بۇگىن «قازاق قىزدارىنان قاشان وليمپيادا چەمپيونى شىعادى؟» دەگەن ساۋالعا جاۋاپ بەرەتىن ءسات تۋدى

ريو- دە- جانەيرو. قازاقپارات - بۇگىن «جازيرا جاپپارقۇل جارىسقا شىعادى» دەپ ميلليونداعان جانكۇيەر تاقىمىن قىسىپ، كوگىلدىر ەكرانعا كوز تىگەتىنى انىق، دەپ حابارلايدى قازاقپارات ءتىلشىسى.

ولاي دەيتىن سەبەبىمىز، برازيليانىڭ ريو- دە جانەيرو قالاسىندا ءوتىپ جاتقان وليمپيادا ويىندارىندا اۋىر اتلەتيكادان قىزدار اراسىندا 69 كەلىدە قازاقتىڭ قاراتورى قىزى جازيرا جاپپارقۇل جارىس جولىنا شىعادى. سونداي- اق، «قازاق قىزدارىنان قاشان وليمپيادا چەمپيونى شىعادى؟» دەگەن سۇراققا جازيرا بۇگىن جەتىستىگىمەن جاۋاپ بەرەدى.

 بۇكىل قازاق ەلى جازيرانىڭ جارىسقا شىعاتىن ۋاقىتىن ساناپ وتىرعانى انىق. ول استانا ۋاقىتىمەن 00:30-دا جارىس جولىنا شىعاتىن بولادى. سونداي- اق، ساعات 4-تە 77 كەلى ەرلەر سايىسىنا نيدجات راحموۆ تا ەل نامىسىن قورعايتىن بولادى. ارينە، ەكەۋىنەن دە مەدال كۇتەمىز. دەسە دە جازيرانىڭ ورنى بولەك. ەگەر جازيرا جاپپارقۇل چەمپيون اتانىپ جاتسا، قازاق قىزدارىنان شىققان تۇڭعىش وليمپيادا جۇلدەگەرى اتانادى. وسىعان دەيىنگى الاشتىڭ ارمانداعان جۇلدەسىن تەك جازيرادان كۇتەمىز. ەگەر جازيرا جۇلدە الىپ جاتسا، تاۋەلسىزدىگىمىزدىڭ 25  جىلدىعىنا ەڭ ۇلكەن تارتۋ بولارى دا ءسوزسىز.

جازيرا جاپپارقۇل 1993 - جىلى وڭتۇستىك قازاقستان وبلىسىنىڭ ارىس اۋدانىندا دۇنيەگە كەلگەن. 8 جاسىنان باستاپ اۋىر اتلەتيكامەن اينالىسا باستاعان. العاشقى باپكەرى راشيت تولەگەنوۆ. قازىر دە وسى باپكەرىمەن جۇمىس جاساپ كەلەدى.

ول ەڭ العاش 58, 63 كەلى سالماقتا قازاقستان چەمپيونى اتاندى. ال 2010 -جىلى 17 جاسىندا سينگاپۋردە وتكەن تۇڭعىش جاسوسپىرىمدەر اراسىنداعى وليمپيادا ويىندارىندا قازاق قىزدارى اراسىنان تۇڭعىش بولىپ جەڭىس تۇعىرىنىڭ ەڭ بيىك ساتىسىنان كورىندى. بۇل ونىڭ ۇلكەن سپورتقا دەگەن قۇشتارلىعىن وياتتى. سينگاپۋردە جازيرا 63 كەلىدە ونەر كورسەتىپ، قوس سايىستىڭ قورىتىندىسى بويىنشا 205 (90+115) كەلىنى باعىندىردى.

2012 -جىلى گۆاتەمالاداعى جاسوسپىرىمدەر اراسىنداعى الەم بىرىنشىلىگىندە چەمپيون اتاندى. قوس سايىستىڭ قورىتىندىسى - 239 كەلى (106+133) . ال 2013 -جىلى جاپپارقۇل جاسوسپىرىمدەر اراسىنداعى الەم چەمپيوناتىندا كۇمىس جۇلدەگەر اتاندى.

 جازيرا 2011 -جىلى العاش رەت ەرەسەكتەر اراسىنداعى الەم بىرىنشىگىنە قاتىستى. الايدا وندا جۇلدە بۇيىرمادى. قارسىلاستارىنىڭ بارلىعى كىلەڭ مىقتىلار ەدى. 2013 -جىلى ەرەسەكتەر اراسىنداعى الەم چەمپيوناتىندا باعى جانبادى. الايدا، ول 2014 -جىلى ءوز ەلىمىزدە الماتى قالاسىندا وتكەن الەم بىرىنشىلىگىندە تۇڭعىش رەت قازاق قىزدارى اراسىندا اۋىر اتلەتيكادان «الەم چەمپيوناتىنىڭ كۇمىس جۇلدەگەرى» دەگەن اتاققا قول جەتكىزدى. وندا جۇلقا كوتەرۋدەن 118 كەلىنى، سەرپە كوتەرۋ باسەكەسىندە 144 كەلىنى كوتەرىپ، قوس سايىستىڭ قورىتىندىسى بويىنشا 262 كەلىنى باعىندىردى.

2015 -جىلى حيۋستوندا وتكەن، ريو وليمپياداسىنىڭ جولدامالارى ساراپقا سالىنعان الەم چەمپيوناتىندا تاعى دا جەڭىس تۇعىرىنىڭ ەكىنشى ساتىسىنان كورىنىپ، ەكىنشى مارتە الەم بىرىنشىلىگىنىڭ كۇمىس جۇلدەگەرى دەگەن اتاققا قول جەتكىزدى.

الەم چەمپيوناتىندا ەكى مارتە كۇمىس جۇلدە العان تۇڭعىش قازاق قىزى ەندى وليمپيادا ويىندارىندا توپ جارعان العاشقى قازاق قىزى اتانسىن دەپ تىلەيىك، اعايىن.

ەستەرىڭىزگە سالا كەتەيىك، قازىرگە دەيىن قازاقستان قورجىنىندا 1 كۇمىس، 3 قولا مەدال بار. ونىڭ ەكەۋىن دزيۋدو كۇرەسىنىڭ ساڭلاقتارى ەنشىلەسە، قالعان ەكەۋىن اۋىر اتلەتتەرىمىز جەڭىپ الدى.

اۆتور: كۇنسۇلتان وتارباي