ارابقا تۇرمىسقا شىققان قازاقستاندىق قىزدار كورىپ جاتقان سۇمدىقتارى تۋرالى شىندىقتى ايتتى

ولاردىڭ ءبىرى - تالدىقورعاننىڭ 29 جاستاعى تۇرعىنى دارينا. ول بىرىككەن اراب امىرلىكتەرىنە 400 مىڭ تەڭگەدەن جوعارى جالاقى ءۇشىن بارىپتى.
سول جاقتا ول ورتا جاستاعى بايقۋاتتى ارابپەن تانىسادى. ءسويتىپ، ەر ادام ءبىر اي وتكەندە وعان تۇرمىسقا شىعۋ تۋرالى ۇسىنىس ايتقان. وسىلايشا تىرشىلىكتىڭ قامىن ۇمىتىپ، قولاستىندا قىزمەتشىسى بار ءزاۋلىم ۇيدە كۇيەۋىنەن اشەكەي بۇيىمدار مەن ىستىق ماحابباتتىڭ راقاتىن كورۋ تۋرالى مۇمكىندىك پايدا بولادى. ال ەڭ باستىسى - وعان بالا بوسانىپ بەرۋ، ۇل بالا.
«مەنىڭ كۇيەۋىم بايقۋاتتى ادام، ساعاتتاپ جالاقى الادى. ءۇشىنشى ايەلگە بار مۇمكىندىگى جەتەدى، الايدا قازىر ول بىزگە ءتىپتى ينتەرنەتتىڭ تولەمىن دە بەرمەيدى. نەكەلەسكەنىمىزگە بىرنەشە جىل بولدى، ءۇش بالامىز بار، ەڭ جامانى، ەشقايسىسى اكەسىنە ۇقساماعان، بارلىعى اشىق رەڭدى. قىزدارىمدى ءتىپتى ادام ەكەن دەمەيدى، جاقتىرمايدى. بالالارىم بولسا مەكتەپكە دە بارمايدى، وقۋىنا اكەسى بولا تۇرا اقشا بەرگىسى دە جوق. اقشاسى جوق ەمەس، تۇرمىسىمىزدى اپساتتە كوتەرىپ تاستايتىن جاعدايى بار، مەكتەپ پەن ينتەرنەتتىڭ اقىسىن تولەۋگە، كوشەدە ەركىن سەرۋەندەۋىمە جاعداي جاساي الادى. ءبىراق قالامايدى»، - دەيدى دارينا.
ال شىمكەنتتىڭ 27 جاستاعى تۋماسى، قازىر دۋبايدا تۇراتىن مارجان وقيعاسىن بىلاي باياندايدى:
«امىرلىكتەردە شەتەلدىكتەر تەك ەكىنشى ايەل بولا الادى، جۇرتى شاريعات زاڭى بويىنشا اراب قىزدارىنىڭ ءبىرىنشى ايەل بولۋىن قۇپ كورەدى. كۇيەۋىم باي ادام، ءبىرىنشى ايەلى بار. دۋبايداعى ءومىرىمدى بۇلاي ەلەستەتپەپپىن. باستاپقىدا بارلىعى جاقسى بولاتىن، بالا بوسانىپ بەرگەننەن كەيىن وزگەرىپ شىعا كەلەدى. كۇيەۋىمنىڭ رۇقساتىنسىز ەشقايدا دا شىعا المايمىن. ءوز ەركىم جوق، ول قالاعان كيىمدى كيەمىن. ول تالاپ ەتكەن استى عانا ىشەمىن. ءۇي جانۋارى سەكىلدىمىن. ارابتاردىڭ ايەلدەرىندە ەشقانداي دا قۇقىق جوق. جۇمىس ىستەۋگە تىيىم سالدى. بار شارۋام - ۇيدە وتىرۋ، ەشقايدا شىقپاي كۇتۋ عانا. جۇمىسىندا ءبىر ماسەلەلەر شىعىپ قالسا دا، باسقا قيىندىقتارى تۋسا دا، مەن كىنالى بولىپ شىعا كەلەمىن. سوڭعى كەزدەردەن بەرى قول كوتەرە باستاسا، كامەراعا ءتۇسىرىپ الۋعا ادەتتەندىم. پوليتسيا شاقىرعاننان كەيىن عانا ساباسىنا تۇسەدى. ءبىراق بالالارىمدى جاقسى كورەدى. كوڭىلگە مەدەت بولاتىنى - وسى عانا، وسى ءۇشىن عانا ءومىر سۇرەمىن».
ونىڭ ايتۋىنشا، امىرلىكتەرگە قازاقستاننان بارعان قىزدار كوپ ەكەن. ايەلدەر ءوزارا بايلانىسىپ، ءبىر- بىرىنە قولداۋ ءبىلدىرىپ جۇرەدى ەكەن. تاجىريبە الماسىپ، كەڭەستەر ايتادى.
باسىلىمعا سۇحبات بەرگەن ءۇشىنشى قىز - قوستانايدىڭ 31 جاستاعى تۋماسى - اجىراسىپ كەتسە دە، دۋبايدا قالىپ قويىپتى. «ۇرىپ- سوعىپ، ۇركىتكەننەن كەيىن وسىعان بەل بۋدىم. وسىلاي تاعى جالعاسقاندا قىزىم ەكەۋمىز امان قالماس ەدىك. باقىتىمىزعا وراي، زورلىق- زومبىلىق كورگەنىمدى دالەلدەي الدىم، ءسويتىپ قانا اجىراستىق. بالام ۇل بولعاندىقتان، وعان وڭايىراق، سەبەبى بۇل ەلدە 70 پايىز ەرلەر، قالعان 30 پايىزى عانا ايەلدەر. بالالارىما مەملەكەت باسپاناسىن تولەيدى، تاماققا چەك بەرەدى، مەكتەبىن دە تولەيدى، مەديتسينالىق قىزمەتىن دە تولەپ بەرەدى. مەن قازاقستان ازاماتشاسى بولعاندىعىمنان، ەم الۋعا قىزمەت تەگىن ەمەس، تەك جەڭىلدىك الىپ تۇرامىن، سەبەبى ارابتىڭ بالالارىن تاربيەلەپ وتىرمىن»، - دەيدى اتى- ءجونىن اتاعىسى كەلمەگەن قىز.
باسىلىمنىڭ مالىمەتىنشە، بۇل وقيعالاردان اسىپ تۇسەتىن جاعدايلار بار. ايەلدەر مۇگەدەك بولىپ قالاتىن نەمەسە ءوز- وزىنە قول جۇمساۋعا يتەرمەلەيتىن جاعدايلاردىڭ بولعانىن ايتادى، سەبەبى، اراب ەلدەرىندە ەر ادامدارعا سوت جوق ەكەن.
«الايدا قىزدار كۇيەۋگە شىعۋ تۋرالى رايلارىنان قايتا ما دەگەن سۇراققا بىركەلكى جاۋاپ قاتپايدى. سوعان قاراعاندا، بالالارى ءۇشىن جانە بايقۋاتتى ءومىر ءۇشىن وسىنداي قاتىگەزدىكتەرگە توزۋگە دە دايىن. امىرلىكتەردىڭ بيلىگى اراب بالالارىنىڭ انالارىن اش- جالاڭاش، ءۇيسىز- كۇيسىز قالدىرمايدى، دەيدى قىزدار. مۇنداي ءومىر ءۇشىن ولار بوستاندىقتارىن دا قيۋعا دايىن»، - دەپ جازادى ماقالا اۆتورى.