نۇرلان نوعايەۆ شەشىم قابىلداۋدان قورقاتىن باسشىلاردى ايىپتادى - فوتو

اتىراۋ. قازاقپارات - بۇگىن، 10 - تامىز كۇنى اتىراۋ وبلىسىنىڭ اكىمى نۇرلان نوعايەۆ اۋداندارعا جاساعان ساپارىنىڭ قورىتىندى جينالىسىن وتكىزدى. وتىرىسقا اۋدان اكىمدەرى، باسقارما باسشىلارى مەن ب ا ق وكىلدەرى قاتىستى.
None
None

 وبلىس اكىمىنىڭ باسپا ءسوز قىزمەتىنىڭ حابارلاۋىنشا، ساپار قورىتىندىسى بويىنشا وبلىس اكىمى اۋدانداردى دامىتۋ جۇمىس جوسپارىن جاساقتاپ، ونىڭ اياسىندا 223 ءىس شارانى بەكىتىپ بەردى. اتالعان شارالار جوسپارىن ورىنداۋ مەن ولاردىڭ ورىندالىسىن باقىلاۋ اۋدان اكىمدەرى مەن وبلىس اكىمنىڭ ورىنباسارلارىنا تاپسىرىلدى.

نۇرلان نوعايەۆتىڭ ايتۋىنشا، اۋداندارداعى ينفراقۇرىلىم، الەۋمەتتىك ماسەلەلەردى شەشۋ جۇمىستارى دۇرىس جولعا قويىلعان. اسىرەسە، اۋىلشارۋاشىلىق سالاسىنىڭ دامۋى قارقىنمەن ءجۇرىپ جاتىر. وبلىستىڭ بۇرىنعى باسشىلىعى وڭىردە سيىر ءسۇتىن، ەشكى ءسۇتىن ءوندىرۋ زاۋىتتارى، كوپتەگەن ەگىس القاپتارىن قولعا العان. ايماق باسشىسى وسى جۇمىستاردى ءارى قاراي ءار اۋداننىڭ ەرەكشەلىگىن ەسكەرە وتىرىپ جالعاستىراتىنىن ايتتى.

نۇرلان نوعايەۆ ەرەكشە توقتالعان جاعداي اۋىز سۋ ماسەلەسى بولدى. ناقتى ايتقاندا، قۇرمانعازى اۋدانىنداعى ازعىر ەلدى مەكەنىنىڭ جاعدايى ءسوز ەتىلدى. ونىڭ ايتۋىنشا، اۋىل حالقى ءالى كۇنگە دەيىن سۋدى كولىكپەن تاسىپ ءىشىپ وتىر. ول ازداي جاڭادان سالىنعانىنا قاراماستان سۋ ساقتايتىن ەكى رەزەرۆۋاردىڭ بىرەۋى تەسىلىپ تۇر. ايماق باسشىسى بۇعان جاۋاپتى باسشىلاردى جاۋاپقا تارتتى. «ەگەر سالىنعان نىسان دۇرىس جوبالانباعان بولسا نەمەسە قۇرىلىس جۇمىستارى دۇرىس جۇرگىزىلمەسە، ونى قالاي قابىلداپ الدىڭىزدار؟ ەندى وعان قايتادان جوندەۋ جۇمىستارىن جۇرگىزەيىن دەپ وتىرسىزدار ما؟ بۇل سالعىرتتىقتىڭ بەلگىسى. ماسەلەنى تەزدەتىپ شەشىڭىزدەر. ناتيجەسىن ماعان جەتكىزىڭىز»، - دەدى نۇرلان نوعايەۆ.

ايماق باسشىسى سونىمەن قاتار اۋداندارداعى مەكتەپتەردىڭ جاعدايىن ءسوز ەتتى. ول كەيبىر مەكتەپ باسشىلارى ءوز جۇمىستارىنا جاۋاپكەرشىلىكپەن قارامايتىنىنا نازار اۋداردى. «الەۋمەتتىك نىسان باسشىلارى ءوز وبەكتىلەرىنە ۇقىپتىلىقپەن قارامايدى. ماسەلەن ماحامبەت اۋىلىنداعى بالاباقشا نەمەسە تايسويعانداعى مەكتەپ. سالىنعانىنا 5-6 جىل عانا بولسا دا، ازىپ- توزىپ كەتكەن. قاي باسشى بولسا دا، جاۋاپكەرشىلىك الىپ، جۇمىستى بار كۇشىن سالىپ ىستەۋى كەرەك»، - دەدى اكىم.

وبلىس اكىمى وسىلايشا باسشىلاردى شەشىم قابىلداۋدان قاشپاۋعا شاقىردى. «شەشىم قابىلدامايتىن بولساڭىزدار ول جەردە نەگە وتىرسىزدار؟ ولاي بولسا، جۇمىس ىستەمەيتىن باسشىلاردىڭ ورنىنا شەشىم قابىلداۋدان قورىقپايتىن ادام قويۋ كەرەك»، - دەدى اكىم.

ايتا كەتەيىك، بۇعان دەيىن نۇرلان نوعايەۆ وبلىستاعى 7 اۋدان مەن 52 اۋىلدىق وكرۋگتىڭ ءبارىن ارالاپ شىققان ەدى. ساپار بارىسىندا ول اۋدانداردىڭ الەۋمەتتىك- ەكونوميكالىق جاعدايىمەن تانىسىپ، حالىقتىڭ تۇرمىسىن ءوز كوزىمەن كورىپ شىقتى.

ساپار قورىتىندىسى بويىنشا كوزدەلگەن 223 ءىس- شارانىڭ 187- ءسى بيىل، ال 26-ى 2017 -جىلى جۇزەگە اسىرىلادى دەپ جوسپارلانىپ وتىر.

null null 

سوڭعى جاڭالىقتار