بيىل اۋىل شارۋاشىلىعى تەحنيكاسى ءۇشىن ينۆەستيتسيالىق سۋبسيديا تولەۋ كوزدەلىپ وتىر

بۇل تۋرالى ۇكىمەت وتىرىسىندا ق ر اۋىل شارۋاشىلىعى ءبىرىنشى ۆيتسە- ءمينيسترى قايرات ايتۋعانوۆ ءمالىم ەتتى.
«ەگىن وراعى ناۋقانىنا اۋىل شارۋاشىلىعى تەحنيكاسىنىڭ دايىندىعى رەسپۋبليكا بويىنشا جوسپارلى تارتىپتە ءجۇرىپ جاتىر. وسى رەتتە 14 مىڭنان استام جوعارى ونىمدىلىكتى كومبايندار قاتىسۋدا. وسى تەحنيكانىڭ كۇشىمەن 11 ميلليون گەكتار جەردەگى ەگىستى نەمەسە وراق تۇسەتىن القاپتىڭ 70 پايىزىن قامتۋ كوزدەلگەن»، - دەدى ق. ايتۋعانوۆ.
بۇدان بولەك، ول اۋىل شارۋاشىلىعى تەحنيكاسىن ساتىپ الۋعا ىنتالاندىرۋ جانە اۋىل شارۋاشىلىعى تاۋارىن وندىرۋشىلەرگە قارجىلاي قولداۋ كورسەتۋ ماقساتىندا اتقارىلعان جۇمىستارعا توقتالدى. بۇگىندە اۋىل شارۋاشىلىعى مينيسترلىگى رەسپۋبليكالىق بيۋدجەت قاراجاتى ەسەبىنەن اۋىل شارۋاشىلىعى تەحنيكاسىنىڭ ليزينگى بويىنشا سىياقىنىڭ پايىزدىق مولشەرلەمەسىن ارزانداتۋ باعدارلاماسىن ىسكە اسىرۋدا.
«اتالعان باعدارلامانى ىسكە اسىرۋعا 6,9 ميلليارد تەڭگە ءبولىندى. بۇل رەتتە، جىلىنا 19 پايىزدان اسپايتىن سىياقى مولشەرلەمەسىمەن اۋىل شارۋاشىلىعى تەحنيكاسىنىڭ ليزينگىن سۋبسيديالاۋ كوزدەلەدى. ونىڭ 7 پايىزى رەسپۋبليكالىق بيۋدجەت ەسەبىنەن وتەلەدى»، - دەپ اتاپ ءوتتى ق. ايتۋعانوۆ.
ايتا كەتەيىك، اعىمداعى جىلدان باستاپ ءبىرىنشى رەت اۋىل شارۋاشىلىعى تەحنيكاسىن ساتىپ الۋ كەزىندە ينۆەستيتسيالىق سۋبسيديا تولەۋ كوزدەلىپ وتىر. سۋبسيديالار نورماتيۆى تەحنيكا قۇنىنىڭ 25 پايىزىن قۇرايدى.
اۆتور: رۋسلان عابباسوۆ