18:34, 09 - تامىز 2016 | GMT +5
قىرعىزستانداعى نازاربايەۆ مەكتەبى ناقتى عىلىمي باعدارلاما بويىنشا جۇمىس ىستەيتىن بولادى
استانا. قازاقپارات - قىرعىزستاننىڭ وش قالاسىندا ق ر پرەزيدەنتى نۇرسۇلتان نازاربايەۆتىڭ باستاماسىمەن قازاقستان بولگەن قاراجاتقا جاڭا زاماناۋي مەكتەپ سالىندى.

ول ناقتى عىلىمعا بەيىمدەلگەن ەكسپەريمەنتالدىق باعدارلاما بويىنشا جۇمىس ىستەيتىن بولادى.
بۇل تۋرالى سەيسەنبىدە «جەتىگەن» مەكتەپ ليتسەيىنىڭ ديرەكتورى قىيالبەك اكماتوۆ ءمالىم ەتتى، دەپ حابارلادى كيرتاگ.
«مەكتەپتە حيميا، بيولوگيا، ماتەماتيكا، ينفورماتيكا پاندەرى تەرەڭدەتىلگەن ەكسپەريمەنتالدىق باعدارلامامەن وقىتىلادى. بۇدان باسقا، اعىلشىن ءتىلىن تەرەڭدەتىپ يگەرۋ باعدارلاماسى ەنگىزىلەدى»، - دەدى ول.
ديرەكتوردىڭ ايتۋىنشا، باستاۋىش سىنىپتار ءۇشىن ساعات 8 دەن 16.00 گە دەيىن ۇزارتىلعان كۇن باعدارلاماسى ەنگىزىلدى. ساباق قىرعىز جانە ورىس تىلدەرىندە وقىتىلادى. مەكتەپكە تەك ۇزدىك وقۋشىلار قابىلدانادى.
تامىزدىڭ اياعىندا 500 ورىنعا ارنالعان مەكتەپ رەسمي اشىلادى دەپ كۇتىلۋدە. 1 -قىركۇيەكتە وقۋشىلار قابىلدانادى.