتان وتارباي