12:06, 10 - تامىز 2016 | GMT +5
جاڭا تولقىن بالالار بايقاۋىندا جانەل ءسادۋاقاس ەل نامىسىن قورعايدى
استانا. قازاقپارات - بەلگىلى «بالالار جاڭا تولقىنى» جاس ورىنداۋشىلار بايقاۋىنا استانالىق، IV «ايالاعان استانا-2016» بالالار بايقاۋىنىڭ جەڭىمپازى 11 جاستاعى جانەل ءسادۋاقاس قاتىساتىن بولدى.

جاس ءانشى وتكەن جىلى «جاڭا تولقىن» بايقاۋىندا ەكىنشى ورىندى يەلەنگەن قازاقستاندىق ءانشى ادەمىنىڭ شاكىرتى.
«جاڭا تولقىن» بالالار بايقاۋىندا ەل اتىنان سۇيكىمدى حانشايىم، مەنىڭ شاكىرتىم ءسادۋاقاس جانەل قاتىسادى! سىزدەر قولدايدى دەپ ۇمىتتەنەمىز»، - دەپ جازدى ادەمى ءوزىنىڭ ينستاگرامداعى پاراقشاسىنا.
فينال قىرىمدا «ارتەك» حالىقارالىق ورتالىعىندا 11-13 -تامىز ارالىعىندا وتەدى. بايقاۋعا الەمنىڭ 11 ەلىنەن (رەسەي، ارمەنيا، ابحازيا، لاتۆيا، مالتا، قازاقستان، قىرعىزستان، كورەيا، رۋمىنيا) 8-12 جاس ارالىعىنداعى 15 بالا قاتىسادى.
«بالالار جاڭا تولقىنى-2016» بايقاۋىنىڭ ءادىلقازىلارى: ەۆگەني كرىلاتوۆ، لەۆ لەشەنكو، يرينا دۋبتسوۆا، سەرگەي لازاريەۆ، فيليپپ كيركوروۆ. ءادىلقازىلار ءتوراعاسى - رەسەي حالىق ءارتىسى، پروديۋسەر، كومپوزيتور يگور كرۋتوي.