11:56, 10 - تامىز 2016 | GMT +5
ريودا جۋرناليستەر مىنگەن اۆتوبۋسقا وق اتىلماعان، تاس لاقتىرىلعان
استانا. قازاقپارات - ريو- دە- جانەيروداعى وليمپيادانىڭ سپورتتىق نىساندارى اراسىندا جۇرەتىن جۋرناليستەر اۆتوبۋسىنا بەلگىسىز بىرەۋلەر تاس لاقتىرعان، دەپ حابارلادى bbc اگەنتتىگى.

العاشىندا اۆتوبۋسقا اتىس قارۋىنان وق اتىلدى دەگەن حابار تارادى، ءبىراق كەيىنىرەك بەلگىسىز بىرەۋلەردىڭ تاس اتقانى انىقتالدى.
اۆتوبۋستىڭ ەكى تەرەزەسى سىندى، سالوندا بولعان كەيبىر جۋرناليستەر جەڭىل جاراقات العان.
«تارسىلداعان دىبىس شىقتى. اۆتوبۋس توقتاعان جوق، ءبىراق ءجۇرىسىن تەجەدى. ءبارىمىز ەدەنگە جاتىپ، قورعاندىق»، - دەدى Press Association اقپارات اگەنتتىگىنىڭ فوتوگرافى.
وقيعا ورنىنا كەلگەن پوليتسيا اۆتوبۋستى باسپا ءسوز ورتالىعىنا دەيىن شىعارىپ جەتكىزىپ سالدى.
حالىقارالىق وليمپيادالىق كوميتەتتىڭ حابارلاۋىنشا، جەرگىلىكتى بيلىك وقيعانى تەرگەۋدى باستادى.
ريوداعى وليمپيادا ويىندارى باستالماي تۇرىپ، قالالىق پوليتسيا وليمپيادا كەزىندە تۋريستەر مەن شەتەلدىكتەردى قوعامدىق قاۋىپسىزدىكپەن قامتاماسىز ەتە المايمىز دەپ ەسكەرتكەن ەدى.